27-8-2017:開學前3+1高雄假期day 3(part 1).免費玩壽山動物園

day 3嘅早上,我哋去壽山動物園,本來動物園都唔係我心目中個list嘅「必去」,呢個動物園唔算特別出名,上次去嘅北海道旭山動物園同新加坡動物園都咁正,好難唔比較~不過我編排行程時偶然發現27/8適逢七夕,原來做緊promotion,著住情侶裝或者親子裝入園嘅話,免費入場﹗﹗(雖然本來入場費只係成人每位40台幣⋯:p)咁抵,明明冇話特別想去,而家都忽然間特別想去了,我執行李時先拿拿臨加套親子裝落去,去得動物園,梗係著下上次去北海道旭山動物園嗰件大猩猩tee啦~

我哋食好早餐就出發啦~因為瞓得晏,去到酒店餐廳時要坐到去好遠,因為食得慢,所以差唔多十點時職員好殷勤地服務,甚至幫我哋斟埋咖啡同茶,曉呀,快啲啦,人哋開始預備緊午市啦﹗

之前一早search咗,我哋住嘅酒店好近嘅鹽埕埔捷運站就有得搭巴士去動物園,我哋係捷運站見到指示牌,架巴士要係離酒店遠少少另一個出口嗰邊搭,我手多多又search下google路線,原來嗰架巴士停捷運站之前,有一個站正正係我哋酒店門口幾步丫﹗太好了~唔駛行咁遠~嚟到原來係架小巴,但係可以企位嘅小巴,我哋上車時已經好full,明明周圍都係老人家,但其中一個婆婆讓座俾抱住曉嘅day,盛情難卻,我坐低咗抱住曉~真係好多長者,後來仲有一個用住walking frame行得好論盡嘅老人家上車~我哋估,老人家應該唔似去動物園丫,大概佢哋會好快落車吧?謎底解開了,原來佢哋去山腳嘅佛寺,好似好勁咁,因為仲有好靚嘅建築物有甚麼研修中心~跟住架車即刻好吉~

到咗壽山動物園啦~

得到門口嘅職員認證,我哋可以唔駛買飛入場,yeah~~~

首先見到紅鶴,你問曉嘅話,佢會話你知「佢哋單腳企」~

唔知係因為day 2行得太多路,定係天氣太熱?今日曉狀態麻麻地,成日都要爸爸抱,唔係太肯落地自己行;另外,係咪酒店啲咖啡唔係好夠力?我哋見曉唔肯行路,坐低休息時,day甚至要係長櫈小睡一陣,所以個動物園兩父女都行得不太起勁~

唔單止我哋唔太起勁,啲動物都唔太起勁,因為太熱了吧?雖然香港打緊八號風球,但台灣呢邊係咪受颱風外圍影響,非常悶熱~如果你而家問曉,去動物園睇咗咩動物,佢會答你「見到獅子瞓覺」,呢個印象最深刻吧?當然,另一方面,因為曉係公公婆婆屋企睇嘅ABC video入面,講到L嘅時候嗰隻Lion獅子瞓覺,有隻Ladybird甲蟲係度騷擾佢,獅子想拍隻甲蟲一拍拍唔中但拍中自己塊面,我哋睇獅子時有同佢提起段video,可能因為咁佢特別記得吧~

見曉一pat嘢伏係爸爸上面,我哋諗住趁佢未瞓覺先去兒童牧場,上次北海道旭山動物園個兒童牧場非常精彩(請參閱:2-9-2016:北海道三人行day 6(part 2).旭山動物園(下)之小小動物園),有少少期望~

兒童牧場~

我哋用搵兔兔哋吸引曉,地圖上有顯示嘛~點知去到⋯搵唔到兔兔﹗所以如果再追問曉動物園點樣,佢第二句答案就會係「搵唔到兔兔」,之後?「睇到鹿~」

有爸爸媽媽bb呀~話說我哋影呢張相嘅時候,有個台灣小女孩攝係我哋中間問我哋,你哋講緊咩?講英文嗎?我答「廣東話」,你聽過呢種語言未呀?

