以前住屯門市中心附近，淘寶呀、網購呀非常方便，送去華都嘅順豐站就ok～但而家住得遠咗，又時時帶住曉，出入冇咁方便，加上買啲大件啲或者重啲嘅嘢時，限時限刻專登走過去華都都有啲麻煩～

偶然發現原來我哋嘅屋苑都安裝咗順便智能櫃啦～

網購時填順便智能櫃嘅地址，同埋要求貨到付運費就ok lu～基本上同送去順豐站嘅安排一樣﹗貨到咗之後收到短訊，去個櫃度輸入資料，嘟一嘟八達通俾錢⋯

櫃門就打開啦～

可以好近咁帶心頭好返屋企真好﹗﹗

今次由台灣Mandy Shop訂嘅孕婦裝+小童用品，夾埋都厚厚一袋，運費好似都係$30左右，太好了～

不過如果淘寶的話就要小心唔好揀「淘寶直送」，因為佢用其他速遞公司送的話係去唔到順豐嘅目的地㗎，之前我就試過揀「淘寶直送」叫佢送去順豐站，結果到咗香港段佢話佢哋係圓通，順豐站唔肯收貨，我要專登去圓通嘅物流站取件，搞到好麻煩，一定要聯絡賣家揀「賣家直送」～

另一個limitation就係貨品嘅size，今次訂嘅衫唔算太bulky，可以放得入locker，後來我再訂個坐墊俾曉，尺寸太大，連最大嗰格都放唔入，唯有送去第二度囉～

anyway，有順便智能櫃係附近，多個選擇都係好事呀～

Comments

comments