呢篇blog面世時我諗曉曉應該有27m了，因為唔可以泄露秘密住，即使打好都要save落draft度⋯希望呢篇blog唔需要edit就可以完整推出啦～
最最最最最初如果問我想餵咩奶，我0.01秒就可以答打算餵人奶，最好係全人奶唔需要補奶粉，但如果問我想餵到幾時，我其實冇乜idea，可能因為太多人因為種種原因放棄吧？我都冇乜聽人講餵到幾時功成身退，而比較大多數嘅係不得已嘅放棄或者無疾而終，我記得我有答過某人「一歲吧？一歲咩都食得，咩奶應該都冇乜所謂，唔駛辛苦咁耐啦～」我唔記得係咩場合答同埋唔記得問我嘅人係邊個了～雖然我係醫生，我只知道世衛建議餵到兩歲或以上，但我未成為母乳媽媽之前其實只認為「母乳=最有營養嘅奶」，以前讀書時講到甚麼餵母乳可以「增長親子關係」，我覺得只係「講係咁講啫」，增長關係有好多方法，餵奶唔係唯一方法吧？而令我有改變嘅係join咗Facebook母乳group「媽媽牌同盟」，令我希望餵到自然離乳﹗
而曉曉出世時確實餵得唔係幾順，又啜損乳頭勁痛，仲搞到全泵過一排，泵奶又要追奶，每兩個半鐘要泵一次都幾辛苦，話雖如此，我總算一直全人奶，之前人哋俾我stand by嘅兩罐奶粉結果全部完整再轉送俾其他人～到後來返工又要拎勁多嘢去泵奶，個背囊一定要依指定嘅次序放嘢落去先放得晒，好想呢段泵奶嘅日子快啲結束～到一歲喇，掛泵喇，只轉早晚埋身喇，原本諗住輕鬆好多，但可能奶量少咗，特別係嚟M時，有時夜晚要左右左右來回啜5-6次先夠皮，我好記得佢嗰陣要「丫邊～(另一邊)」，我側躺咁餵都瞓到腰酸背痛，有時啜得好狼死咁大個b都會啜到乳頭起水泡，一出牙嗰排夜奶又會增加次數，我都一直都期待佢快啲自然離乳～到咗19m-20m左右？曉唔駛再食夜奶了，我哋買咗大人床褥俾佢打地鋪唔再瞓bb床，佢半夜扎醒唔駛奶奶再重新入睡了，我走過去佢張床陪佢瞓一陣，同佢講「而家唔食奶奶住，太陽伯伯出嚟先再食奶奶～」，佢又跟住講「太陽伯伯出嚟先食～」，攬住佢就可以就咁重新入睡，唔再食夜奶令我輕鬆得多，我唔再介懷佢幾時離乳了～大概22m-23m左右？朝早開始間中唔記得食奶，醒咗之後明明得我哋兩個係度，又唔趕時間要做咩佢都完全冇提起想食，只要我陪佢睇ABC/動物(床單上嘅圖案)，另外嗰排成日掛住講嘢，夜晚求其啜三兩分鐘就離口然後不停講嘢，有時甚至啜得一分鐘都唔夠，我以為佢差唔多離乳了，等待緊呢一刻嘅出現～不過與此同時，曉嘅日間嘅瞓覺pattern開始轉變，由標準嘅一日兩次小睡(上午一覺下午一覺)慢慢轉化成一日一次小睡(午飯前或後都有)，佢日間只瞓一覺時，夜晚就特別快攰，又變番好似細bb咁成日啜到瞓著，我又覺得佢冇咁快離乳了～
自然離乳講嘅係小朋友自己變得獨立，唔需要依賴媽媽嘅乳房作為安全感，係成長嘅一大步～離乳嘅年齡有大有細，我見媽媽group入面佢哋嘅經驗，好似大多數嘅小朋友食到兩至三歲，早嘅未夠兩歲就離乳，而有啲就四歲幾都仲有食緊～
轉捩點係我哋期待細佬妹嘅計劃，我其實好希望好希望曉自己唔食，然後有細bb咁就最順利喇～以前讀書時講「媽媽懷孕的話，奶嘅味道會轉變，大b會自己唔食～」，書本係咁講，媽媽group入面嘅媽媽都話自己試過，奶味會變鹹/好淡，確實有啲大b會自己唔食，有啲就啜下啜下冇晒奶(懷孕會令乳汁分泌減少)就唔食，但亦有唔少大b會食到細b出世，然後大細一齊餵～雖然話，如果懷孕過程順利，冇出血冇宮縮冇不適，其實係可以一直餵的，但我自己冇乜信心可以完全冇事，而且每啜一次都會心驚肉跳，個心形住形住就唔宮縮都覺得小腹會唔舒服，所以呢幾個月以嚟，嚟M都好似有少少釋放咁，好啦，俾多曉一個月機會自然離乳啦，但另一方面我又期待有細bb～
