23-7-2017:曉曉看電影之《反斗車王3》

2y3m嘅曉曉,其實今次睇《反斗車王3》其實已經係第三次入戲院睇戲啦~

第一次入戲院係啱啱1歲嘅時候(準確係1y15d,多謝時光小屋app),媽媽太耐冇去戲院睇戲,好想去下,戲院做緊《優獸大都會》,一心本住早場啲飛好平,萬一曉喊或者太嘈嘅話,要緊急離場都唔好太傷~結果曉播完片頭廣告之後就瞓著咗喎,由頭瞓到尾,我同day可以好安靜好順利咁欣賞咗電影~

第二次睇嘅係《星夢動物園》,我搵唔番exactly係邊一日去睇,照上映日期係2016年12月嚟講,曉應該大約1y8m左右,因為婆婆強烈推薦,入面有好多好好聽嘅歌,曉曉一定鍾意,話我哋一定要帶佢去睇下喎~今次曉曉有真正睇戲啦,佢果然好鍾意入面嘅歌,不過卡通片總會有緊張嘅情節嘛,緊張劇情時畫面黑麻麻,曉曉就係咁話要「出去~出去~」,冇辦法,做到好緊張我唔想離場但都要出去~乜嘢係返入嚟繼續睇嘅契機?就係--零食﹗買咗百力滋,一邊jap嘅時候曉就可以睇到完場了~^^”

我又心思思想去睇戲啦~

暑假檔期七月只有反斗車王同埋minions,其實兩個series我一集都未睇過~唔唔⋯兩者之中我揀咗車車,可能覺得壞蛋獎門人太壞?

其實兩歲嘅曉唔駛買飛住都得,但唔買飛俾佢就註定我要抱一個半鐘,買咗飛如果佢肯自己坐,我就可以輕鬆啲啦~以前冇留意,原來戲院有提供bb椅~今次做足準備,買定零食入場﹗佢開頭都ok呀,又係中段去到緊張位開始坐立不安,要爬係我身上,唔肯自己坐又唔肯望銀幕,呢個時候百力滋又出場,yeah~可以睇埋場戲+自己坐到尾﹗太好了~因為食咗零食,晚餐為咗食得輕鬆啲,決定去食曉最會自動波嘅壽司,又可以食多食少都得,太順利了﹗

原來曉都記得故事講咩㗎,今日打blog時已經過咗一個幾星期啦,我啱啱問佢嗰日睇戲套戲講咩,答到我「車車﹗」,咁架車係咩顏色㗎?「⋯」可能唔係唔記得,而係當初都唔知~

我都覺得套戲幾好睇喎﹗個結局好正~承傳後代比起個人榮耀更重要~不過呢個結尾嘛,恐怕做唔到第四集lu~

Comments

comments

發表迴響

你的電子郵件位址並不會被公開。 必要欄位標記為 *