最近幾個月好忙(煲劇、瞓覺)，即使有時間打blog都分咗嚟追番啲旅行blog，半熟手媽媽系列有幾個月冇同大家見面了，好在仍然堅持到每個月係Facebook發表曉曉嘅成長紀錄，搵次有心機真係要轉移番過嚟個blog度好好存檔﹗過埋正月十五有好幾日，煲完「鬼怪」大結局，有時間打番呢個過年blog～
雖然係曉曉第二個農曆新年，但今次對佢嚟講好似第一次過年咁呢，舊年得嗰十個月大成舊飯飯咁，今次就真係樣樣有佢份了﹗
感受今個農曆新年氣氛嘅開始應該係去新加坡旅行時吧﹗
我哋先係新加坡唐人街－－牛車水逛咗第一個年宵市場，所以今年公公婆婆屋企、姨媽姨丈屋企同我哋自己屋企都有新加坡人嘅特色新年掛飾菠蘿呀﹗又關菠蘿事？爸爸居然知道，作為福建人嘅佢知道菠蘿，即是鳳梨，原來福建話嘅「鳳梨」就好似「旺來」，哦，原來係咁﹗
菠蘿掛飾本身都好cute丫～
playgroup都有過年嘅氣氛～
過年前嗰堂嘅手工就係桃花畫啦～
今個聖誕節曉曉學唱咗「平安夜」成首第一節、「普世歡騰」少少、「噢，聖誕樹」頭兩句，本來諗住過年都教佢一兩首歌旁下身，但我同爸爸最後都冇結論邊一首比較好，而且我哋自己都唔記得晒啲歌詞，結果都係不了了之，不過拜年嘅祝福說話就有練習好嘅﹗但慢熱嘅曉要同你好friend/好relax狀態先會面對面講到咋，聽到佢親口講嘅你，恭喜你了，你已經通過認證～「新－－年快樂﹗身－－體健康﹗龍－－馬精神﹗青－－春長駐﹗心－－想事成﹗」不過因為去完新加坡旅行返嚟冇耐，有時「新－－」會變咗「新－－加坡﹗」呢啲意外真係好難避免，但都幾搞笑囉～同佢拍片同大家拜年，講完新年快樂變咗唱生日歌亦變成笑位，大家話應該留番年初七人日時先post喎～
過年前嘅準備工夫除咗練習拜年之外，我要為曉曉預備拜年衫呀，適逢第一次係網店pannygarden買衫，見到有條兔兔圖案嘅紅色旗袍，我對條裙仔一見鍾情，即刻買咗了，雖然送貨遲咗之後又漏咗，但最終都趕得切過年前送到，著得好靚呀～可惜嘅係，過年有兩嗰兩日成日都好忙冇機會好好影張相呢～
年初一著兔兔裙﹗
嗰排day興玩3D printer，係雞年print咗個雞冠髮夾俾曉曉，我同曉曉嘛⋯都一般欣賞啫～heehee～
前年大住肚、舊年曉又細個，我哋有兩年冇去維園行花市了，今年day成個一月放住假等轉新工，我就提議搵個平日下晝去逛，咁就唔怕多人啦～星期四嘅下午最適合，逛完維園花市晚上我就番SPACE返學，啱啱好～嗰日我哋搭巴士出到去銅鑼灣曉都未瞓醒，我哋係麥當奴坐一陣等佢瞓多一陣就出動了～
未瞓醒嘅曉呆呆的，冇話特別興奮，食冰糖葫蘆都木無表情咁，後來到人多又嘈嘅地方仲驚驚添，要媽媽抱，爸爸都唔得～買咗個George公仔俾佢就醒神番少少～通常去維園主要睇下啲乾貨嘛，啲年青人有咩流行嘅新搞作之類，但曉似乎唔太鍾意嘈+人多，反而睇花花就鍾意多啲，教咗佢，認得「桃花」同埋「桔」，唔知到而家仲記唔記得呢？因為路途遙遠，爸爸要自己帶曉返屯門，所以都唔敢點買嘢，當場買咗蝦叔叔嘅原隻蝦零食嚟試，即使覺得好好味都費事拎咁遠返去～
平時同親戚們冇話成日見住，對於曉曉嚟講真係好陌生，好在過年嘛，食完團年飯，過冇幾多日又會拜年時見面，似乎同啲表兄弟姊妹親切咗啲呢，不過認真玩到卡卡笑，似乎都係穎彤穎妍兩個表姐至夠功力﹗
曉& Rebecca．曉&曦曦
大年初一嘅一家三口@贖世主堂
食物方面，我哋一早就全線開通乜都俾曉曉食啦，除咗加工食物、醃製食物會有限制，原粒嘅nuts同硬糖可能有危險性之外，多數食物都俾佢食，有益嘅就食多啲，冇益嘅就食少啲吧～賀年食物方面，糕佢都ok喎，炸嘢就較喜歡蛋散，角仔同笑口棗就麻麻地，可能對佢嚟講算係硬吧？糖果方面只有俾佢食過軟糖同埋朱古力嘅，都係一粒起兩粒止啦～但佢就試左食瓜子，仲要食到停唔到口，媽媽剝瓜子唔叻，好在姑婆屋企有剝瓜子專用鉗﹗其他時候想食？搵爸爸啦～年初二食盆菜都食咗好多，而年初四去曉曉姑婆屋企就試咗少少福建食物”looun bia”(佢哋福建話係咁叫我就咁樣聽啦)，好似寫法係「潤餅」，我同福建人結咗婚五年幾都係第一次食咋，不過比起潤餅，曉曉對姑婆整嘅烤雞更有興趣，玩到好盡情嘅佢，一食完隻雞脾就係我懷抱中馬上倒下，居然拜拜下年係人哋屋企一秒瞓著，之後仲要享用埋姑婆丈公張床添～^^”
今個新年叫做睇咗兩次舞獅，年初一係聖堂第一次睇，嚇驚驚到要攬實媽媽，要話俾佢知叔叔同哥哥係裡面佢先至放鬆少少，之後有一日係華都商場食飯時又有舞獅，第二次好似淡定少少啦～
過咗正月十五，可以拆利是lu～多謝各位長輩嘅愛呀﹗