20-7-2017:曉媽逛香港書展2017

老公對於超多人嘅書展唔太感興趣,加上今個星期六、日我都要閉關溫書預備下星期嘅韓文大考,我決定趁少人啲嘅weekday早上帶住曉去佢人生第一個香港書展--目標係10點入場﹗仲可以一張$10早晨入場票兩人入場添,下年曉夠3歲都要買飛入場啦~始終我大住個肚(雖然係變得精神、身體仍然輕巧嘅13w6d),我諗住,曉攰到唔肯行路我哋就回程,或者買得多到我自己覺得好重拎唔掂就回程,應該都ok啩?

出城﹗

細細個我已經同爸媽家姐去書展,但自從我哋都大晒之後都冇入去兒童天地了,但今次作為曉媽嘅身份,我目標只去兒童天地﹗10點鐘啱啱開門,人唔多呀,曉樣樣都可以親手試~

書展gogogo~

有套台灣數學教材我哋都玩咗好耐,難得言語唔通曉都可以同個台灣姐姐玩咗好耐,可能啲玩具太吸引了吧,有個天秤可以放法碼上去教小朋友數數、加減、比輕重,都幾好玩,曉居然都掌握到少少~我都覺得唔錯,但一系列8個單元,8套玩具+相關繪本幾十本,唔介意貴屋企都冇位放,而且我不嬲唔太buy用同一整套教材去教小朋友,寧願取材生活去學習,冇得淨係買一兩樣唯有全部都唔買啦~另外有一個教邏輯、語文、數學嘅教材曉都鍾意玩呀,我哋試玩嘅嗰頁,書嘅左邊有16格水果嘅圖畫,右邊有相應水果切開咗嘅圖畫+文字,小朋友就要配對兩邊,除咗比較少食嘅木瓜同埋綠色奇異果之外,曉曉全部都對到呀,好多仲講得出個名添(應該話,難得唔怕醜肯係外人面前講得出),估唔到佢未食過嘅榴槤都對到喎,可能係佢嘅拮拮外貌太特別﹗哈~呢套書咁熟口面,原來係之前表姐們留低咗係嫲嫲嗰邊俾曉曉嘅同一套嚟㗎,咁我哋當然運吉冇幫襯啦,同出版社嘅另一套我哋都試玩咗,但曉就唔係好掌握到了,因為要推唔同顏色嘅button去表達配對,我諗佢仲未掌握到用記號去代表一樣事物嘅概念吧,波就係波,書就係書,又點可以用綠點去代表紅色嘅波呢?

發聲筆已經係市面出現咗好耐,但我一直都未試過,今次帶住曉當然成為sales嘅target啦,我就純粹想試下,講真都唔打算會買,呢個階段我都唔想曉花太多腦力學英文單字,完全唔識講英文句子嘅情況識咁多單字做咩呢?我自己就真係要學多啲韓文單字,有冇教韓文單字嘅書+發聲筆賣?:p 之前一個韓文老師話,文法就好似手槍,單字就好似子彈,我哋而家讀完中級(2),大大話話都學咗六個學期,學過嘅文法同句式真係好多,但單字真係唔太夠,有手搶冇子彈都發射唔到出嚟~哎吔,講講下離題添,雖然我英文冇英式發音,但媽媽嘅英文都唔錯嘅,唔駛發聲筆教你啦,我教你就得啦~照計小朋友應該對發聲筆好有興趣丫,但可能因為sales係哥哥同埋叔叔(而唔係姐姐or姨姨),曉完全唔肯掂支發聲筆,我玩咗一陣我哋就走啦~

睇嘅書我今次就冇買,因為覺得故事書可以係圖書館借,除非真係鍾意得好緊要先需要擁有啦~我就買咗$100/4本嘅遊戲書,有曉最愛嘅貼貼紙又有得油顏色~之前上網買嘅Usborne貼紙書都有$100/4本呀,我買時$3x一本已經算好平了,書展真係仲平﹗今次可以mix and match,4本之中有兩本係Usborne出版,一本係Peppa,一本係ABC,呢啲書就係去旅行搭飛機搭船時嘅好幫手﹗

