下一個行程去澳門旅遊塔，由熊貓館搭小巴去旅遊塔都搖咗好耐，好事嚟嘅，幾隻豬豬係車上叉足電，可以再戰，唯獨我嗰隻曉豬豬到咗目的地仲繼續瞓瞓瞓，到我哋離開景點時都一直瞓，可能佢都唔知自己有參觀過澳門旅遊塔，雖然佢有份影咗好多(睡)相～
澳門旅遊搭下面就去過好多次，(check番facebook先知)2012年9月時去過參加兩岸四地嘅Family Medicine conference就係嗰度舉行，另外2011年9月就有同聖母孝女會聯會一齊去澳門朝聖時順道去過旅遊搭下面觀賞旅遊搭+煙花，後來再同day&曉去澳門時即使有經過嘛都冇上到去～今次我哋一家八口大旅行終於有機會上去參觀lu～對我嚟講，澳門旅遊塔最深刻嘅印象，應該係Running Man入面佢哋去玩嘅刺激玩意吧？Bungy jump、塔外步行繞圈、爬上塔頂等等，有啲成員就超英勇，有啲賣點就係佢哋嘅驚青樣～
原來家姐影咗呢幅牆，上面講咗邊個演藝人有嚟過澳門旅遊塔～
確實，澳門嘅landmark都識少少(主要係啲賭場&酒店﹗)，所以上到塔上面都有趣，見到啲建築物都認得少少，好過上次去北海道時嘅札榥電視塔嘛，淨係認得個札榥站同埋正正係塔下面嘅大通公園，因為根本冇去過其他地方～不過今次印象最深刻嘅，一樣就係睇啲人玩刺激遊戲，另一樣就係欣賞靚靚嘅日落(仲要係曉瞓著咗嘅「假二人世界」)～
上到嚟lu～
扮悠閒散步～
大合照～
項目套餐一覽表﹗唔單止要有膽，仲要有$$～
可能真係年紀大咗，睇人玩就ok，躍躍欲試嘅心情真係零，可能感覺有實際威脅吧？不過由第一次認識bungy jump呢件事開始(可能係Leon當年嘅you jump I jump？﹗)，我確實一次都未諗過想試玩，無論係壯麗嘅天然美景定係人工嘅建築物～不過睇人哋玩都幾興奮，正如去機舖唔一定要自己打機，睇啲好勁嘅人打機仲有趣味一樣～
好青春～
我哋落埋去下面嗰層時，有實況video直播，影住上面嗰層啲人準備跳落去嘅畫面，果然電視入面嘅人一跳，我哋眼前就有個人影飛落嚟﹗我有錄到個video㗎，我媽嘅反應仲好睇過個bungy人﹗哈哈～
搵個靚位坐低⋯
睇日落～
我哋有我哋嘅「假二人世界」，我另一樣好記得嘅係，曉就係旅遊搭上面瞓瞓瞓，而逸bb就係旅遊塔上面啜啜啜，所以家姐全程都要圍住餵奶巾抱住佢奶奶，辛苦了～
glass floor呢啲小兒科嘢我都仲夠膽走上去影相嘅～仲記得人生第一次嘅glass floor經驗，就係F.3暑假嗰年去多倫多嘅CN Tower，嗰陣真係戰戰兢兢呢～
太陽都未完全落山我哋就要走啦，因為book咗枱去MGM食自助餐呀﹗今個trip家姐問我有咩地方想去，我唯一一個suggest嘅行程就係要去食自助餐，記得好耐之前已經隔住玻璃羨慕人哋食MGM嘅自助餐，今次就book定枱一齊去啦～
曉，要起身啦，食大餐啦～
第一個印象係⋯育嬰室勁遠﹗曉同逸都要換片，我哋兩組合共六個人就浩浩蕩蕩咁出發，原來要離開餐廳，經過個大中庭大魚缸，又穿過好多商店，再去到唔知係西餐廳定係spa嘅附近先去到育嬰室～
咁入面的確係好豪華好靚嘅，不過，我寧願係普通廁所入面加塊換片板就好了，好在叫埋老公一齊去，如果唔係真係攰死人～打blog呢一刻，今時今日嘅曉雖然仍然未戒片，但我哋有新方法，而家我哋企係度換片啦，通常係佢跟埋我入去廁格時一併做埋，慳水慳力～yeah～
換片出面嘅陳設都好豪華～
自助餐選擇都幾多，刺身選擇好多，又有得食生蠔，不過嘛，啲相對名貴嘅海鮮一推出就會迅間被消滅，所以去排隊拎時，如果排到自己啱啱剩番一隻都冇就好了，下一round就可以拎到又多又靚嘅海鮮啦～今次個自助餐有少少敗筆嘅係，day諗住曉鍾意食三文魚就拎咗啲烤三文魚，點知一要個廚師就俾一大堆，結果曉食少少，我哋兩個就食烤三文魚食到飽飽～慘～係咪因為食自助餐太忙？點解我& day &家姐嘅相機都一張食緊時影嘅樣都冇嘅？﹗
食飽飽我哋就出去慢慢睇魚魚了﹗好靚呀～
呢個超巨型魚缸真係好華麗～
成個中庭嘅花園設計都好靚～都係豪㗎喇，但優雅得嚟唔會太造作～
食飽飽，勞碌四圍騰咗成日，大家都攰啦，我哋返去Studio City休息啦～
上次住巴黎人間房冇得望個鐵塔，今次住隔離間酒店反而對到正一正﹗不過⋯啲燈太勁，瞓覺要落窗簾﹗澳門嘅酒店房都唔駛講㗎啦，房大、床大，今次我哋都費事request bb床了，反正曉都會同我哋一齊瞓，唔緊要啦，張床咁大張～
原來家姐佢哋間房可以望到Studio City嘅icon 8字摩天輪呢～
休息啦，goodnight～
澳門旅遊塔官方網站：
https://www.macautower.com.mo/zh-hant/
MGM官方網站：
https://www.mgm.mo/zh-hant/macau
前往其他中國旅遊blog