呢幅地圖介紹台灣嘅動物~

我哋去搵鹿啦~

我諗,成個動物園最活潑嘅應該係啲鹿了~

但唔知點解,一堆鹿好幾隻忽然間一齊跑上山坡,係樹叢後面⋯

得一隻係我哋視線範圍之內,曉就好著急,「你做乜唔跟住去呀?」「你快啲一齊行啦﹗」

全靠佢唔走住,我哋先有得睇多陣,如果唔係就會變成「搵唔到鹿」~

兒童牧場仲有羊咩咩~

唔知係咪因為佢哋個樣同書入面嘅羊咩咩唔太似樣,佢而家已經唔記得睇過羊咩咩了(打blog時返嚟香港未夠兩個星期)~

byebye兒童牧場~

曉仲記得有睇過馬騮,又係懶洋洋呢,澳門熊貓館出面嗰啲馬騮活潑好多~(請參閱:16-4-2017:澳門一家八口大旅行day 1(part 2).活潑可愛熊貓館)

我哋係兩個唔同嘅角度睇過呢隻象,首先遠睇,之後再近睇,曉好深信佢哋唔係同一隻象,呢隻咁大,邊度係細細隻嗰隻嚟㗎~

幫手睇地圖?nonono~曉話佢「睇報紙」~

睇到有少少意興闌珊,不如早少少走啦,我哋過去親水廣場同埋紀念品店望下就走啦~點解動物園要有得玩水呢?我哋都唔係好明,不過上次去新加坡動物園時見過一次就唔會大驚小怪(請參閱:14-1-2017:new新加坡day 2(part 2).一家大細喜愛的Singapore Zoo),新加坡又唔同喎,全年天氣都咁熱,其實好多地方都有得免費玩水,anyway都好嘅,平平地入場(我哋今日免費添)就可以玩成日,放晒細路啲電,正﹗

呢度似乎係最吸引曉嘅一部份,佢睇小朋友玩睇到眼金金,雖然佢冇出聲話想玩,但知道佢好羨慕,我哋都同佢講,你又冇帶泳衣、又冇著游水片,我哋又冇替換衫,玩唔到啦,佢都好接受嘅,睇落都唔似太失望,不過就唔捨得走囉~

紀念品店啲嘢就不太吸引了,完全冇購買意慾,同旭山動物園同新加坡動物園咁要控制自己唔好買咁多唔一樣,勝在可以涼一陣冷氣,不過個冷氣出風位已經有人企咗係度涼緊﹗大家都好熱^^”~

走之前我話去一去洗手間,居然呢個時候發現另一樣有趣嘅東西,原來小朋友有得揸車車﹗曉第一次玩咋,佢腳夠長了,不過唔係太識得控制~媽媽好攰,不如坐低睇住個背囊啦,爸爸帶佢去玩﹗呢度冇人賣飛、冇人主持大局,車任意係「跑道」上「奔馳」,總之有車吉出嚟,你就可以跑過去上車入錢,跟住就可以出發,夠鐘就會自動停車,你再入錢又得,落車又得~我遠遠望住兩父女,明明有好多架車有小朋友落嚟,點解你哋唔積極啲過去上車?﹗爸爸用口型遠遠答我:「佢想坐紫色﹗」哈哈~估唔到為咗車嘅顏色可以咁有耐性~但等極都等唔到架紫色車嘅小朋友落車,退而求其次上咗第二喜歡嘅黃色﹗

曉揸車有少少橫衝直撞,有時又會無啦啦停車,因為佢實在唔係太識控制,同佢差唔多情況嘅「車主」都有唔少,所以跑道上有啲大人傍住係側邊,大家放心,車速其實非常安全嘅~>v<但兩父女去行咗半個圈時有少少躁動,原來曉見到架紫色而家冇人坐了,好想轉過去紫色,爸爸唯有係跑道上講一番大道理~佢哋落車時我問,點解入咗錢一次,一個圈都行唔晒嘅,爸爸答我因為揸得太差⋯哈哈~

離園去到巴士站,好多人等車,咁唔樂觀,又有架的士向我哋招手,「唔該去駁二~」出發下一個目的地啦﹗

本來呢篇blog去到呢個位應該要完,但的士上實在太搞笑,要記低一下,話說我哋上車時播緊嘅音樂係上海灘嘅「浪奔浪流」,係葉麗儀版本,我哋心裡都講一聲,哦,司機鍾意聽廣東歌,結果首歌係未完全完結之前被中斷,換咗另一首歌,一起音樂,又係浪奔浪流?﹗今次係劉德華版本,我同day雙目對視,暗暗覺得奇怪,點解咁多浪奔浪流?劉德華唱完,下一首歌又變番葉麗儀嘅浪奔浪流﹗﹗﹗﹗﹗我忍唔住爆笑咗出嚟~有冇咁鍾意呀?我哋由壽山動物園去駁二其實唔遠,但聽咗三次浪奔浪流,究竟個司機一日聽幾多次?﹗我哋落車時,曉已經瞓著咗啦~

高雄市壽山動物園官方網站:

http://zoo.kcg.gov.tw/index.asp

待續

前往其他台灣旅遊blog

Comments

comments

發表迴響

你的電子郵件位址並不會被公開。 必要欄位標記為 *