今個trip應該叫做「暫時告別trip」，陀住細bb 19w飛埋呢轉，要bb出世之後先可以再去旅行啦，到時唔係3+1嘅旅行，而係實實在在嘅一家四口lu，希望你要順順利利健健康康呀～曉九月又開始返學，即使唔係陀住b，要去旅行都要趁學校假期啦～
我嘅韓文sem break係去旅行嘅好時間，我係個好學生盡量都唔想走堂，舊年嘅相同時間我哋就去咗北海道(請參閱：27-8-2016：北海道三人行day 0．我們不自駕遊及其他相關blog)～今年本來幾個月前同媽咪講起可以去韓國等我牛刀小試，用學咗呢段日子嘅韓語帶我哋一家八口去下啲首爾/釜山以外嘅鄉郊地方，課本裡面出現過+韓劇請回答吧1994又出現過嘅正東津原本係我嘅target之一，不過嘛，知道有咗細bb之後，韓國已經唔係太高priority了，因為曉而家太重，佢要瞓覺時我哋唔可以抱住佢邊行邊瞓一兩個鐘，尤其我冇咗戰鬥力去抱，得番爸爸抱就太辛苦，如果去non首爾嘅韓國的話，曉瞓覺時我哋坐低一兩個鐘會嚴重地躭誤行程～我suggest不如一齊去坐遊輪或者去東南亞住resort啦，大家好似興趣減低，當家姐提議去番韓國首爾+少少近郊，每日有八口共同行程+三家各自自由時間，呢個提議都好好呀，但呢個時候，老公話公司有product要八月中下旬趕deadline，請唔到假，oh no no，plan乜都冇用lu～因為我太傷心，如果今次冇得去就要整整一年後先有得出，商量之下決定就只請一日假，八月底只請一日假去個「假四日三夜」短trip，因為係放工出發嘅夜機，去到時只有入住酒店瞓覺啦，所以只係三日三夜，但如果星期六先出發，咁又冇咗半日，都係夜機去啦～目的地方面，因為要飛行時間短，飛機班次時間要啱，其實選擇唔多，陀住曉時嘅babymoon我哋去咗台北，今次就去高雄啦～
出發嘅星期五啱啱葉太姨姨請假，由婆婆代為照顧曉曉，我放工就冇咁趕啦，直接返到嚟執埋最後嘅行李就可以搭的士去機場會合爸爸﹗特別要鳴謝我爸爸即是曉曉嘅公公，佢幫我哋手送我上的士，唔該媽咪幫我照顧曉就講幾多次都唔夠㗎啦～咁大個人去過咁多次旅行冇理由再未出發先興奮啦，可能一來怕事情係任何一個point唔順利，二來其實陀住細bb之後睡眠質素其實差咗好多，出發前嘅一晚我瞓得四個幾鐘，凌量醒咗就瞓唔番，返工睇症都比平時遲鈍咗少少，希望冇做錯事⋯遲係遲咗少少放工啦，好在節省咗去接曉曉嘅時間，但我哋去到機場時都慢過爸爸lu～
都好嘅，爸爸可以接我哋落車，咁我就冇咁論盡啦，話晒我要帶住曉+三個人嘅大行李～曉第一次坐行李﹗
夜晚九點幾飛機，點都要食咗晚飯上機，今次我冇提早網上check in，因為我哋機票嘅class冇得揀座位，好似提早check in都冇乜意思咁，到時又要排隊寄行李～不過嘛，我有預先揀定飛機餐，我同day就要咗水果餐，我幫曉揀咗兒童餐，哈，因為自己咁大個女未食過飛機嘅兒童餐好想試下﹗係呀，曉今次係兩歲後第一次飛，佢終於有自己嘅座位同埋自己嘅飛機餐lu～
我哋過關後先搵地方食晚飯，因為太肚餓，我要食飽啲﹗唔夠時間慢慢坐低食靚餐廳，我哋係快餐之中揀咗翠華，大家樂比起平時貴太多，唔係好想幫襯，翠華反正都貴開就算數啦～
果然揀得好，曉超鍾意食個海南雞飯－－啲飯﹗平時佢見到白飯就頭痛，油飯嘅待遇果然唔同，開頭佢試咗啲飯之後不停食飯，我哋邀請佢食雞佢都唔肯食，後來食咗第一舊就知道好味啦，就不停食飯+雞，另外嘅焗豬扒飯就被冷落了，焗豬扒飯都好好味丫～因為三個人都太肚餓，排隊點餐又等得太耐，我話，食嘅時間短過買嘅時間好多呀﹗﹗
食完見到呢架車﹗估唔到平時唔坐bb車嘅曉好鍾意坐喎～
都冇乜多餘時間可以慢慢逛鋪頭，食飽飽就要過去閘口了，時間僅僅夠曉行路嘅蟻速過去閘口，啱㗎啦，用多啲energy，上飛機瞓覺，瞓到第二朝啦～
指定動作﹗
不過明明平時九點幾要瞓覺，但佢登機前都依然超hyper，對住塊落地玻璃係度邊唱邊跳讚美之泉最新兒童專輯嘅每一首歌，自我陶醉一番，唱得大聲到我哋要稍稍控制佢嘅聲量～
