抵埗新加坡我就好想好想快啲過到關，快啲拎到行李，快啲出市區，同埋快啲返酒店check in了﹗因為班機到達時已經六點幾，如果唔係晚飯就會越搞越夜了，而且三個幾鐘嘅飛機都叫我好累好累了～
機場的「媽媽、BB」雕塑～
媽媽好努力係度填緊入境表格時，爸爸最好就係帶住曉去跑步步一陣，係飛機度困咗咁耐，需要舒展下筋骨﹗
爸爸設計故事一則－－
左圖：曉：「好大粒種子～」
右圖：曉：「我幫種子施肥～」
拎到行李，我哋換咗一身夏裝就可以出去市區啦～
嚟到新加坡嘅第一張一家三口合照﹗
擺pose嘅小朋友～
新加坡嘅地鐵四通八達，家姐借咗兩張「新加坡八達通」EZ link俾我哋，我哋充一充值就可以出發了﹗我哋今次住嘅酒店Oasia Hotel Novena Singapore正正係Novena MRT站，由機場出發都要轉兩次丫，曉搭完好耐飛機已經唔係好耐煩了，一上地鐵就要「落車﹗」，結果又係要唱歌唱歌唱歌啦～果然好近﹗Novena MRT其中一個出口直接有條地下通道去到酒店電梯大堂，中間經過一個細細地嘅美食廣場，我哋就係其中一間有位坐嘅餐廳度食晚飯了～
check in最慢嘅部份就係解釋俾我哋聽club benefit了，我book咗較高樓層貴少少嘅club room，可以享用22/F「The Living Room」嘅設施之餘，又有其他增值服務﹗美姨都問我做乜住呢度，以為因為近醫院我會有discount之類，我知附近有醫院，但估唔到係五間醫院圍住我哋咁誇張囉～其實當初book呢間酒店係貪佢位置方便，泳池好似唔錯，較平嘅價錢房間裡面可以有浴缸，包早餐，房間個樣又靚靚地咁～嚟到至知club room原來有24小時免費飲品，晚上6-8pm更有happy hour免費酒精飲品，最令人讚歎嘅係每日有兩件免費laundry，本身諗住厚嘅衫褲就唔自己洗了，而家可以俾佢洗呢，咁大個女未享用過酒店嘅laundry service﹗有免費房內mini bar嘅酒店今時今日都唔少，但新加坡果然係新加坡，選擇都健康啲，清水至外就係有氣礦泉水同埋我好喜愛嘅椰青水了～
我哋房間係23/F，可以望到遠，不過窗口對面近嘅就係人哋啲住宅，所以都要關窗簾～
曉最喜歡當然係跳上大床啦﹗
我哋雖然要求咗bb床，但似乎張床太細了，就同屋企曉已經唔再瞓嗰張bb床一樣size，所以我哋都冇attempt放佢入去瞓覺，直接三個人一齊瞓大床算數了～
贈送嘅bb沐浴用品我哋就帶咗返嚟，用就未試用，暫時變成曉嘅玩具，最鍾意開關拉鍊，又放嘢入去又拎出嚟咁，再扮倒倒倒啲樽嚟搽下面咁～
唔好講住了，我哋出去食晚飯啦﹗
由地鐵站返酒店時經過個小型美食廣場，見到呢間Real Food，睇睇餐牌，有沙律有pasta有pizza，坐得都幾舒服，應該都ok，就試下啦～仔細睇餐牌先發現原來係素食餐廳呢﹗
我哋叫咗蕃茄蘑菇長通粉，pizza，最重要係今晚亮點，好清新嘅沙律－－
沙律dressing係甜蜜嘅自家製蘋果橙醬，內容有飽肚又健康嘅蕃薯、粟米、鷹嘴豆、南瓜，有清脆口感嘅小白蘿蔔、青瓜、青蘋果，有蜜味嘅木瓜、菠蘿，口感又豐富，味道又豐富，太太太好味了，我哋都話如果係香港lunch有得食呢個沙律，應該會好受OL們歡迎，又飽肚又健康又好味～雖然材料唔係咩貴價材料，但都好多功夫呢，南瓜同蕃薯要煮到剛剛好，青蘋果又要新鮮切先唔會變黃，材料種類咁多，樣樣只係啲啲三幾粒，準備起嚟都咪話唔麻煩，難怪我哋等咗咁耐，三款食物都千呼萬喚至出來﹗
因為等嘅時間耐，我哋咪揭下餐廳書架嘅雜誌同書囉，我同曉揭揭本親子旅遊雜誌，入面好多小朋友嘅相片，所以佢都睇到津津有味，爸爸又睇下另外其他書，好在曉都未餓到唔耐煩～呢餐都食得滿意，但真係累得不得了﹗
返到上房要沖涼瞓覺啦﹗好在有浴缸又有企缸，我同曉可以同步沖涼，跟住就奶奶瞓覺了～養精蓄銳，我哋第二朝約咗美姨婆丫﹗
待續
前往其他新加坡旅遊blog