之前講到，我哋由美術館出來之後，爸爸抱住曉行咗兩步佢就瞓著咗了，已經一點幾兩點鐘，梗係搵個地方坐低食飯先啦～之前咪落錯巴士站嘅，我哋行過去兒童美術館時，沿途人又少店鋪又少，難得見到一間cafe所以印象好深刻，而家要去搵食就即刻諗起嗰間cafe～cafe叫做鼻子咖啡，見到個名令人腦海出現池石鎮嗰樣，有兩層，我哋坐咗上樓上，轉咗手俾我攬住曉(爸爸要保留實力陣間可能要再抱好多呀)，day就去點餐～

呢度坐得好舒服，食物質素都好高，又抵食，因為曉已經呼呼大睡，今次order食物完全唔駛考慮佢嘅口味，所以叫咗一款味道較強烈嘅青醬pasta，一款辣嘅乾貝醬pasta，食物嚟到食一啖先諗起，係喎，乾貝醬咪即係同XO醬差唔多囉，原來XO醬可以用嚟整意粉，真係未考慮過～轉套餐就包餐湯、餐包同埋水果乳酪，原來佢哋都興咁樣加埋水果乳酪落去set度，之後嗰日嘅cafe午餐又出現咗呢個組合～飲品方面我就飲玫瑰奶茶，day就飲美式咖啡，大大杯好抵，不過唔記得叫佢少甜/半甜，我嗰個味道就甜咗啲喇～

攬住個瞓覺嘅細路都可以好好享受午餐～我滴咗一滴汁落曉件衫之後，緊急鋪番張餐巾先﹗

我哋慢慢食完再慢慢飲完，再慢慢上網search下交通路線，曉都未醒，又轉番手去爸爸度抱，我哋出發啦～

以前去旅行出發前會買定上網卡，再問姐夫借定wifi蛋，上次去新加坡借定wifi蛋結果都冇買上網咭，因為而家Smartone都出咗海外一日「自助餐式」數據plan，好似$3x一日，用嗰日就俾$$，唔用嗰日又唔駛俾，計起嚟抵過買上網咭～今次去台灣都係諗住咁，結果我哋一日都冇用過呀，周圍都好多wifi，餐廳食肆商場景點酒店，度度上網都好方便，速度又ok喎～點解要講起呢件事呢，因為cafe嘅wifi真係好有用，我本身出發前search咗我哋下一個目的地夢時代嘅交通，只搵咗捷運去嘅方法，如果由美術館去其實要轉好多次車，我用咗cafe嘅wifi八卦search下有冇其他路線，原來附近有巴士直達添呀，咁就方便好多啦﹗如果搭捷運去夢時代其實要再轉輕軌(類似香港嘅輕鐵咁嘅樣)，後來我哋先知道，原來輕軌通車冇耐，暫時冇得買單程飛，一定要嘟咭先可以搭車，有睇我上一篇blog嘅就會知道，我哋今次兩個大人，得一張「台灣八達通」，我哋係冇資格搭輕軌㗎～

因為用google嚟search路線，有得show埋點樣行去巴士站，幾耐有車到，實在太完美了～

行路往巴士站途中～

我哋又好好彩，行到巴士站就馬上有車嚟，呢架168號巴士並唔係咁密㗎咋～

曉一直瞓瞓瞓，食飽飽嘅day又飯氣攻心，剩番我一個金睛火眼咁望住路線睇下仲有幾耐落車，因為之前係google map download定巴士路線地圖，所以用愛河嚟做reference，幾時轉左幾時轉右幾時過橋就知道我哋嘅位置，咁都安心好多～沿途經過咗漢神百貨同埋星光水岸公園，咩地方？漢神百貨就係我哋book咗最尾一日去食自助餐嘅漢來大飯店嘅地方，之前睇離捷運站都遠遠地；而星光水岸公園係有得免費玩水嘅地方，本身有諗過去，亦因為交通少少麻煩而放棄咗，果然巴士比較四通八達～

