呢個trip嘅起源嘛，原本係爹爹有兩張free嘅橫琴長隆海洋王國入場門券俾我哋，於是就研究下幾時去，點玩法，但發覺原來要分開買船飛、接駁車、酒店而唔要入場券原來有啲麻煩同埋仲貴(？﹗)，而且只係兩日一夜嘅trip嚟講，入場一日實在太少了，結果挑起條筋要去玩，但我哋反而冇用到張免費飛，索性係中旅社買咗兩日一夜嘅package，可以兩日都入園，仲有一餐酒店自助餐～

早兩個星期一家八口去澳門兩日，上次好好可以係屯門上船，今次要出番去上環上船，本身諗住出到上環先食早餐，時間預得鬆動少少，點知曉呢個小人仔真係完全唔餓得，好在有早一日食剩嘅麵包俾佢頂住檔先，等車時咬幾啖，落車又咬幾啖，到我哋買咗麥當勞早餐時佢又分少少～

記得再對上一次我哋一家三口去澳門嗰次又係上環搭船，碼頭嘅廁所入面有換片枱，今次去珠海嗰邊就冇，我哋坐低時冇乜人就邊度換片都得啫，但臨開船時已經好多人，曉而家又大個咗咁多，大庭廣眾換片我都唔太想了，不過冇辦法啦，唯有用我哋個身擋下啦，希望將來有改善，又希望我個女可以快啲戒片～

出發lu～

一上船曉就馬上想拎「開party」(即是玩具杯碟、蛋糕麵包、兔兔海獅麵包超人等等幾個小朋友)玩具出嚟了，仲仲記得上次去澳門時係船上玩得好開心呢，今次開party都開咗成程船咁滯，大部份時間由我咪陪玩囉～

爸爸？我預咗佢呢啲時間實瞓覺啦，都好嘅，養足精神去到同我哋玩丫﹗

今次一齊去珠海玩嘅小朋友們，五個去，六個返，多咗北極熊新朋友呀﹗睇埋之後嘅blog就會見到了～

不過比起兩個星期前嘅澳門嘅船，唔知係天氣問題(明明風和日麗丫)定係船嘅問題，我覺得拋得好犀利，到差唔多落船時個胃已經好唔舒服，食咗嘅麥當勞係胃同喉嚨之間上上落落咁，都要上岸隔一陣先至舒服番啲～

好容易就搵到接駁巴士嘅車站，曉又話要食包包了，哎吔，你而家又食包，去到咪又食唔落囉？不過已經係午飯時間，唔俾佢食又唔人道咁～anyway，食飽咗就上車瞓下覺啦～果然好順利地，一上接駁巴士，一個鐘車程嘅期間，兩父女一齊呼呼大睡了～

我哋去到度假區仲係兩點左右，可以check in酒店但未可以上房，我哋辦好手續之後去食啲嘢先～橫琴長隆度假區有三間酒店，我哋住嘅企鵝酒店最近海洋王國，唔知其他兩間酒店點啦，但企鵝酒店真係勁勁勁勁勁大﹗﹗﹗﹗每次由房去餐廳、餐廳去lobby、lobby上房都行到腳仔軟，可能亦因為地方太大，有唔同嘅counter做唔同嘅工作，客人們都未必清楚自己排緊嘅隊係做咩，又可能有另一個counter可以做相同嘅嘢但條隊短好多，總之有少少混亂+浪費寶貴(應該去玩)嘅時間啦，不過另一方面，冇去大陸嘅旅遊區好幾年，今次印象明顯覺得大家排隊嘅秩序進步咗好多，冇乜遇到俾人打尖啦，後面嘅人又唔會不停逼住你個pat pat，咁都少咗好多煩惱～我哋都要排兩次隊，先排check in counter，再排兌換海洋王國入場券嘅counter，為咗慳一次排隊，我哋決定唔寄存行李，揹埋大背囊去餐廳食嘢，寧願之後上房安頓一下先再出動去玩～微信係內地實在太普及，度假區好多即日嘅information都係佢哋嘅微信專頁度睇，我又冇用開，即刻download個app再開account實在太麻煩，於是叫day去去搵搵啲表演時間表～

早餐食得晏，我哋去到「食街」時都唔係太餓，曉曉隊咗包就更加唔餓，況且晚餐嘅自助餐又要食得早，我哋隨便食咗少少，叫咗個上湯魚腐蔬菜同埋另外一個泡飯，再叫杯果汁，諗住share嚟食就算～

呢度「食街」同埋晚飯嘅自助餐廳都好大，而且因為一家大細嘅客人太多，所以好似有無窮無盡嘅bb椅供應，非常好～

但個泡飯上到嚟真係完全呆咗，原來係個兒童餐？﹗個餸同埋個泡飯都好微型，仲要有個動物造型嘅包附送添，但要知道我哋個兒童唔係太有胃口，結果都係我哋食個兒童餐囉～

餐廳外面嘅企鵝公仔～其實兩間大餐廳都有落地玻璃可以睇真企鵝，不過我哋坐得遠，只係臨走時望咗一陣咋～

好嘢，夠三點鐘可以上房lu，但⋯要拎房咭又要再排過條check in長隊丫﹗我哋嘅房係二樓，酒店實在太大，行去電梯大堂又行一輪，上到二樓行去間房又行一輪丫～

房入面好靚呀，全部房都係企鵝主題～抵讚嘅係床頭放咗個兒童用品list，有需要可以搵housekeeping拎嚟，我睇中嘅係床欄呀﹗曉連係屋企都冇瞓bb床好耐，我都費事request bb床了，酒店大床咁闊三個人瞓綽綽有餘，但如果有床欄就可以俾佢瞓側邊，呢個人仔鍾意大字形瞓，中間瞓嘅話好浪費空間^^”～非常好用呀﹗

曉曉入到房就急不及待除鞋同埋走上床了～佢讚咗好多次「張床好靚～」～

另外一樣好impressive嘅係浴室嘅用品，牙膏、浴帽等等嘅紙盒印上嘅圖案拼成一幅圖畫呢，好靚呀～

連毛巾都有企鵝圖案，而漱口杯仲要係企鵝爸爸媽媽bb～可惜曉未識得用漱口杯～而廁所附有兒童廁板，真係好family friendly呢～

雖然送咗水果盤，但我哋到離開一刻都冇餓住嘅肚子可以放得落了～好啦，稍稍安頓我哋就出動啦～

待續

前往其他中國旅遊blog

Comments

comments