第一次知道Playright呢個機構，應該係某次同day去濕地公園時，見到佢哋擺booth推廣遊戲，不過當時未做爸媽嘅我哋望一陣就走lu～有咗曉曉之後自然會多啲留意周圍有咩啱小朋友玩嘅地方，有次睇到網上報導介紹Playright嘅遊戲室－－Playscope智樂遊戲萬象館，當然要去「朝聖」一下啦～
睇官網嘅資料，似乎好多嘢玩呢﹗
對於屯門人嚟講，專登去大埔玩係一件大事，所以我邀約兩位好朋友帶埋佢哋啲小朋友一齊去，金姨姨舉手會帶奕朗哥哥去，George弟弟未識行就自然去都冇乜意思啦，Mandy姨姨話愷揚太細今次唔去住了，其實去完之後我覺得愷揚都啱玩丫﹗雖然話要去大埔，其實唔算太唔方便，東鐵由太和站落車，經過太和商場行幾分鐘就去到座落太和邨亨和樓地下嘅遊戲萬象館了～奕朗哥哥12點放學，我哋相約係沙田一齊食lunch，之後就出發了～時間啱啱好，去到係2:27pm，仲有3分鐘就開始下晝session，我哋排第二，雖然話每個session有入場限額，其實唔係學校假期嘅平日嚟講，我都唔太擔心會滿額撲個空，所以都冇專登提早預約，因為預約要銀行過數又send入數紙又電話聯絡都有少少麻煩，如果可以上網用信用卡俾埋錢預約就好lu～
去到除鞋著襪就可以俾錢入場，我哋非會員每次一大一細$100可以盡玩三個鐘，雖然午餐前曉已經先瞓覺叉足電，但對佢嚟講能量都唔夠用盡三個鐘，我哋今日玩到大約五點鐘左右啦，其實要玩真係夠多嘢可以玩咁耐，仲可以去完再去添～
我哋先去「遊戲穿梭城」，我？當然係先俾個大繩網吸引住啦，好想即刻上去玩﹗但主角係曉，玩咩我要睇佢頭～
玩完一陣車車之後(我都估唔到佢會首先俾車車吸引住)，玩得最最最耐嘅應該係煮飯仔﹗同曉曉去食自助餐一樣，唔係要食貴嘢或者食罕見嘅食物，總之要鍾意食﹗玩？唔係要玩昂貴、罕見、屋企冇嘅玩具，總之要鍾意玩﹗我諗佢玩咗煮飯仔差唔多有半個鐘～我個心暗自焦急，如果玩晒啲時間冇得玩其他特別嘅嘢咪好可惜？哈，只係我可惜，其實佢一啲都唔可惜～
好在曉曉都有俾七彩繽紛嘅樓梯吸引咗佢上去，上到去捐窿窿佢都好喜歡，仲可以由透明外牆望到落嚟，同金姨姨奕朗哥哥hello呢，不過一去到繩網曉就打退堂鼓了，我一再引導鼓勵佢都唔肯踏出一步落去繩網，唯有⋯由原路落番地面啦～即使之後見到奕朗哥哥玩得好開心笑到卡卡聲佢都冇興趣上去再試呢～
唔唔，下次大個啲一定要再嚟﹗我要玩繩網呀～>v<
之後我哋有去隔離嗰間房，有好多模擬場景，有家居裡面嘅床、晾衫、家電，又有曉玩咗好耐嘅搭lift，又有工作系列好似扮機場check in counter，又有工地等等～曉都鍾意玩嗰幾個電話同埋keyboard～
不停搭的紙皮lift，都幾精美㗎～
仲有可以扮office，又可以扮機場嘅counter～
呢度好多哥哥姐姐一齊玩，對佢嚟講好大嘅挑戰就係分享玩具了，呢個功課佢仲未掌握得好好～人哋玩緊佢唔會走去搶，但自己玩緊人嚟伸手嚟拎(通常都係細個過佢或者年齡相若先會咁做)就未識點樣友善地handle，始終大家嘅語言發展有限公司同埋呢個年齡自我意識太強吧，最弊嘅係佢明明玩完嗰樣嘢放低咗，已經玩咗第二樣嘢好耐，人哋玩佢玩完嗰樣佢都會唔高興，覺得玩過就有「擁有」嘅感覺，真係要一而再、再而三咁教佢呢～之前睇過幾本圖書關於分享嘅，明就明白，但實際上要做，情感上又未接受得到呢，要多啲同小朋友一齊玩先可以慢慢學習﹗搶完、爭完、喊完、冷靜完，同佢講「一齊玩」，佢都會話「一齊玩」，但人哋小朋友走開咗好耐啦～
玩到咁上下諗住去換片，搵換片台嘅時候去到「污糟貓天地」，估唔到成個下晝玩完之後，曉曉印象最深刻嘅係係污糟貓天地畫畫呢，婆婆問佢爸爸問佢玩咗咩，佢第一樣就搭畫畫﹗因為一早知道有污糟貓天地，我都幫佢帶定件防護圍裙，有時都怕啲顏料洗唔甩件衫會報廢呢～
今次可以用顏料自由畫牆，曉曉話佢自己畫星星、彩虹同埋畫長頸鹿，我諗係因為用黃色吧﹗曉曉又叫我畫佢近期最愛嘅芝士～
畫完畫要洗洗手﹗
之後去埋旁邊嘅「幼兒木玩閣」，奕朗哥哥超齡唔入得去啦，22m嘅曉都可能係第一次同最後一次入去呢個0-24m專用嘅幼兒區，果然入面玩法溫和好多～
裡面有招牌木波波池，小朋友可以將木波波放係邊邊嘅坑入面碌碌碌﹗而木玩閣顧名思義就係全部都係木製玩具～
曉曉最愛各種樂器，小鋼琴、木琴、打鼓等等～
最後我哋入埋去「遊戲發明室」，原來呢個房嘅玩具係定期會更換㗎，material會變，挑戰小朋友嘅創造力，你鍾意點玩點解釋都得﹗今次有好多塊狀同埋人型嘅積木，你可以砌、可以講故事，我哋？曉：「媽媽砌﹗」
係遊戲發明室見到個哥哥食餅餅，食餅餅呢啲嘢好高傳染性家嘛，我同曉都有啲餓，就買咗細細包嚟一齊食啦，連放錢嘅錢箱都好有趣㗎喎，可以睇住個錢入面碌碌碌碌碌～
曉曉真係好識分自己人同埋外人，請我食就幾多塊都得，請奕朗哥哥食少少都可以，有其他小朋友眼金金望住佢包餅，佢就唔肯請佢哋食囉～
食完餅餅，兩個小朋友都筋疲力盡，我哋決定走lu～果然，上到東鐵冇耐曉就zzzz，豬到返屯門啦～我都好推介呢個放電好去處，果然比起商業化嘅playhouse，呢度更多俾小朋友自主嘅內容，亦可以令佢哋發揮自己嘅創意同想像力，細個有細個玩法，大個又有大個玩法，可以再去～
Playscope智樂遊戲萬象館網頁：