仲有第一次見到高雄輕軌，係草地上行，感覺好似西班牙巴塞隆拿嘅輕鐵呢～

到啦到啦﹗結果成程車曉都冇醒，似乎係美術館真係玩得好盡興呢，攰到咁，去到夢時代商場我哋就叫醒佢，梗係啦，佢四點仲未食lunch喎～不過去食飯之前有一個更更更重要嘅任務﹗次次去台灣旅行都係嚟到先換台幣，今次班飛機太夜，高雄機場啲找換店又冇台北嗰啲咁搏盡，去到時已經全部關門大吉，我哋得之前去旅行用剩嘅台幣$3xxx，暫時頂住當就夠嘅，成個trip就唔夠用啦，所以揀day 2就去呢個大shopping mall都有原因，我哋去到地下嘅ground floor就順利唱到錢了，雖然話酒店都有得唱，但呢度個rate同網上見到嘅比較接近，good，有錢錢了～

target一個「得佢食我哋兩個唔食都唔會尷尬」嘅餐廳，我哋決定去美食廣場～

叫咗碗烏冬俾佢，犀利咯，用筷子食，勁﹗呢個美食廣場有兒童用餐區，不過矮櫈嘅位唔算太多，反而係好多卡位，但卡位個座位同枱距離太遠曉坐唔到，結果我哋都係出番去一般用餐區俾佢坐大脾嚟食～曉jap jap jap時我哋就輪流去廁所，佢一食飽飽就可以再行動啦～

嚟到夢時代其實最主要上去頂樓嘅HAPPY 100空中主題樂園，最初搵去玩嘅地方時特別搵多啲「親子」嘅景點，咁佢就出咗嚟喇～不過其實夢時代成楝樓係好大嘅shopping mall，所以好想順便去行下街，時間有限，但我想去5/F嘅誠品，7/F嘅兒童部，9/F同R/F嘅遊樂場，時間有限，好忙呀～關於去HAPPY 100主題樂園嘅時間，我目標係要坐摩天輪睇日落，所以我哋決定六點左右要上去，咁⋯即是之前嘅時間可以逛5/F同埋7/F啦～

瞓醒覺又食飽飽嘅曉自然精力充沛啦～

同我哋屋企嘅兔兔同一系列﹗係曉曉眼中，只要啲公仔有大有細，佢自然就會代入爸爸媽媽曉曉bb，如果超過四隻，就會加入姨媽姨丈逸逸bb等嘅角色～

引起話題之作﹗呢個宣傳洗頭水嘅booth，曉真係幫得手至極，有冇咁陶醉呀～哈哈～

原來夢時代嘅誠品就快結業，所以好多嘢都割價大傾銷，原本都好想買下多啲嘢，結果只買咗兩本書咋，一本俾自己嘅首爾旅行書，一套俾曉嘅兒童雜誌，咁掃興係因為有個小朋友要去緊急辦啲事囉⋯好在day 3去駁二時有得再逛誠品﹗係度見到成套嘅「小雞」故事書同埋成套嘅「野貓軍團」，之前係圖書館借過呢兩個系列嘅書，我同曉都好鍾意，有諗過要買番嚟珍藏，但原來都幾貴呢，一套要台幣過千，呢啲書又冇得重覆睇好多次，算數啦，想睇時去圖書館再借啦～

7/F嘅兒童部雖然冇收獲，因為啲嘢其實都賣得貴，曉嘅嘢有一大堆，fufu又未駛買住～

兒童部嘛，除咗店鋪之外，仲有好多繽紛奪目嘅裝飾～

I love shopping～

但最深刻嘅係，曉不停係度睇鞋，佢係香港都係㗎啦，勁鍾意逛鞋鋪，大人鞋細路鞋男裝鞋女裝鞋都一樣咁鍾意，仲要「呢對好靚喎～」、「呢對都好靚喎～」咁不停點評人哋啲貨品～今次睇咗嘅鞋鋪冇10間都有8間，哈～我同day一致最鍾意嘅嗰間啲鞋，居然係made in HK﹗﹗但係香港未見過有得賣嘅？有諗過買俾逸逸bb，但都係唔捨得，著嘅時間太短得幾個月，小朋友真係唔值得買咁貴嘅鞋～