上飛機啦，今次去高雄來回機程曉嘅表現都係100分，零喊、零扭計、自己坐又唔駛抱，非常乖～打呢篇blog前啱啱睇咗家姐打帶逸逸去東京嘅搭飛機blog，當時7m左右嘅逸bb搭飛機非常乖，我就reply佢，曉9m、11m、16m、21m同埋今次28m搭飛機之中，16m嗰次最難搞，今次28m就最乖最合作﹗
兩歲幾嘅人仔識得欣賞卡通片，俾佢睇電視就no problem了，你睇佢幾專心～上次21m去新加坡即使俾佢睇，佢又唔肯戴headphone，又要我一齊睇又要我旁述，今次可以自己搞掂啦，係呀，係曉人生第一次戴headphone呀～我開頭開咗米奇妙妙屋俾佢，佢都ok專心㗎，但我哋整嚟整去未較到個音量，曉冇得聽聲音始終爭少少，後來食飛機餐停咗先，之後俾佢睇Frozen佢就睇到超入迷，即使係英文對白佢唔識聽，可能因為入面有好多好聽嘅歌吧～day話佢係潮流嘅末端，而家先嚟睇Frozen，其實簡直同潮流無關添呀，係機上娛樂嘅category之中，Frozen其實變成「經典」類別﹗﹗哈哈～btw，曉認識Elsa並非同一般嘅小女孩一樣，先被動畫/公主裙/精品等等吸引，而係源自一副啤牌﹗﹗媽媽上次去長沙灣考車筆紙後，經過有個執笠倉，超平幾蚊雞買咗副Frozen啤牌，呢個兩歲嘅小人仔非常鍾意(啤牌遊戲)，細細個就同我哋玩鬥大、記憶力、潛烏龜等遊戲，玩得有板有眼，係佢眼中，先吸引佢嘅係啤牌遊戲，之後先至係入面嘅卡通人物，後來佢認牌認number之餘，A至K圖畫入面嘅人物動作佢都超熟悉可以扮番晒出嚟了，佢就係咁樣認識Elsa、Anna等角色啦～之後再睇卡通片就特別親切⋯^^”曉就睇英文Frozen，我就睇冇聲Running Man，開頭明明有聲㗎，但後來停過又廣播過又變咗冇聲，點整都冇，但實在太耐冇睇，只有畫面+字幕嘅Running Man我都睇到津津有味～
飛機餐方面，佢食得唔多都係預料中事，因為食翠華時食咗好多嘛～吸引佢嘅只有魚魚飲管+果汁同埋曲奇餅，個pasta，算啦，大食嘅媽媽幫佢食咗佢，反正食翠華時我都未食得飽～
齊齊食飛機餐﹗
爸媽嘅水果餐&曉嘅兒童餐～
好努力﹗
努力嘅成果係最甘甜㗎～
後來睇睇下電視佢就眼瞓了，好乖，枕係我大脾上面就瞓著，冇解開安全帶都冇扭計～降落時個扶手冇辦法完全放番晒落嚟空姐都隻眼開隻眼閉了～落機時要靠爸爸抱住呢個睡寶寶啦，媽媽就負責照顧大行李+背囊，今次有Elsa，曉曉娛樂袋入面嘅嘢都冇用過呢～
到高雄啦～
行李好快出嚟，應該只係等咗幾分鐘左右咋，另外又好快上到的士，即使係咁，返到酒店都十二點幾～高雄果然同台北唔一樣，機場嘅找換店係會關門㗎﹗好在我哋有上次去旅行時用剩嘅台幣夠搭的士﹗呢啲時候我就會諗起上次自己去古晉時冇$$嘅徬徨感(請參閱：20-5-2014：古晉學習行day 1(part 2)．古晉你好)～
今次入住嘅係位於鹽埕區嘅翰品酒店，家姐見到我哋張相就話原來佢之前嚟高雄都有住過呢間，莫非英雄所見略同？我揀呢度嘅原因係超近地鐵站，google都話行5分鐘就到，我哋發現5分鐘其實係連曉都行得到，真係好近～第二就係有兩張king size bed嘅家庭房，平時好委屈咁要同曉瞓一張單人床我已經受夠啦，好想去旅行時大字形咁瞓下，同曉一張床又好同老公一張床又好應該都鬆動好多～
上到酒店房曉略略醒一醒，但佢唔肯沖涼淨係肯換件衫又繼續瞓～
我沖完涼出嚟，兩父女一人佔一張床嘅正中間，大嗰個叫都叫唔醒，我結果又係好委屈地瞓係曉張床嘅邊緣，呢個就係媽媽嘅命運？﹗到半夜起身去廁所發現多咗一條大浴巾掛咗出嚟，我先發覺原來day都起過身去沖咗個涼～好似偵探咁添～
好啦好啦，要好好休息，第二日先正式開始行程啦～
高雄翰品酒店官方網站：
http://kaohsiung.chateaudechine.com/tw/index
前往其他台灣旅遊blog