25-3-2017:學車記(一)之筆試精讀

其實不嬲都唔係好積極想學車,每每短暫地想學車就只有去旅行時交通好唔方便,好羨慕人哋可以自駕遊嗰陣,但香港嘅公共交通實在太方便,養車實在太貴,寧願鬆手啲搭的士仲平,一直都的唔起心肝要學車~結果今次起動都係老公夾住我兩個人一齊報名,照顧小朋友嚟講,恐怕都係要識揸車好啲~

考慮去邊度學車,諗完都係決定報香港駕駛學院,雖然啲人話學完出嚟會唔識揸車(希望唔係咁嚴重啦),但合格率高丫嘛,pass咗再補鐘再算啦~我媽當年成四十幾歲去學都係一take pass~多謝day請我學車,我會努力啦﹗

螢幕快照 2017-03-25 下午11.54.39

今日第一次嚟返學了﹗

報咗名冇耐就排到期去考筆試lu,其實報名時已經派咗要溫習嘅書同埋MCQ題目集,但懶惰嘅我哋冇乜點揭過,其實,仲有幾日就考啦﹗哎吔~要自修去考都冇話唔得,但駕駛學院其實有得上筆試堂,仲要唔駛預約,按時間表去就ok~平時如果我同day都唔available湊住曉時,曉會肯跟嘅恐怕只有婆婆同埋葉太姨姨,但婆婆咁耐呢個星期又去咗旅行,時間無多,研究+討論一番之後,決定我今日去上筆試堂,然後⋯我將老師講嘅再傳授俾day,咁樣會唔會節省啲人力物力?﹗希望我哋兩個都ok啦~

有咗西鐵真係方便好多,由朗屏站落車行幾分鐘就去到shuttle車站了,去到地圖上標示嘅等車位置時,我行嚟行去都搵唔到shuttle嘅站牌,但就有好多人一字排開咁係街上㩒電話,哈,我估大家都係去駕駛學院上堂吧?我加入㩒電話時,有個後生女嚟問我等shuttle嘅位置,「我都係第一次嚟,我估都係呢度啩?睇落個個都好似等緊咁~」話咁快架車就嚟咗了~

原來學院內嘅實習場地就好似一個露天停車場咁,唯一唔同嘅就係多咗條上落斜路係中間,上面嘅車一眼好難分辨究竟係停緊定係郁緊,難怪今日嘅老師話,佢哋學院嘅車被元朗居民取笑為「白色烏龜仔」,而冇人會因為超速而fail路試,只會因為開得太慢而fail,佢叫我哋學車時/考車時要開快啲囉~^^”今次我入lecture room上堂,一堂過嘅筆試精讀90分鐘,我要好專心+抄好100% notes丫,因為我要對day負責任~

我為咗要專心,一入課室就坐第一排中間,點知一開始老師就問嘢,問大家睇咗本書幾多(?﹗),day都仲揭過幾頁,我真係零⋯即刻有啲後悔,後面嗰排有個女同學已經勁熟書喎,老師問嘅佢都識答~佢旁邊有個後生女break時話唔鍾意讀書,佢仲有鼓勵個後生女添﹗老師開頭講解下啲logistics,同埋預約實習堂嘅要點等等,之後就入重點,講解筆試嘅highlights了~佢講明希望大家幫手記住啲題目,記得幾多就報告番幾多俾佢哋聽,感覺好青春呀﹗﹗令人回味當年我哋讀醫學院時都會幫手記住啲題目,留啲past paper俾師弟妹~原來好多筆試嘅內容真係唔係常識囉,一定要溫書,難怪老師話fail筆試最多嘅係18-26歲嘅高教育水平嘅人,太輕視個筆試真係唔掂,路牌可能都識少少,但幾多歲可以自己踩單車出馬路,幾多歲可以坐電單車車尾,貨櫃車載貨可以突幾多出嚟真係唔讀唔會知囉,而同一個藍色底同一個白色箭嘴,原來圓形同長方形就已經係兩個唔同嘅路牌,果然去上呢堂係有d用﹗

接住落嚟就係要食咗本書+做晒啲MCQ啦,今個星期好忙呢,仲有好多韓文功課,韓文班presentation又要交稿,加油呀~祝我哋兩個good luck吧﹗

Comments

comments

5 關於 “25-3-2017:學車記(一)之筆試精讀” 的評論

  1. 看你描述的場景,真係好懷念個時學車的日子,考到筆試之後,揸真車之前好似有堂模擬駕駛,依家仲有無?

  2. 做完十幾年工再去讀書同考試,有青春咗嘅感覺。同時,老師又會講吓啲考試策略,做番「超齡」學生,既想學嘢,更想過關。當年讀急救課程,就有類似嘅感受。

    • 我其實一直都有讀書同考試呀﹗由專科試到韓文班,一直都冇離開過「學生」嘅身份,不過我覺得而家鬥心比學生年代更強,求知欲大啲,上堂會敢發問,又專心上堂會坐第一行,考試aim滿分,可能後生時同輩間對於「好努力讀書」唔係一件好認同嘅事,所以反而傾向低調啲吧?

發表迴響

你的電子郵件位址並不會被公開。 必要欄位標記為 *