26-8-2017:開學前3+1高雄假期day 2(part 1).親子開心高雄兒童美術館

前一晚咁夜飛機,點都盡量瞓得晏少少補充體力啦,較咗八點半鬧鐘,唔可以再晏啲了,再晏啲就冇早餐食啦~我哋住嘅高雄翰品酒店有包埋自助早餐,梳洗好執好背囊就可以去食嘢啦~

酒店早餐選擇好多,中式、西式、日式(?)都有,點解個日式要加個問號?因為有得食白飯同埋麵豉湯,又有啲食啲烤魚之類,可以算係日式吧﹗

第一日我就俾白飯+小菜吸引住了,食得好滿足~

曉當然係prefer食包包啦,有好多醬可以搽,不過更吸引佢嘅一定係各式各樣嘅芝士﹗自從21m嘅新加坡trip之後,佢徹底成為一個芝士fan了~

今次住嘅翰品酒店~

其實今次冇搵定好多景點,一來大住個肚,二來帶住個曉,我哋實力都減弱咗一截,輕輕鬆鬆就好~我揀咗兩個曉應該最有興趣去嘅景點嚟早上去,等佢體力精神都最好時玩咗先~星期六早上我哋先去高雄兒童美術館﹗上次新加坡去過兒童美術館,大人小朋友都好鍾意,今次都充滿期待呀~我哋要搭地鐵去凹子底站再轉巴士(廣東話嘅「凹」讀粒,普通話嘅「凹」讀坳,我哋都唔知叫粒子底定坳子底好,我哋兩個溝通索性叫佢做「胳肋底站」>v<),由酒店行出去鹽珵埔站真係超近,曉嘅速度都係行幾分鐘咋~

鹽埕埔站外面嘅招財貓+招財曉+招財媽~

原來高雄都可以用台北嘅悠遊卡(台灣八達通),今次冇特別留意呢一部份,我見屋企有一張悠遊卡就隨便帶埋去,原本都想買多一張啦,方便啲,但原來用就用得,但買就只有得買高雄本地嘅交通卡,即使係悠遊卡都冇得增值,所以我哋今次個trip全程就一個人嘟卡一個人買單程票,地鐵都還好,巴士冇散子就要蝕少少,同埋冇咗轉乘優惠囉~

搭地鐵去~

原本諗住落地鐵就轉巴士,但係地鐵站有嘢吸引住曉喎~

原來有圖書館嘅外展隊伍係地鐵站搞咗講故事時間呀,明明唔識聽(因為一半國語一半台語,所以day聽到100%,我聽到50%,曉應該係0%),曉都好想除鞋入去聽喎,反正唔趕行程就去聽一陣啦~

一出站就見到架巴士啦,不幸地原來有少少落雨呀,明明睇咗天氣預報話得10-20%機會落雨咋喎~今次我地冇買上網卡,冇得GPS咁睇住巴士嘅位置,諗住留意住巴士站名就ok,哎吔,我哋落錯車呀,我哋係美術公園落咗車,原來直情有個站係兒童美術館㗎~好在只係毛毛雨,平時曉沖涼時用花灑洗頭,水唔滴落塊面就叫「冇事」,滴到少少叫「有少少事」,原來滴到好多叫做「好大件事」,哈,今次佢都只係評估為「冇事」級別啫~

因為落錯車,所以欣賞到兩排好整齊嘅大樹~因為落錯車,所以睇到鹿爸爸、媽媽、BB嘅雕塑~(我睇呢張相時,點解曉個頭咁亂嘅?哈,原來後面有棵樹啲顏色同頭髮一樣色﹗)

未入到美術館就已經有各種藝術品了~曉好鍾意呢個波波人喎~

兒童美術館入場完全免費,雖然地方唔算大只有兩層,但細路慢慢玩其實可以玩大半日,我哋諗住玩一個上晝啦,之後就去食午飯同埋曉要瞓覺了~叫做美術館,我覺得更加似係通識遊戲室﹗展覽會不定期咁換,我哋去嘅時候有個「咔滋咔滋 Art, Yummy!」展覽,內容係同食物有關~等曉帶大家去睇下啦~

各種顏色嘅食物,原來曉喜愛嘅紫色有茄子同埋蕃薯~

廚師曉著咗圍裙可以去煮嘢食啦~

再用泥膠嚟整食物~雖然啲泥膠乾晒,但曉依然興緻勃勃,玩到唔捨得走~

有圖書睇~哇,發現媽媽好喜歡嘅小雞系列﹗之前係香港嘅圖書館借過「小雞去露營」同埋「小雞逛超市」,呢度有「小雞過生日」呀﹗有諗過不如去書店買一套返去啦,後來係誠品見到都貴貴地,又冇得重覆睇好多次,結果就放棄冇買到了~

仲有個90cm以下遊戲區域,曉僅僅夠矮可以入去玩,下次再嚟高雄時就肯定入唔到去玩啦~

曉:我哋玩其他啦~

睇完關於食物嘅館之後,曉其實都好唔捨得走,要同佢講去隔離繼續玩、我哋玩其他啦咁佢先肯走﹗可能好多家長同小朋友都係因為「而家走未」呢個問題而起分岐,家長要帶小朋友走,小朋友又覺得未玩夠,所以小朋友扭計嘅聲音係館內此起彼落,我話,香港比較少小朋友咁大個有得四五歲都會扭計到典地,通常會典地嘅都係一兩歲嗰啲之嘛,day話因為香港地方太細喎,哈,又係土地問題﹗

呢度每個館都要除鞋入去,本來曉嘅幾對鞋之中,佢最怕著就係對波鞋,但今次因為心急要去下一個館玩就狀態大勇,無論著鞋定除鞋都非常迅速,勁~

有啲展品係戶外,全部都好有趣呀~

係咪姨媽姨丈逸逸bb?

