30-4-2017:橫琴長隆海洋王國day 2.緊湊的下半集

雖然話係兩日一夜,其實可以玩嘅都係一個黃昏至夜晚同埋一個早上加午餐,因為要晚飯前返到香港嘅話,下晝就要搭接駁車出返去珠海九洲港了~

曉曉專用床欄,幾好用~

梳洗好,當然係食個靚早餐先啦~

DCIM100GOPROGOPR0130.JPG

曉你就輕鬆啦,唔駛出去衝鋒陷陣~一心諗住早餐比起晚餐簡單好多,今日嘅自助早餐應該食得輕鬆少少,實際上都係容易啲啲嘅,起碼每個station唔駛排隊排咁耐,但緊張嘅感覺依然不變,曉就易話為啲,佢?食包包包食飽﹗麵包station好輕鬆,我隨便夾咗啲返嚟,兩個甜餐包就俾佢一個人食晒﹗我就比較喜歡中式嘅粉麵,好在都成功食到~最吸引人眼睛嘅係周圍嘅枱嘅人都豪邁地諗酸奶,唔係一人一樽嗰種,而係一pack四樽黐埋一齊一樽一支飲管咁飲,我見到呢個光景就話要買伊利牛奶嘅股票,一日嘅區區珠海長隆企鵝酒店已經消耗咁多酸奶,全國嘅銷售量咪嚇死人?﹗day就話邊度有咁多隻牛可以提供咁多酸奶呀?﹗我哋對面嗰張枱有個細路唔知係咪飲得太多酸奶,嘔咗係阿媽身上﹗>.<“個仔嘔落自己身上本來都未必火滾,但細佬嘔時阿哥係度笑就真係唔忍得⋯將心比己,我都冇多一套衫帶嚟換~為咗追下「潮流」,我都拎咗一支酸奶嚟三個人share,所謂酸奶,其實就係原味yogurt,不過有加甜味的,我哋通常用小匙羹嚟食,佢哋就習慣用飲管飲,可能啲細路會食得乾淨啲又安靜啲吧?果然係細路恩物,我同day一人飲咗一兩啖之後,曉一試就唔肯放低,直至⋯全支消失﹗當然,不時佢都係好鍾意食乳酪嘅~

食飽飽我哋上番房執行李,跟住就check out同埋寄存行李啦,寄存行李又係high tech之作,平時可能係俾個膠牌/咭紙你,呢度俾張晶片咭俾你,又要登記電話號碼,到領取時就雙重保險唔會搞錯了~

去lobby辦理check out手續,順便影下周圍嘅企鵝⋯裝飾﹗見到右上嘅人扮公仔嘛?我哋覺得好疑惑嘅係,點解個公仔可以咁細粒?童工乎?定係真係搵到個咁矮粒嘅大人係入面扮?﹗

臨走我再去欣賞下酒店個音樂噴泉﹗睇幾耐都唔(未)厭~

DCIM100GOPROGOPR0139.JPG

呢個小朋友,居然未入場就瞓咗?食早餐用咗太多精力?﹗

DCIM100GOPROGOPR0141.JPG

行去鯨鯊館時,可以經過欣賞人工湖同噴泉,遠處嘅藍色魚就係鯨鯊館嘅位置啦~

我哋一入場,首先target鯨鯊館,話說呢個係全球最大嘅水族館(我都唔係好知點計,係咪水嘅容量?),而以前去沖繩嘅水族館(請參閱:17-8-2007:沖繩2007第二天@萬座毛、海洋博、今歸仁、菠蘿園)個大玻璃好出名,入面嘅鯨鯊有其他各種靚靚魚襯托成為佢嘅標記,不過我哋去時都成10年前啦,今日嘅橫琴長隆就整個再大啲嘅去超越,而鯨鯊仲有好幾條添﹗雖然話鯨鯊館係我哋day 2嘅第一個景點,但可能個自助早餐太忙碌,曉其實入園排隊時已經瞓咗覺,好在唔駛檢查佢指模啫,但佢又醒目喎,去到大玻璃睇鯨鯊嗰度時佢又醒咗﹗原來呢個大水族館入面可以宿營過夜㗎,住就住帳幕,而價錢都唔平,如果周圍嘅細路/年輕人都嘈喧巴閉玩通宵,恐怕成晚都唔駛瞓,機會留俾後生嘅得啦~

