3-5-2017:佛誕假期再戰城門水塘

行城門水塘一圈嚟講對於行山嘅人真係簡單得不得了嘅路線,但對於帶住b嚟講都算係適中嘅親子路線,曉曉18m時第一次行山就係去城門水塘(請參閱:10-10-2016:重陽登少少高之曉曉第一次行山@城門水塘)~今個佛誕假期天氣唔錯,我一早就約好老公一齊去行山,提起呢件事時我爸媽同家姐姐夫逸bb佢哋都可以join呀~就路線問題上有好多考慮,有同事提議行青衣,話啲路都起得好平整,一家大細應該都啱,但爹爹話樓梯多怕膝頭痛,結果我哋都係決定再戰城門水塘﹗

上次因為係重陽假期,個個都想登高,而且重陽係勞工假而佛誕只係公眾假期,果然人真係少好多,上次係荃灣等小巴打晒蛇餅,我哋直接選擇搭的士,今次就等三架車左右就上到了,慳番唔少~good﹗

今次我哋帶兩個b去,雖然7m嘅逸bb要抱全程,但佢細細粒又冇咁重,用hip seat揹住都還好,其實更大風險嘅係差唔多25m嘅曉囉,因為佢唔肯行的話,我同day就要抱住12kg嚟行﹗佢肯行係值得嘉許,但我哋進度又會勁慢,所以我哋講笑話「佢唔行就攰死,佢行就餓死﹗(因為天黑都未落到山﹗﹗)」>v< >v< 為咗唔好餓死,我哋出發前梗係買定乾麵包啦~

出發初段嘅樓梯級憑住鼓勵,曉都行咗上去,但上到去嘅泥地佢就唔肯行了,呢個城市人⋯^^”不過嘛,再觀察多一陣,似乎唔係城市唔城市嘅問題,估唔到佢大過逸逸bb咁多,居然比佢更早瞓咗第一覺囉,梗係啦,媽媽用揹帶抱住行路喎,真係難以抵擋嘅睡眠邀請~

去到呢個必影景點時曉已經瞓咗lu,逸逸bb仲好精神咁擺pose﹗

靚靚水塘景都冇份睇~

曉瞓醒之後吸引佢落地行嘅係執樹葉﹗綠色、啡色、黃色樹葉,仲有心形樹葉,大樹葉、細樹葉﹗佢執得好開心,又執嚟送俾我哋,自己又拎住一大堆~

開心執樹葉

一人有一塊

仲有帶佢睇下唔同嘅昆蟲動物,螞蟻啦(要講「好似Zoe咁」,Zoe係佢常睇嘅一半書,入面講Zoe睇螞蟻食麵包嘅碎屑)、蝴蝶啦、蜻蜓啦、百足啦,城門水塘最出名嘅馬騮,估唔到今次成個trip四個鐘只見到兩隻咋喎,唔知發生咩事?明明上次半年前嚟都仲有好多㗎~當然唔係自己行好多啦,路上都靠爸爸抱好多,仲有婆婆好落力同佢玩同佢睇嘢~

全靠有爸爸﹗爸爸抱仲可以抱住企添~

另外嘅趣事係,最近曉曉同逸bb多咗interaction,曉一見到逸bb就同佢玩「o-zak」,而最近逸bb一開心就會踢腳腳,曉曉見到就會叫佢「再嚟多次」,我哋就話可以隨時踢俾你睇啫,要逸逸bb「再嚟多次」就要睇下你自己功力同佢佢嘅心情啦~

食嘢時間,逸bb都有份食方包,而曉曉就幫公公食咗好多嗰個俾水樽壓扁咗嘅大咸餐包,令公公唔駛咁眼寃~:P

一齊坐低食包包~

包包好味~

兩母女開心自拍~

去到主壩當然要嚟個大合照啦~

曉,你呢個係咩表情?

到尾段都係抱到落山啦~不過兩隻嘢一上到小巴有得涼冷氣即刻醒晒﹗

正常大人三個鐘頭完成嘅路程,我哋慢慢行、食埋嘢、又經常休息行咗四個鐘都算好叻啦~

行完當然要飲下寶礦力獎勵下自己啦~

下次再去行山啦,要發掘下新路線﹗

Comments

comments

2 關於 “3-5-2017:佛誕假期再戰城門水塘” 的評論

  1. 一家人去行山,是最佳的家庭活動,也是給大人和小孩的最佳鍛鍊。(有人以為與孩子一起去,只是為了鍛錬孩子,其實大人也得找緊機會去鍛鍊,跟孩子去另有樂趣,有說有笑,又玩又走,也不覺那麼累。)

發表迴響

你的電子郵件位址並不會被公開。 必要欄位標記為 *