今個月，要面對嘅終要面對，細bb嘅出現我哋當然好期待啦，驗到有嗰一日係星期四，本來星期四晚我就要返韓文班比較夜返，曉有時會等我門，我一返到去，俾佢啜幾秒就瞬間倒下，有時攰得滯就會瞓咗，我就會由得佢瞓天光，咁啱呢晚佢就瞓咗了，我又鬆一口氣～要返工嘅星期五早上，通常都趕住出門口唔會食奶，曉仲瞓到迷迷糊糊我已經幫佢換好衫準備出門口去葉太度，我又鬆一口氣～
放工去接曉，路上我同佢講不如唔駛食奶瞓覺啦，同佢講媽媽而家少奶咗，你又難啜咗，你而家大個，細細力啜媽媽都會痛，不如我哋同北極熊三個就咁攬住瞓啦～佢居然爽快地一口答應﹗﹗﹗「唔食奶奶瞓覺好唔好呀？」「好呀﹗」我隔多一陣傾下其他嘢之後再返嚟呢個話題，佢都冇改過答案，「好呀﹗」「唔食奶奶瞓覺﹗」「攬住北極熊瞓覺﹗」我真係又驚又喜，心諗，做到先算啦～到沖完涼先係關鍵嘅時候，抹身著衫時再講，佢好似有少少猶疑，瞓到落床就話「要食」，我再重覆日頭嘅對話，佢又ok喎，完全冇喊過完全冇扭過要食，雖然係碌咗成個鐘先瞓得著(另一方面係少有地呢日係姨姨屋企瞓咗兩覺)，但總算成功地冇食奶奶就瞓著﹗﹗第二日我又重覆幾次，到晚上佢主動講「唔駛食奶奶瞓覺﹗」入睡嘅時間係長啲，但感覺已經成功在望了～
但離乳嘅第三日曉就病咗了，有發燒同咳咳，病緊嘅佢好攰好攰，晚上直情就咁放低就自己瞓著，攬住都唔駛～我諗曉真係正式離乳了，細個病嘅時候胃口唔開淨係想食奶奶，今次病到冇胃口佢一次奶奶都冇提起過，當然我都唔想俾奶奶佢啦，維他奶就有⋯但到咗星期一晚(即離乳第四日)病情嚴重咗，瞓覺時發高燒時有stridor(喘鳴聲，即大氣管收窄嘅聲音，同哮喘或小支氣管炎嘅wheezing/hee hee聲唔同)，到之後嗰日(離乳第五日)stridor仲嚴重咗，曉咁耐未試過發燒40.8度，仲要失晒聲，我問過兒科嘅同學仔，既然係似croup都建議佢去醫院食一劑類固醇(關於croup)，上到去兒科隔離病房，懷孕嘅媽媽－－唔－－准－－陪－－小－－朋－－友－－留－－院－－﹗我即刻喊咗出嚟，之前冇諗過呢件事，我只諗到我自己都咳咳地，捱夜嘅話可能會病得嚴重啲之類～我都唔知呢幾日曉冇食奶係好事定壞事，今次病冇媽媽奶嘅抗體幫佢手，打仗要靠自己了，但因為冇再食奶，住院時由爸爸照顧佢都唔會扭奶﹗(呢篇blog就係曉曉住院嘅第二朝五點幾時打，媽媽扎醒咗掛住個女瞓唔番⋯我未試過自己一個人瞓呢間屋，好掛住佢哋兩父女呀～)
對於曉曉嘅病情我都唔係太擔心，因為診斷明確，入院有適當嘅治療就應該慢慢會好，但冇得陪住佢我真係好傷心，爸爸話我出咗去之後佢喊住媽咗成個鐘，一激動心跳就上到一百九十下(因為要駁住pulse oximeter)，搞到部機不停beep，聽落又心痛又搞笑～我心入面嘅諗法係，細bb要爭氣呀，一定要健康成長呀，曉家姐犧牲咗咁多，為咗你佢冇得食奶奶，一冇食奶奶就病，病到咁嚴重都冇得食奶奶補一補，住院仲要同媽媽分開，如果細bb健健康康，犧牲都值得啲，如果你長唔大曉曉就更慘了～百感交集中⋯
等曉曉出院好番晒，我哋去買玩具啦，媽媽應承過你，成功唔食奶奶就送份禮物俾你，曉，你想要咩禮物呀？
==============
今日update呢篇blog時，曉已經27m1d，而細bb已經係肚入面12w2d了，已經公告天下我哋嘅好消息，呢篇blog都可以出爐啦～
結果細bb 6w時有啲流啡，我其實無論點都一定要停餵啦，咁樣，我同曉有商有量咁停，點都好過有事時我好心急又好心痛時唔俾佢食丫～
anyway，第一胎人奶路功德完滿，希望第二胎順順利利出世，bb健健康康，繼續奶路亨通啦～