大小馬騮好可愛呀~

原來都要好大力先㩒得落去喎~

彈首咩歌好呢?

只係一堆木條都可以好好發揮創意,小朋友可以係度玩一餐~

對面有個小gallery,展出咗中、小學生嘅畫作同埋模型~

睇得出真係小朋友畫嘅、造嘅,都真係好高水準呢~曉:好靚喎~

之後我哋上樓上一個關於明朝文字、文化嘅展覽,內容就比起地下嘅食物展覽深少少,但都有啱玩嘅部份~

呢度可以臨摹象形文字~

暴走曉﹗

好有文化氣息﹗估下兩父女寫咩?

仲可以著古裝﹗

最後一個展覽係關於植物同藝術嘅展覽,睇嘅、落手做嘅都有﹗

原來唔同嘅種子嘅形狀同大細可以相差咁遠㗎~

用蔬果砌圖畫,睇唔睇得出我砌咗咩出嚟呢?係媽媽推住bb呀~ok似嘛?

曉曉應該最鍾意呢間茅屋﹗不停又出又入又出又入~

我去跟導師學用兩條紙條整魚魚,似乎同夏威夷嗰次學嘅係同一條魚喎(請參閱:31-7-2014:加州婚禮+夏威夷day 6(part 2).PCC之水上巡遊、熱鬧Tonga、Tahiti婚禮)~

媽媽學整魚魚﹗花花衫嘅嗰位就係下面講嘅auntie啦~

比較有趣嘅經歷唔係整條魚整得靚唔靚,而係同一位一齊學整魚手工嘅高雄阿姨嘅對話,佢讚我哋帶咁細嘅曉出嚟旅遊,原來佢以前都時時帶佢個仔去旅行,而家阿仔係美國讀大學了,佢話佢好鍾意嚟香港(可能聽到我哋嘅對話吧),一年會嚟兩次左右,佢話佢上次去咗「shen shui she」,我抓頭,咩嚟嘅呢,佢再形容係太子同旺角旁邊,哦,深水埗,而家search下字典,應該讀「shen shui bu」呢,可能阿姨見「埗」同「涉」個字差唔多就有邊讀邊啦,但更搞笑嘅係佢要去深水埗買「ji gong wan」,我第一個內在嘅反應係子宮環?呢啲咁私人嘅嘢都話我知?下一個反應,呀,買藥,係咪「濟公丸」?後來再諗下,隻藥應該係「何濟公」而唔係「濟公丸」~我知啦,係「雞公碗」﹗其實到呢一刻我都唔知其實佢去買咩⋯^^”

完成﹗

唔捨得走嘅曉不停捉住我同佢睇書,睇完一本又一本~電視精爸爸就係度睇紀錄片video~有幾本書都幾有趣,有一本講養蜜蜂,原來爸爸睇嘅video都有講類似嘅內容,因為想採集唔同口味嘅蜂蜜,養蜂人會帶住啲蜜蜂走勻全台灣,咁先可以得到荔枝蜜、龍眼蜜、百花蜜等唔同嘅蜜糖~另外又睇咗一本講地底地面農作物嘅繪本,熊好懶惰,兔又勤力又古惑,兔借咗熊嘅地嚟耕種,同熊講收成一人一半,我上你下時,種嘅原來係各種葉菜,我下你上時,種嘅原來係蘿蔔薯仔等根部植物,你要晒上下我要中間時,種嘅原來係粟米,俾晒啲鬚同埋枝葉熊自己就要粟米,以後熊就決定自己親手耕種~另外又睇咗本用各種樹葉嚟創作嘅故事,有大葉、細葉、嫰葉、枯葉、爛葉等,好有創意~

我哋一早同曉講定呢個館係最後一個館,睇完就要走啦,但到最尾佢都係唔願走~不停話「未走呀~」、「未睇完呀~」,似乎佢真係好愛高雄兒童美術館呢~曉,媽媽安排其他嘅行程都好啱你玩㗎~

兒童美術館嘅天井~大家有冇色盲?

要離開啦~走時曉已經玩到冇晒電,唔肯影相了~結果爸爸抱住行多兩步就倒下啦~

高雄兒童美術館官方網站:

http://www.kmfa.gov.tw/KMFAKIDS/home01.aspx?ID=1

前往其他台灣旅遊blog

Comments

comments

發表迴響

你的電子郵件位址並不會被公開。 必要欄位標記為 *