26-8-2017:開學前3+1高雄假期day 2(part 3).六合夜市食食食

每次去台灣,都覺得要去過夜市先似去咗台灣咁,今次都唔例外,點都要去夜市掃下街~出發前我媽有講過,睇下夜市有冇嘢啱曉曉食啦,而事實上,曉曉食得嘅嘢比我更多,起碼佢食得蚵仔煎我就唔食得喇~我比佢叻嘅地方只係我食得比佢辣少少同埋我比佢相對肯試新嘢咋~

話說我地離開夢時代,諗住搭番輕軌出去捷運站,呢個時候我哋先發現原來輕軌運行咗冇耐,暫時未有得賣單程飛,我哋得一張悠遊卡,所以搭唔到輕軌,呢個時候只可以選擇搭巴士或者的士,雖然只係七點幾,但有好幾條巴士路線已經開走咗尾班車,剩低有運行嘅路線嘛,我哋對於啲地標同捷運之間嘅位置唔太熟,而家又冇得上網搵路線,day不停話「嗰架的士好似同我哋招手喎」之下,我哋就揀咗快靚正嘅選擇,直接搭的士去到六合夜市了﹗

六合夜市其實以前都去過,不過對上一次去⋯check番blog嘅紀錄,原來已經係2009年lu(請參閱:6-2-2009:第一站高雄.六合夜市),其間去過其他台灣夜市,我都唔係好記得六合夜市有咩特別~而家睇番2009嘅blog,原來我哋食咗嘅嘢同嗰次冇一樣相同呢,不過今次我依然有同day講過,飲果汁的話要睇清楚係咪新鮮果汁﹗

到咗六合夜市啦~

今次嘅夜市我哋直接當晚餐,所以我哋見到有啱食嘅嘢就即買嚟食﹗首先中選嘅係魚丸湯,因為太熱辣辣,我見對面有鹽酥雞,買埋嚟一齊食~

原本day好努力咁吹凍啲魚蛋俾曉,但鹽酥雞一到,曉就不停伸手去攞,完全對魚丸湯冇興趣了~我覺得個鹽酥雞其實一般,鹽酥嘅比例太高,雞嘅比例太低啦,我要食多啲雞肉丫﹗

我其實都好想食蚵仔煎㗎,不過我唔食得,你哋兩父女食啦不如~但去到檔口時,見到有其他「煎」喎,咁呀,不如一齊食花枝煎啦~

等食花枝煎時兩母女開心自拍~

仲有影下周圍嘅環境~

其實去台灣嘅夜市咁多次,都未試過食蚵仔煎以外嘅煎,今次試咗,原來煎到脆脆嘅粉漿,加上甜甜嘅醬汁,其實已經形成咗嗰種特有嘅風味,冇咗蠔仔原來都似行咗台灣夜市了,ok~等花枝煎要啲時間,day就出去買嘢飲,佢行咗一段路都冇果汁,結果帶咗蔗汁返嚟,順便買埋炸鵪鶉蛋蝦丸,個丸都幾好味丫,但人哋設計係幾樣材料配搭好一齊食嘛,曉就分開晒嚟食,食到最後個脆皮食到好似食極都食唔完咁咁辛苦~一齊食咪幾好味~

食咗好幾樣嘢都未有啲飽肚嘅澱粉質,我哋決定食個麵呀飯呀之類~

我哋坐低咗入鋪頭仔裡面,食埋乾麵、乾米粉、排骨酥湯同埋菜就飽到上心口啦~

呢間啲味道一般,但真係超級抵食,啲麵好似台幣40、菜又25之類,總之加埋晒都唔過200﹗

曉曉其實去到呢個位已經攰攰地,真係好驚佢會就咁係街度瞓著,今日去咗勁多地方,又摸咗好多嘢,又周圍坐,又流咗好多汗,真係唔可以唔沖涼就瞓,佢自己污糟瞓天光冇所謂,但佢瞓到半夜醒咗要我攬住時⋯我真係唔想攬住個臭臭曉﹗所以就要不停好有節奏咁唸「有沖涼,就有得攬;冇沖涼,就冇得攬﹗」,仲有「有沖涼,就香噴噴;冇沖涼,就臭崩崩﹗」,keep住佢少少hyper,唔好瞓著住呀~

行到六合夜市條街嘅盡頭,原來就係捷運站啦,仲要係出名好靚嘅美麗島捷運站添~可以順便欣賞埋個站﹗

呢度出名在天花嘅巨型玻璃鑲嵌畫,果然好多色彩,真係好靚喎~

色彩繽紛~

曉影極都唔合作,唔理佢啦﹗>v<

吸引佢嘅反而係呢條紅色嘅柱~

爸爸鍾意呢邊~

我就揀呢邊,原來影出嚟唔係太紫色添~

不過呢個空間就熱咗少少,影完相都唔想久留~都係嘅,我哋都要快快返酒店沖涼瞓覺啦~

待續

前往其他台灣旅遊blog

Comments

comments

發表迴響

你的電子郵件位址並不會被公開。 必要欄位標記為 *