我哋係房放低啲嘢之後要爭取時間入園玩一陣啦，晚上八點係必睇煙花匯演，即是最遲六點幾都要去食自助晚餐，咁得番唔係好多時間咋～day check過時間表，我哋要target睇咗日間大巡遊先～
以往去啲唔同嘅主題樂園，如果即日入場離場再入場，多數都係係手臂蓋個印仔就ok，今次橫琴長隆好似好勁咁要用手指模加門票先再入場，所以我哋第一次入場時要採集埋手指模資料～
一入到去就俾個天幕screen吸引住了，好大好靚呀～入面會不停轉唔同嘅海洋生物畫面﹗小朋友們可以企係度睇好耐都得﹗我記得我哋夜晚再入場時好似係變咗星空，而睇完煙花樂園要休息而全人類要撤離時好似係一片空白，哈，咁大家就唔會掛住欣賞而塞實晒啦～
天幕係水母﹗海洋大街除咗有嗰啲俾你戴住入樂園玩嘅頭箍呀、俾小朋友行住玩嘅吹泡泡等等，我好記得有個3D printing嘅counter，影張相之後可以print你個公仔出嚟直接寄去你屋企，如果係以前嘅話會覺得，去玩時整嘅嘢要等多好多日先得到係手好似好掃興咁，但自從屋企有部3D printer之後，day係屋企日print夜print，我先知道原來細細粒嘢都要print過夜，一個人型figure要遲啲先送貨俾你真係一啲都唔過份～
原來巡遊路線係圍住個人工湖嚟行，我哋揀咗一個冇咁曬嘅位置坐低等開始，原來本地人唔太興坐低睇巡遊喎，直到巡遊完結我都冇睇到其他人好似我哋咁坐低～
我同曉安頓好後，爸爸要去買個咖啡充一充電呀，之前係酒店行嚟行去，入面嘅商店都得啲好甜又貴嘅樽裝Starbucks咖啡，入到嚟嘅餐廳佢好似買到杯似樣啲嘅～
巡遊俾我嘅印象係，花車、演員嘅裝束、道具等等全部都又新又靚又唔土，其實設計都好得體，音樂又好聽，不過我總會同香港迪士尼嘅巡遊去比較，最可惜嘅一點就係覺得啲參演巡遊嘅演員實在太唔落力，無論係跳舞嘅動作定係表情都只做到50%左右，笑係有笑，不過唔覺得佢好開心或者好投入咁，所以睇落都覺得爭少少，亦因為咁，我哋見時間咁緊逼，我哋決定放棄晚間嘅夜光巡遊了～
因為細細個又生得可愛？其他人要同小丑猜包剪揼贏咗先有個汽球，但曉冇付出過努力小丑都送咗俾佢～
睇完巡遊時間上又配合嘅就係海豚劇場了，每一個劇場都好大，又有好多座位，每日嘅場次又多，但居然都爆滿﹗
令人驚訝嘅係表演嘅海豚數目好多，我而家睇番張相數一數，原來有十條﹗即使做嘅動作都係同以前見過嘅差不多但都會特別壯觀～海豚多都冇咁誇張，我哋第二日睇嘅白鯨劇場都有好多條先至震驚，感覺上比起白鯨，海豚相對地好似冇咁罕見嘛～
演出好流暢地進行，海豚們表演完了，現場觀眾參與完了，之後出面個大螢幕突然間風雲變色，行雷閃電又落大雨，連水池上面都落起大雨嚟，做乜？原來重點係之後嘅雨過天晴，唔單止螢幕上面有各種雀仔飛出嚟，連現場都有各種鸚鵡飛出嚟呀～畫面好靚～但之後忽然間變成高台跳水，我哋諗極都諗唔明個flow係點樣演化成呢個項目，anyway，跳完水之後再有海豚們，另外有條鯨魚再出場之後就結束了～表演冇話唔精彩，不過可能近年睇得太多關於愛護動物嘅文章，感覺啲動物真係有點太辛苦了，個演出都幾長，而且每日好多場次呢～
之後我哋去睇海牛館，到睇主角之前會經過好多世界唔同嘅淡水魚生態，平時話海洋世界好多姿多彩又色彩繽紛，淡水魚嘅世界真係冇海洋世界咁色彩斑爛，睇完，哦，之後就想快啲搵海牛～
海牛個樣笨笨的，唔算特別可愛，總算認識下佢哋～
我哋入去海牛館時曉好似想瞓想瞓咁但又唔瞓，我哋行出去時忽然見到「鸚鵡過山車」竟然只係排隊排5分鐘，唔趁機會玩好似好可惜咁，day就提議佢抱曉瞓我拿拿聲去玩～話排5分鐘，不過由入口經過迂迴曲折嘅排隊路入到去上車嘅位置都兜好耐，我後面有兩個少女唔想兜咁遠，企圖就咁跨過啲圍欄，但我好乖咁跟住條路行時就好擔心佢哋了，因為正確嘅路根本唔會經過佢哋專登行嘅「捷徑」，恐怕行咗「慢徑」﹗上到去其實叫做第二班車就輪到我了～