輪到媽媽去睇嘢時，曉發現咗大大塊鏡，佢就隨住店鋪播嘅音樂聞歌起舞～俾爸爸捕捉咗添～

好啦好啦，上去空中主題樂園玩啦﹗

呢度好好呀，上到R/F一出𨋢就見到免費locker，我哋拎咗銀包電話出嚟就放低大背囊，去玩即刻輕鬆晒～HAPPY 100空中主題樂園入場免費，遊樂設施就逐項收費，收費都唔算過份，其實啱玩的話我哋都會玩，只係曉未夠高，我又大住個肚，基本上冇乜嘢啱我哋玩～搭咗摩天輪先啦﹗

摩天輪唔算好大型，但以高雄建築物普遍唔高嚟講，已經可以望得好遠～

呢日雲好多，睇唔到個太陽，只睇到天色慢慢嘅變化，上到咁高嘅一家三口私人時間都好舒暢嘅～

曉就有啲緊張，頭3/4嘅時間佢都撓住我隻手好僵硬咁正襟危坐粒聲唔出，到後來慢慢放鬆先有啲表情，但都唔敢係車廂入面隨便移動～細膽有細膽嘅好嘅，帶呢個女出街其實輕鬆好多，唔會隨便跟人走，又唔會做危險動作，叫佢就會返嚟，又肯拖實，不過有啲好玩嘅嘢唔肯試就可惜咗啲囉～呢個摩天輪臨落車時有得望鏡頭影相，我哋都好落力咁望住鏡頭笑，但影出嚟都係太樣衰就冇幫襯買相了～

搭完摩天輪落番嚟，天都差唔多黑齊晒啦～

其實曉係呢個空中主題樂園一直有啲緊張，因為呢度係恐龍做主題，但唔係好cutie嗰啲，而係一隻隻像真度比較高嘅大機械恐龍，仲會郁又有聲，佢捉到我哋實一實，肯自己行路已經算好好～

其他嘢都唔太啱玩，我哋玩咗釣魚(磁石釣桿同埋膠魚仔)，其實係我自己想玩，曉都未識玩嘛～其實無論釣得有幾少都有禮物，即使係大獎我自己都覺得唔太吸引，大獎係小吊飾公仔，二獎係卡通公仔原子筆，三獎係螢光手鈪，但有個阿媽為咗幫個細路拎「勁獎」，居然伸手握住枝釣桿嘅端端直接吸啲魚上嚟，咁邊度有樂趣㗎～我同曉一齊玩，主要我釣，佢幫我搣啲魚出嚟，有一小段時間爸爸有釣，曉又有釣，我哋當然係三獎啦，但都幾開心丫～

之後落去9/F都係HAPPY 100嘅範圍，有青少年或者成人玩嘅機鋪同埋類似歡樂天地(今時今日應該形容為「類似冒險樂園」，oops，又暴露年齡添～)嘅遊樂場～

呢個真係超抵玩，好似係台幣$10一個代幣，我哋玩嘅mini air hockey同埋mini保齡球都係兩個代幣咋，不過曉好多都未識玩先冇玩多啲咋～

我哋玩得咁屎都有三張飛，哈哈～

呢度玩係好平，但更平嘅係免費揸車﹗真係免費？nonono，因為唔入錢錢，曉已經揸得津津有味～之前係香港同愷揚佢哋出街，入到冒險樂園，兩個小朋友都爭住爬上呢啲遊樂設施，但佢為咗吸引你玩會間歇咁郁下又有音樂嘛，一郁+有音樂時曉就會即刻跳落車，仲叫埋愷揚都要快啲落車添，愷揚就調轉，一見到有郁嘅就即刻衝過去，兩個小朋友性格真係好唔同囉～

今次唯一曉有主動要求想玩嘅係沙池囉，但收費係每小時計，我哋唔夠時間啦，返到香港媽咪帶你去沙灘玩沙啦～

冇時間？係呀，我哋要去夜市掃街食晚餐呀﹗gogogo～

鼻子咖啡Facebook page：

https://www.facebook.com/nose920/

統一夢時代購物中心官方網站：

http://www.dream-mall.com.tw/

HAPPY 100空中主題樂園官方網站：

http://www.happy100.com.tw/

前往其他台灣旅遊blog

Comments

comments