26-5-2017:半熟手媽媽25m.Bebemo環保尿布用後感

其實想打呢篇blog好耐,不過一直積咗好多blog未打,未有耐輪到呢個題目,咁啱有位blog嘅讀者係懷孕扎記度問起用後嘅感想(請參閱:10-3-2015:懷孕扎記33w3d.we are ready之Bebemo環保尿布),我諗都有好多準備用尿布嘅準爸媽好想睇下其他用家嘅意見嘅,我不如都係正正經經打篇blog啦~

(攝於1歲3個月10天)

以前明明成日都係屋企著片唔著褲㗎,點解咁辛苦都搵唔到一張相影得靚嘅?而家冇可能影到齋著尿布嘅相啦,一來媽媽唔會影,二來一著好片曉就自己會話要著褲~

我大肚時已經plan環保啲盡量用尿布,不過現實總同理想唔一樣~就如sales姐姐所講滿月可以開始用,曉曉一兩個月大時有試用下,發覺要摺到好細先fit到,變成未濕都大大舊片咁,有冇尿尿都好難分,又唔似得紙尿片咁有尿濕顯示,最大問題係母乳bb嘅屎屎太稀,次數又多,好容易係邊位漏屎,結果用咗冇幾多次就放棄咗,隔幾個月再試下,效果都係唔太理想~幾時開始變成又再用番呢?仲要恒常地只要係屋企就用?全靠Mandy係Facebook 2016年5月10日嘅post囉,佢post咗一張相係窗邊晾滿咗洗乾淨嘅尿布,令我的起心肝再次起動﹗﹗呢個時候曉已經著緊L碼片,再次著起Bebemo尿布時,個片殻已經唔駛摺疊,就咁啪鈕就ok,而家用時又順咗好多,所以可以經常用啦~令大家用易啲明白,我不如分開唔同層面去講我嘅用後感啦~

1.舒適度

對於曉嚟講,佢對於著紙尿片同尿布完全唔會揀擇,到而家25m都唔會表示prefer邊一樣多啲,似乎舒適度唔會有太大差別,行動亦一樣迅速,那管而家我已經幫佢放double片芯變厚咗好多~曉由細到大皮膚都算幾好,佢除咗好早期試過三兩次短暫紅pat pat之外,著紙尿片定尿布佢都唔會出尿疹嘅~關於舒適度值得一讚嘅係,片殻內層真係幾好,即使入面嘅片芯已經濕到透晒,片殻嘅內層表面(即是貼住pat pat嗰邊)都好乾爽~不過有時怕著得唔夠貼,啪鈕啪咗入啲嗰粒,可能會箍到大脾仔有條紅印,當然隔一陣就會消退啦~

2.吸水力

Bebemo嘅吸水力好視乎毛巾質地嘅片芯嘅清洗次數,初初新嘅時候唔太吸水,但洗過嘅次數越多就越吸水,吸力我覺得都ok,通常爆片都係因為督尿真係太大,片芯已經不勝負荷居多~

3.爆片機率

爆片都真係間唔中就發生,呢個真係事實~食咗某啲食物,例如火龍果同藍莓,啲便便特別稀又大督就有機會爆屎片,當然著紙尿片都一樣會有機會發生啦~又例如我個女疴咗屎屎之後唔出聲,然後周圍郁又周圍坐,咁又容易爆屎片了~尿片嘛,因為唔同紙尿片有尿濕顯示,亦唔似得紙尿片未濕之前好薄,尿尿咗之後會變厚,可以容易摸得出~尿布本身厚,表面唔太容易觀察有冇疴尿同埋疴咗幾多,所以要計住時間換片,兩個鐘叫做差不多嘅interval,但有時真係飲得多水有機會一個半鐘就疴好多,咁你兩個鐘先換就會太遲~有時阿女經過我前面聞到少少尿臭味,亦代表疴咗出嚟有相當時間+相當份量,表示要換片了~之前一直用一塊片芯,但到一歲半左右吧(確實幾時唔太記得),成日都爆尿片,我決定幫佢放double兩塊片芯,咁爆尿片嘅機率又降低咗啲,但而家又再大個啲,啲尿大大督,可以兩塊片芯都完全濕透㗎~

4.清洗簡易度

尿的話我哋會用清水浸住,屎的話就先用梘洗乾淨表面污漬再用梘水浸住,然後儲埋一堆就一次過用洗衣機嚟洗~因為有隔便紙(一張竹纖維嘅薄片),大多數便便可以接住再丟掉,手洗屎屎片時感覺冇咁難堪,確實大B啲屎係好臭,要洗屎片係增長咗聞屎屎嘅時間~

5.價格

雖然話成set嘢要過千,但紙尿片其實真係好貴,仲要越大碼數越貴,學習褲就仲貴,而家著嘅L碼紙尿片要$2-3一塊,小數怕長計,每著一次尿布我都要暗暗開心,話俾自己聽慳咗$2-3囉~不過如果要墊隔便紙的話又有番成本了,為起上嚟都要$1一塊,而家曉通常一至兩日去一次大便,就估佢會唔會開大而盡量唔用隔便紙,有時估佢唔到而一日開兩次大就真係冇辦法了~嗰陣買嘅即棄片芯大家千祈唔好買啦,第一我覺得個即棄片芯嘅吸力冇毛巾布片芯吸力咁好,有時都盛載唔晒一督尿,出街爆片的話濕埋面褲,咁要帶幾多條褲先得?我覺得要是出街都堅持用尿布就索性用番毛巾片芯,如果冇咁執著嘅就好似我哋咁出街用紙尿片算啦,本身帶個B出街已經拎得夠多嘢~

6.耐用度

我哋有成日用尿布到而家叫做一年多啲啦,當然,我都成日帶個女去街會著紙尿片,我返工嘅日子(一星期兩日)去auntie度時都係著紙尿片,夜晚瞓覺會著紙尿片,其他時候留係屋企時會著尿布嘅,到而家啲片殻都品質保持良好,我頭先講過啦,片芯就越用得耐越好,所以都keep得唔錯~如果生第二胎的話都可以繼續用,不過嘛,曉嘅片殻咁girly,如果生個仔嘅話,用玫瑰花片片會唔會太feminine?

Comments

comments

在《26-5-2017:半熟手媽媽25m.Bebemo環保尿布用後感》中有 2 則留言

  1. 如果以成本計,隔便紙真係幾貴喎,其實我一直無用,佢大個咗啲屎屎無咁稀,喺片殻都好容易倒落廁所沖咗,除非真係太黏就洗得難堪啲囉~

    • 係呀,但即使係而家啲屎都成日好黏㗎喎,當然可以本住「唔用就完全免費」嘅心態,核突都照就咁洗,不過之前買落咗就用啦,如果再生多個嘛,用晒存貨之後再買唔買就到時再算啦~

發表迴響

你的電子郵件位址並不會被公開。 必要欄位標記為 *