19-7-2017:麵包機自家Pizza

曉未滿一歲時因為唔想佢食街外買啲麵包,嗰陣好勤力係屋企開機整麵包,不過只限加唔同材料入去嘅軟式麵包,提子乾呀、小紅莓乾呀、芝蔴粉呀等等,食得太多我自己都唔太有興趣~一歲後樣樣嘢都俾佢食,自此整麵包都開始懶,那管只係磅啲材料入去然後按個掣咁簡單,索性係出面買麵包俾佢食~

今次從新用番麵包機有兩個契機,一個係家姐想整麵包俾逸逸bb食想問我借麵包機(人哋想用我先想霸住⋯^^”),另一個就係連日嘅大雨困住我同曉兩個係屋企太無聊~係屋企冇嘢做,不如焗下嘢啦~

正式試新嘢之前焗多一次小紅莓方包,因為搵唔番Panasonic本食譜說明書,係網上左搵右搵,唔知係咪都係酵母落得少咗,唔係好發得起,不過曉都照大啖食不誤~

之後我想挑戰嘅係Pizza喇﹗

今日趁朋友上嚟屋企時整咗了~我用咗小魚媽嘅Pizza麵糰食譜:

http://an771111.pixnet.net/blog/post/38064303-%E3%80%90%E9%BA%B5%E5%8C%85%E6%A9%9F%E9%A3%9F%E8%AD%9C%E3%80%91%E7%91%AA%E6%A0%BC%E9%BA%97%E7%89%B9%E6%8A%AB%E8%96%A9

真係好簡單,將材料量好,放入麵包機用Pizza麵糰programme,45分鐘就整好個麵糰了,拎出嚟比我想像中黏,唔係咁容易擀成自己想要嘅形狀,我求其按成焗盤嘅長方形就算了(我知道求求其其係唔會整到驚世美食㗎啦⋯),今次我落咗蕃茄醬、粟米、菠蘿、火腿、蝦、車打芝士,都幾豐富㗎~放入預熱好嘅焗爐220度焗15分鐘就搞掂lu~好味~send張相俾老公睇,佢嘅反應係「哇~似模似樣﹗」,heehee,味道都好好㗎,下次可以再整﹗不過真係新鮮出爐嘅最好味,朋友嘅小朋友食咗好多,但曉食咗唔係好多,點解?因為我今日除咗整pizza之外仲整咗沙律,我一路切切切沙律嘅材料時,佢坐係我旁邊,「我要食呀~」,所以佢食咗一隻烚蛋、勁多薯仔同埋勁多桃囉~亦因為咁,朋友食沙律時話:「乜有落薯仔咩?」umum⋯曉都算有捧媽媽場嘅⋯下次再食多啲Pizza啦~

Comments

comments

在《19-7-2017:麵包機自家Pizza》中有 2 則留言

發表迴響

你的電子郵件位址並不會被公開。 必要欄位標記為 *