果然一入場嘅彎玻璃水族箱就好吸引人目光﹗中間嗰張相係有職員入去抹魚缸,抹抹抹就清楚晒啦~

到咗重點項目了,遠望有遠望嘅好,近有近嘅好,我哋好好彩,可以睇埋餵飼鯨鯊,唔好睇佢哋咁大條,原來佢哋係食啲浮游嘅小蝦小魚㗎咋~佢哋唔會食一齊居住嘅「鄰居」㗎~

醒來即刻專心睇魚嘅曉~

DCIM100GOPROGOPR0169.JPG

一齊影張合照啦~

跟住我哋就去睇白鯨同埋白鯨劇場~

第一次認識白鯨呢種生物,係去韓國麗水旅行時嘅水族館見過(請參閱:25-5-2013:釜山麗水day 1(part 3).麗水世博之Aqua Planet水族館),當時已經好喜歡佢哋了,又可愛又活潑,不過今次見嘅,印象好似冇上次咁大條咁~大家都冇停留睇佢哋睇好耐,大為白鯨show就快開始了,工作人員都不停邀請大家去劇場就坐~

今次白鯨劇場比海豚劇場更full,兩層嘅觀眾席滿晒之餘,仲開放俾大家入嚟企係度睇﹗話晒都係室內空間,其實有冇啲消防方面嘅規定呢?

白鯨show我諗比較特別嘅係透明嘅水池,佢哋嘅演出有啲係要睇水底,透明嘅池邊就可以同佢哋係水底say hello了~佢哋同海豚差不多,都會做啲跳躍、頂波、載訓練員等等嘅演出,不過,點解今次冇我印象中嘅「肥嘢」咁可愛嘅?

睇完白鯨劇場又要趕去海獅劇場了~

海象同海獅嘅表演就相對地冇咁緊湊了,海象就同觀眾比賽,一隻比吹笛鬥大聲,另一隻就比做sit up(當然係要整古觀眾,觀眾好努力咁做sit up時,海象就閃走先了),至於海獅就分兩隊比賽,可能音響問題,個MC把聲又唔太入咪,所以聽得唔係好清楚,曉曉又狀態麻麻地,係咁要坐係我大脾上面,呢個show就睇得冇咁enjoy了~

係咪黐住媽媽就乜都得?

完場後我哋要搵地方食lunch,跟住就差唔多要走啦~想坐得舒服少少,又食得好少少,我哋決定去海洋大街嘅餐廳,你可以考慮成迪士尼嘅美國小鎮大街,嗰度自然有啲似樣啲嘅餐廳啦~我哋叫咗一份炒飯一份炒烏冬嘅set嚟share嚟食,份量都好足夠,味道都唔錯~但奇怪嘅係,叫餐飲時我本身想叫凍奶茶,個waiter話冇喎(餐牌上係寫咖啡或茶,呢度都係廣東地區,我以為意思同香港講嘅差不多),咁呀,熱奶茶啦,都冇呀?day要咗熱咖啡,佢個creamer同糖係分開上㗎喎,而我嘅熱紅茶其實只係Lipton茶包,咁⋯點解唔可以有熱奶茶呢?﹗^^”,係咪因為怕大家expect係茶餐廳嘅濃郁茶味,得紅茶嘅奶茶大家會失望乎?day話送啲奶俾我,算數啦~(個「算數啦」要學曉嘅語氣~)

食飽飽仲有少少時間,真係得少少時間,我哋拿拿聲去埋附近嘅中華白海豚館度望一望,可能燈光問題,又唔係好睇得出佢哋身體係粉紅色呢個特徵喎,都係記憶入面嘅中華白海豚更好,記得中學時有跟學校出海去睇中華白海豚呢,睇到一個個粉紅色嘅背脊係海面跳出嚟真係好壯觀又好靚~可惜當年影相冇而家咁方面,又冇得打blog,呢啲記憶只可以係腦海裡面儲存了~

DCIM100GOPROGOPR0181.JPG

臨走要影埋個招牌~

DCIM100GOPROGOPR0183.JPG

仲有有好多海洋動物嘅噴水池~

好啦,夠鐘啦,我哋返去酒店,pick up番行李就搭接駁車出去九洲港lu~如預期一樣,兩父女當然係車上呼呼大睡啦,估唔到嘅係,到落車時曉都仲未醒,轉過去爸爸中揹帶揹都冇醒,未有耐要上船,不如去Starbucks歎杯飲品坐下啦~

享受下二人(各自各篤手機&睇雜誌)世界,哈哈,唔係咁孤獨,只係曉又瞓緊唔適合講嘢啫~曉醒咗我哋就動身啦,差唔多上船了~回程嘅船?除咗繼續開party之外,仲有畫圖畫,同埋⋯好在有帶貼紙書,咁樣,一個鐘嘅船程就好快到啦~

DCIM100GOPROGOPR0187.JPG

落船睇到靚靚嘅香港夜景呢~

今個trip就完滿結束了,幾時有得再去旅行呀?(通心粉眼⋯)

珠海橫琴長隆海洋王國blog完滿結束

前往其他中國旅遊blog

Comments

comments

發表迴響

你的電子郵件位址並不會被公開。 必要欄位標記為 *