過山車係幾好玩，刺激度高但嘔吐度低，不過歡樂度就中等啦，但得自己一個人玩係有啲寂寞，尖叫又得自己一個尖叫，落嚟時又冇相同經驗嘅人可以吱吱喳喳，希望第時曉都鍾意玩我哋一齊去玩啦～哈哈～
結果曉都係冇瞓覺，anyway，時間都差唔多，我哋慢慢行返出去酒店食自助餐啦～
有對夫婦搵day幫手影相，之後佢就好熱情咁幫我哋影相，仲話影晒三個角度添～
同day談論之中，我話，十年後可能唔係好記得呢個trip嘅detail，但以後都津津樂道嘅，肯定係呢個自助餐﹗正如上次去北海道我哋好crazy咁行45分鐘去麵包超人館，麵包超人館嘅內容可能會淡忘，但行嗰45分鐘就肯定會記得﹗呢個自助餐唔係特別好食，但真係好瘋狂～～～間餐廳超級大，我estimate唔到有幾大，睇番官網原來有1600個座位，所以每次出去拎嘢食都要行好遠，而人真係好多，大家拎嘢食同食嘢都好似衝鋒陷陣咁，出去啲食物station全部都要排隊，出去一次係好大件事，必需要有合理嘅回報先得，因為太混亂，我哋只好一人同曉留守，每次只派一人出去拎嘢食，一個人拎三個人嘅食物更加係身負重任，所以結果係⋯唔係揀想食啲乜，而係排咗嗰條隊之後覺得ok嘅食物都一口氣全部拎晒返嚟﹗而係station serve客人嘅職員本住「你哋唔好再返嚟」嘅心態去but食物俾你，蝦？唔係用夾子，係用大湯勺，一次有廿幾隻蝦，多到眼都凸埋﹗食物種類的確好多嘅，環球美食都有，味道大多數都唔錯，至於名貴嘅食物就冇喇，普通嘅食物都refill唔切，如果你拎啲生蠔出嚟真係一秒就冇，day最初話唔好拎生嘢俾佢食，不過結果都冇得食生嘢～要知道佢哋有幾忙，睇生果就知，木瓜同埋哈蜜瓜全部都係只切好一塊塊，但果核就仲係度，要自己咬/切走佢，因為呢啲係「末節」嘛～呢個自助餐真係好深刻，但由始至終都太激動，我哋一張相都冇影囉～雖然食物「得來不易」，最後我哋都食得好飽﹗食自助餐比想像中更花時間，所以要放棄夜間巡遊啦～食完又直接入園睇煙花了～
我哋重新入場時，天幕變咗係星空了～
哇，仲趕得切撈到少少夜間巡遊嘅汁呀～
煙花有咩咁特別？因為除咗有煙花同激光之外，園區嘅中心位置係一個人工湖，入面有超大型噴水池，所以呢個show係光、影、水、音樂嘅配合，呢個噴水池同埋我哋酒店嘅噴水池，都可以同Las Vegas嘅Bellagio媲美呢(請參閱：4-2-2011：USA trip day 3(part 2)．華麗酒店群@the strip, Las Vegas)，不過最震憾嘅，應該係水上飛人嘅部份，特技人嘅腳有水柱噴出嚟，將佢哋發射上天，又係空中打筋斗同埋滑水，好犀利﹗到最尾closing嘅時候，仲要加埋煙花係身﹗day話好驚佢哋會燒著囉～其實冇煙花我已經覺得好精彩了﹗呢個咁繽紛奪目，又刺激緊湊嘅「煙花幻彩橫琴海」之中，曉居然係中途瞓著咗幾秒，好在俾我發現咗叫醒佢，如果唔係瞓得一覺有幾個字嘅話，今晚又唔知要搞到幾夜先瞓～
上：雖然人頭湧湧，但我哋個view都算唔錯～
中、下：煙花+噴泉+水上飛人
我哋離場時再經過有天幕嘅海洋大街，既然咁多人，不如我哋經過紀念品店行出去啦，係度我哋帶咗北極熊返屋企，曉曉真係好鍾意佢呢，平時慢吞吞唔去沖涼，同佢講「北極熊等緊你」就即刻去了，有一晚瞓到半夜佢「媽」咗幾聲，我起身望一望，原來曉冇瞓係枕頭度而係瞓係北極熊上面呢～
個小朋友即使好攰都堅持要自己抱住北極熊﹗
返到酒店時經過再欣賞一下夜晚嘅音樂噴泉～
我哋再返上酒店房時，個床欄已經安裝好了，非常好呀～我哋今晚可以瞓得舒服啲了～
待續
前往其他中國旅遊blog