12-7-2017:細bb懷孕扎記12w5d.嚇餐死之初次產前檢查

我以為今次唔會再為一次產前檢查而打一篇blog,話晒整個flow我都已經經歷過,但今日嘅經歷實在太特別,要好好記錄~

因為係冇咁緊張嘅第二胎,我都冇叫老公陪我去產前檢查,反正上一個星期做Down screening時都睇過超聲波了,今次健康院嘅檢查除咗可以陪下我之外對佢嚟講冇乜特別趣味啦,加上呢排佢返工忙,要請假都留第時有重要事嘅時先請啦~知道要花一個上晝,我有諗過搵曉曉陪我,但佢醒醒目目時係可以絕對陪到我,但如果扭眼瞓就大鑊,抱住佢行出行入又唔方便,瞓上床檢查都做唔到,我都心大心細,但唔好彩嘅係曉又係產前檢查前夕發燒病倒了,註定冇你份啦,麻煩婆婆一個上午了﹗結果陪伴我嘅係⋯Soda Crush﹗雖然我帶咗韓文書去,企圖可以溫下書,哈~

我今朝最囉囉攣嘅係驗小便嘅問題,因為唔記得咗一早要預備個樽,結果諗咗好多方案,結果係屋企搵咗個舊藥樽洗乾淨佢嚟裝,有啲論盡,哎吔吔,下次都係要一早預備好~度高、磅重、量血壓、驗小便都正常,但見姑娘話我「瘦咗」(比起懷孕前),所以平時係六個星期覆診嘅,而家就安排咗四個星期~但另一件事係,因為我「超重」,所以要24-28週做飲糖水測試~即是我又係肥又係瘦囉,咁嚟緊食嘢要食多啲定食少啲??

個別見姑娘前有個迷你講座,簡單講下啲初生照顧嘅嘢,主要講要多同bb做肌膚接觸、要積極回應bb需要、同埋講少少餵人奶嘅嘢~唔知係大家怕生唔答問題丫定真係未諗好?只有我同另一個第二胎嘅媽媽答姑娘會餵人奶,其他人姑娘問時都冇出聲~其實餵人奶係最自然嘅事,雖然係今日嘅香港、特別係在職媽媽要餵得耐真係唔容易,但大家要加油呀,個個人都會做得到㗎﹗我?個別見姑娘時問到之前餵人奶嘅經驗,我話餵到陀呢胎至停,餵到兩歲幾,姑娘都讚我呢~:D

之後見姑娘問番啲history呀嗰啲都正正常常啦,見醫生時本來都好順利,但⋯瞓上床檢查時⋯用doptone搵唔到fufu個心跳﹗﹗﹗醫生都搵咗好耐,間中聽到嘅脈動都係我自己好慢嘅聲音~但佢睇落又好淡定喎,話之前開過刀個疤痕都會阻住,加上肚皮厚都會難啲搵,可能呢啲事真係成日發生,佢問我約咗私家醫生幾時,冇約喎,但即使要睇通常都冇得即刻睇嘛,佢寫信介紹我去急症室照~點解事情會變成咁㗎?﹗雖然呢件事有啲驚嚇,但我自己當時係張床上面我都覺得係搵唔到而啫而唔係冇心跳嘅,一個星期前先照過正正常常,呢啲週數好少會無啦啦唔得㗎喎,仲要我一啲症狀都冇﹗﹗個肚子又有慢慢大緊~我以為會照清楚先繼續接住落嚟嘅步驟,可能佢哋真係太多呢啲情況,醫生話照抽血、照約期、佢又照開維他命丸俾我~我好心急好心急想快啲去照時,仲要等一輪丫~

原本係健康院等候時我都好鎮定,好冷靜咁打電話同day講呢件事,但費事媽咪佢哋係屋企乾著急,我都唔通知佢哋我要去醫院住,除非去到真係要等好耐啦~但我離開健康院出發去醫院時就開始感到孤獨,諗到要一個人去面對就好傷心,打電話俾老公,聽到佢把聲就即刻喊咗出嚟,佢話即刻返嚟陪我,好呀好呀,要呀要呀~

但估唔到去到急症室真係咁快有得睇,分咗我係cat 3,上次曉甲型流感入院發燒40.8度+氣喘都係cat 3,但都等咗大半個鐘先見到醫生,今次我分流之後諗住去一去洗手間,未排到我去就聽到我個名,叫我入去急症室比較裡面嘅房度等叫名,去到裡面諗住去洗手間,又未排到我去又聽到叫我個名,真係好快﹗醫生好專業又好友善,馬上帶我入超聲波房,簡單問咗必要嘅資料之後就照啦,放個probe落去好快就見到+聽到fufu嘅心跳了﹗﹗﹗太好了~果然係doptone太渣~睇完醫生要等埋啲文件先走得,我搵番day時,佢原來去到美孚,冇事啦,你可以返去返工啦,多謝你,你真係好重要呀~

下次16w再做產前檢查時一定要搵到心跳呀﹗﹗同日下晝五點幾時接到一個245字頭嘅電話,未聽電話時有少少驚,上星期做Down screening話兩個星期冇接到電話就正常,245字頭分明係屯門某處嘅固網電話啦⋯原來係今朝健康院醫生打俾我﹗問候我嘅情況,咁好嘅~~仲有一件事,係補番講我體重過重,遲啲要飲糖水嘅事⋯唔⋯超重我就不嬲都知㗎啦﹗唔該晒~^^”

p.s.點解有時間打blog,又係半夜三更瞓唔著嘅時候,病病豬嘅曉曉凌晨一點幾嘔咗一次,爸爸幫佢沖涼,我就換床單呀搞一大輪,成個人醒晒無睡意,打blog比起soda crush productive得多吧~

前往其他懷孕扎記blog

Comments

comments

2 關於 “12-7-2017:細bb懷孕扎記12w5d.嚇餐死之初次產前檢查” 的評論

  1. 我昨曰聽你轉述時還以爲真的是急症聽唔到心跳即刻去急症室,點知竟然係抽埋血拎埋維他命仲有埋轉介信。

發表迴響

你的電子郵件位址並不會被公開。 必要欄位標記為 *