我哋兩母女玩咗一個半鐘多啲,曉居然咁快就冇電了,抱住佢要伏係度瞓覺﹗下?﹗我唔甘心就咁就返屋企,heehee,不如搵個地方坐低瞓醒再戰啦~

於是我坐低篤篤篤電話,曉就瞓瞓瞓叉電,一個鐘後又一條好漢﹗呢個時候金姨姨同奕朗哥哥都嚟到啦~可以一齊去玩~

玩咗個邏輯game,曉好有興趣呀,有好多塊透明膠片,上面有唔同顏色、形狀嘅圖形,題目書有好多幅圖案,原來要用兩塊或以上嘅膠片去砌成,仲要考慮邊塊係上面邊塊係下面,小朋友都要幾用腦~我覺得幾好玩呀,又鍛鍊下腦筋,不過貴咗少少,又怕好快玩到熟晒~見到呢個game曉咁有興趣,上次係澳門買嘅兔兔積木組合應該可以俾佢玩了,又係用幾塊積木去砌題目書入面嘅擺法,立體可能難少少啩?兔兔同積木我就知放係邊,但啲題目放咗係邊呢?如果太遲先搵得番出嚟就要留俾逸逸bb同fufu玩啦~同一個攤位奕朗哥哥都玩咗個三隻小豬嘅枱上遊戲,金姨姨都話唔錯,但都係太貴了~

之後有個長者義工機構嘅攤位,教整紙帽,我哋都坐低學整,當然都係媽媽整為主啦,曉嘛,明明應該focus自己嗰份勞作,但佢嘅視線一直望住奕朗哥哥嗰邊,搞到教我哋嘅auntie都好無奈~

曉嘅投入感不太大,完成後都唔肯戴頂帽,雖有我戴啦~

有點狼狽嘅「野餐」~

另一樣同奕朗哥哥一齊玩咗好耐嘅係kinetic sand,原來金姨姨屋企都有,但覺得玩完要收拾時太messy,今次呢個套裝有個吹氣兜好似橡皮艇咁可以局限小朋友只准係裡面玩沙,唔會太呢hea,同埋$129有好多沙同好多模,金姨姨都心動了,但成個set有5kg﹗要臨走先可以買~我哋早過佢走,原來佢後來唔夠cash買了,又唔收信用卡⋯太可惜啦~

點解曉曉仲高過奕朗哥哥?

搞搞震~

我本來都想買磁石框框積木,之前去新加坡嘅兒童美術館時玩過,但原來都賣得幾貴呢,$250得廿幾塊,又好似唔係好夠砌咁~之前上網見到好似平啲喎~

雖然話冇買故事書,又好多嘢都買唔成,但總算有啲收穫嘅~

到咗下午,曉都要抱得多咗,有得玩時唔駛抱,但行嘅時候佢唔係話「抱住~」或者「好攰~」,而係好醒目咁話「好高,睇唔到~」,哈,我同佢講「而家未有嘢睇,有嘢睇我抱你啦~」~原來最攰最攰係決定走之後嘅時間,其實曉都未必唔肯落地行嘅(雖然冇嘢睇冇嘢玩佢應該都冇乜鬥志),但我要趕住送佢返屯門,因為夜晚我要趕住再過海考韓文口試呀,所以要快,由Hall 3B抱到去巴士站都幾遠,好在到巴士站附近佢都肯行,上車當然又豬豬啦,一pat嘢咁抱佢係轉車站落車、等車、轉車先係最攰,好在返到屋企樓下已經醒晒,可以自己行到長長斜路了,媽媽揹住我哋嘅戰利品已經夠重啦~

雖然攰,但都好滿足呀~又有得玩又有收穫﹗下年書展fufu大約六個月大,我諗一定要同埋爸爸公公婆婆佢哋一齊去lu~

Comments

comments

發表迴響

你的電子郵件位址並不會被公開。 必要欄位標記為 *