凌晨三點幾係度打blog，都係因為你啦fufu，今次懷孕第一次因為胃酸搞到瞓唔到，屋企又一粒藥都冇，飲咗杯奶，而家休息一陣打下blog啦～陀住曉時我啱啱轉返part time，日日都有好多時間，又只需要照顧兩個大人嘅屋企，其實真係好正，又可以去做孕婦瑜珈，又可以去做按摩，又可以成日打blog，講緊嘅係每一件小事都可以打一篇﹗﹗難怪陀住曉可以打總共81篇懷孕扎記﹗今次應該難啲啦，打得blog都係要趁曉瞓覺時先有機會，睇下遲啲九月開學之後我會唔會有多啲自己時間啦～
屋企自己驗到有fufu時叫做4w6d﹗
其實我都有少少預感啦，除咗遲咗未嚟M之外，曉食奶奶時我都覺得乳頭有啲痛，而且尿頻得好犀利，驗到有時都係又開心又擔心，一來擔心fufu長唔長得大啦，二來曉又仲食緊奶，其實呢方面我都好擔心，繼續俾佢食我又怕影響個胎，唔俾佢食我又怕佢會喊得好犀利，好在停奶方面真係好順利，曉大個女了(請參閱：24-5-2017：半熟手媽媽25m．媽媽奶辛酸史(八)之離乳故事－90%自然和10%推波助瀾)～不過最心痛嘅係曉病咗入院我有咗bb唔可以係病篇陪佢﹗今次冇食中藥保胎，又成日要「搬重嘢」(帶住12kg出街唔係講笑的)，湊住曉都冇乜可能成日有得休息，我又俾曉傳染到自己都病咗一排，好在fufu好爭氣乖乖成長，你要順利足月出世，健健康康加入我哋嘅家庭呀～
擔心嘅嘢6w都係出現啦，又係討厭嘅流啡，呢方面我實在經驗太豐富，今次我連問都冇問婦產科嘅同學仔了⋯其實今次嘅first trimester好多咗day都話「曉嗰陣你都係咁㗎」，包括流啡(呢個我都記得⋯)，令我比較放心同埋樂觀嘅，除咗冇肚痛過，流啡嘅量唔多唔算好紅之外，最重要嘅係「悶悶快樂」出現了﹗﹗曉時我基本上都冇乜點嘔，主要都係作悶，係飲咗中藥受刺激先會嘔，後來中醫師同我調整咗個藥方之後都唔會嘔添了，今次都係純粹作悶，不過可能太忙，成日都話要買梳打餅，結果都悶嘅日子過去晒都冇買到～其實主要都係餓得太犀利時會明顯啲，食少少嘢又會ok啲～今次又冇話特別怕啲咩味道，曉嘅時候好怕聞到啲人工嘅香甜味道，我特別怕經過啲台式飲品店同埋雪糕店，要兜路行，今次又冇事喎，到接近三個月時胃口仲好好添，成日都想食肉同埋啲濃味嘢﹗係咪fufu喜歡比較重口味？
8w1d時我哋第一次去睇咗私家醫生，見到fufu嘅心跳了﹗放下心頭大石～
曉曉望住個mon時個表情好似一舊雲咁，你知唔知道自己睇緊啲咩？
到12w先打到blog嘅原因，最主要都係我成日都好眼瞓，應該由8w左右就開始，日間可以兩次小睡，而夜晚九點幾陪曉瞓覺之後我直接留係佢張床度瞓天光﹗日間嘅睡意係話嚟就嚟，點都抵擋唔到嗰隻，好在返工時嘅adrenaline可以頂得住﹗曉而家已經習慣咗我同佢玩玩下突然間要瞓覺呢件事，我係梳化度呼呼大睡時，佢會自己睇書或者玩，或者摷晒箱入面全部嘅玩具出嚟，可能好嘈又可能好靜，但我矇矇矓矓之中，知道佢間歇性會瞓係我身邊幾秒，黏一黏住我一陣，之後又再去玩過～瞓一覺又精神番啲﹗最近變番正常少少，陪曉瞓覺後都有機會出得番嚟同個老公傾下計，而而家日間都係一次小睡啫～呢個瞓覺問題其實都會引伸其他問題，因為平時習慣食完晚飯休息多陣先食生果，但而家成日唔小心陪曉瞓天光，搞到食唔到生果，原本大肚就已經容易便秘，食唔到生果就更唔暢通，哎吔吔，我要改同曉一齊下午茶食生果啦～
今次覺得個肚好早就好突同埋啲褲好快就好緊，所以9w都未到我就上網訂咗兩條孕婦leggings，好在而家有經驗，唔駛兜遠路買啲唔合心水嘅嘢，平平地著住先啦～除咗著衫嘅問題之外，我自己硬係覺得未夠三個月唔應該見肚，所以見人時會忍唔住縮一縮個肚，辛苦啦fufu～而家可以堂堂正正突個肚出嚟啦，我覺得個shape都唔係完全肥腩肉丫，哈哈～
自從知道有bb之後，我就唔敢用hip seat揹帶了，怕箍住個肚，好在曉都好肯自己行路，同佢講「你好重啦，媽媽冇力」佢就會話「爸爸有力」，所以得我同佢兩個人時佢確實行多好多路，只係眼瞓時、過馬路/路況危險時、趕時間時我先會抱耐啲，但呢排佢有少少abuse爸爸嘅抱抱囉，有爸爸係度就扭抱抱同扮眼瞓丫﹗﹗視乎情況啦，爸爸又好想抱又唔攰咪「兩情相悅」由得佢囉，但啱啱起身又食飽飽就真係nonono啦，要自己行丫～曉，你做得到﹗因為有一次帶咗hip seat出去俾爸爸用，結果曉都唔肯坐，要離pat抱住，所以而家曉叫做撤底「戒」咗揹帶啦，可以嘅話盡量配合行程同埋佢眼瞓嘅時間啦，行住路時抱佢瞓就要盡量避免啦，即使爸爸係度都係咁話啦～
啱啱嘅星期四11w6d，係公立醫院嘅Down screening，我哋又有機會見到fufu啦，今次嘅佢唔再係一團白色嘢，見到頭仔手仔腳仔啦，佢仲有好活潑咁伸下手腳添～滿咗三個月，可以公告天下啦，今次由曉曉公佈，幾好丫～
曉家姐而家已經好有家姐嘅自覺了，成日都會指住我個肚話「bb係呢度」跟住錫錫佢，又會講「我好鍾意爸爸、媽媽同bb」，間唔中又會話「我做家姐啦」～佢會隔住肚皮同佢玩o-zak，又話第時要幫手換片同埋奶奶﹗希望第時真係生性嘅曉家姐啦～睇呢本書時我問佢你有冇妹妹，佢就指住我個肚﹗曉，可能係弟弟或者妹妹啦～佢話「冇所謂」～:D
前往其他懷孕扎記blog