一向聽聞第二胎嘅胎動應該比第一胎早，一來子宮肚皮都較鬆，二來媽媽對於胎動有經驗，知道早期嘅胎動感覺係點，所以我早早就期待fufu嘅胎動來臨～
曉嘅時候我比較肯定嘅胎動應該係18w5d、18w6d左右(請參閱：27-11-2014：懷孕扎記18w5d．奇妙時刻第一次胎動)，到嗰陣回想番轉頭，第一次feel到嘅應該係17w6d，其實以第一胎嚟講都算早～如果第二胎要比第一胎早，咁fufu係咪應該16w至17w左右就有機會開始胎動呢？
早到15w中後時，我就隱約覺得有三兩下疑似胎動，去搵Helen時都有同佢講過，但到16w3d去健康院產前檢查時姑娘問起有冇覺得bb郁，我話之前好似有啲似，呢幾日又唔係好覺，姑娘就話，如果有就日日都會有㗎啦，唔會有時有有時冇～咁⋯我之前嗰啲即是唔係啦？不過曉嘅時候，最初一日都係一下半下，之後先至越嚟越多越嚟越大力，我諗唔係bb初時郁得少，只係佢細細粒，要偶爾最大力嗰一兩下先出到嚟，咁唔係日日都咁激動家嘛，咪可能未必日日feel到囉～anyway，睇完健康院嗰幾日又繼續唔係好覺⋯到咗17w，我開始胡思亂想，曉17w6d都有咯，點解而家都未有㗎～呢排個肚都大得好明顯丫，應該健康成長緊㗎？﹗
終於到咗17w5d，微弱嘅感覺又開始出現，係咪有啦？係咪有啦？而17w6d時，居然有一下夜晚我半坐臥係梳化時，day又咁啱走過嚟摸下我個肚，嗰下唔單止我feel到，連day都feel到呀﹗﹗﹗﹗﹗實在太驚訝了～曉嘅時候雖然話18w我feel到，但去到爸爸隔住肚皮都摸到都要成一個月之後，今次竟然咁犀利？﹗
17w6d時day都feel到嘅胎動係撞擊肚皮震一下嗰種，18w0d嗰日返工我就feel到佢「彈琴」，好似由肚嘅一邊連篤幾下去另一邊咁～我同家姐講起呢件事，佢話fufu可能係聽住你同病人睇症，然後幫你用電腦打record喎～fufu，你打字咁嘅速度唔夠快㗎，GOPC啲症咁多，啲record又好似作文咁長，你實會overrun㗎～
所以，日日要等胎動嘅日子開始啦，今日下晝我都等咗佢好耐～呢個小人仔係咪鍾意搭西鐵？今晚約咗朋友去元朗，搭西鐵時感覺到你啦，成個聚會時係咪太投入，又完全唔覺，但回程搭西鐵時又有﹗yeah～我打blog時，你知道我講緊你吧？又郁幾下俾我歎下﹗懷孕嘅媽媽嘛，只要時時feel到bb郁郁郁，感覺就好踏實又唔寂寞了～幾時要同你一齊聽下音樂睇下你嘅音樂喜好？(請參閱：10-2-2015：懷孕扎記29w3d．胎動與親子時間)
哈哈，最後都冇結論添，都唔知邊日先係第一踢了﹗不過歷史性嘅日子我哋可以定為17w6d啦，因為爸爸都一齊感覺到你郁啦～
前往其他懷孕扎記blog