19-11-2016:曉曉的第一次迪士尼(下).愛與怕的邊緣

既然瞓醒,換好片乾乾淨淨,食咗爆谷開心番,應該可以再作戰了﹗

原本想去睇替代「米奇金獎音樂劇」嘅新show「米奇魔法書房」,點知我哋提早15分鐘去到都滿座了﹗於是爸爸提議再去玩多一次小小世界,狀態好的話曉曉應該可以更enjoy佢所喜歡嘅「而妙肖」~

而妙肖

喜愛樓梯的年齡

雖然第二次嘅「而妙肖」依然要黏到實,但玩完第二次之後曉曉居然主動話要encore,所以我哋今次去迪士尼玩咗三次小小世界,創下我嘅個人紀錄呢~哈~曉曉喜歡就好好﹗

之後我哋出去玩埋轉轉茶杯,貪排隊唔算耐~

曉曉開頭好緊張,但後來我話中間嗰個轉盤係「揸車車」之後,態度有點轉變,個人放鬆咗少少~不過一次嘅時間到啦﹗

今次唔好遲,我哋提早半個鐘過去米奇魔法書房,我哋前面已經有好多人等緊了﹗

排隊最攰嘅唔係對腳,而係要不停玩﹗﹗好在曉曉都算乖,我全日都冇需要出動絕招「de de de」(請用廣東話第4聲、第2聲同埋第1聲讀呢三個de),因為要同爸爸溝通又唔想俾當事人知道,要用暗號,好在,到離場都未駛開呢盒提子乾~入座了﹗我哋雖然坐右邊嘅column,但都算幾中間幾前,good good﹗其實新劇骨幹同舊嘅都差唔多,都係串連起好多個唔同迪士尼故事嘅歌曲,上次以頒獎典禮形式,今次就話冰雪奇緣嘅小白(sorry,我其實慣咗叫佢做雪寶,哈,因為第一次睇Frozen係睇大陸版﹗)係魔法書度走咗出嚟,米奇要搵番屬於佢嘅世界送番佢入去~當然closing就係Elsa唱Let it go啦,唔知點解我覺得好感動,可能覺得Elsa責任重大,要回饋廣大小朋友Elsa迷嘅期待啩?幾好睇呀,曉曉都睇得好專心,我當初仲驚佢會怕黑會喊,點知坐定定係爸爸上面冇郁過眼仔定定,會唔會因此迷上Elsa?

睇完show我哋有諗過買啲嘢食睇夜間巡遊,但周圍都冇乜賣啲啱嘅食物,我哋見大家都有啲爆谷撐住個肚,好啦,都係睇埋巡遊先搵嘢食啦,搵咗個靚靚位坐低等開始~原來呢個夜間巡遊之前有睇過了,不過睇第二次都仲覺得好夢幻同好歡樂,曉曉緊緊貼住我冇郁冇扭計,day又好努力影相,我自己都可以投入去欣賞演出當中呢﹗不過坐到最近巡遊路線,有啲位都覺得音樂有啲嘈得滯﹗

原先玩到盡嘅plan係想睇埋煙花至走,但睇完巡遊見到曉曉又餓又攰,我哋有諗過早啲走,但外面食的話最近都要出到青衣或者東涌先有嘢食,係樂園入面見啲食店都關門,問一問職員至知原來除咗明日世界嘅快餐店之外,只有美國小鎮大街嘅兩間餐廳未關門,貴得嚟經濟少少又想食得快啲,我哋決定食快餐~唉,正常嘅burger/炸魚配難食嘅薯條加杯汽水都要$99,實在太太太過份了,整得好食少少都好丫~我哋兩個大人一邊食一邊叫苦,曉曉就好投入咁點醬,第一次嘛,又唔係成日有得俾佢食我都唔限制太多~只係要不停講,你要食薯條至得㗎,唔可以淨係食醬㗎~後來要佢食完包包/魚柳至准繼續點囉~

食飽飽嘅時候,煙花都已經放完了,深深感受到帶住小朋友出去玩係要隨緣、睇開啲~不過比起睇煙花,我認為更重要嘅活動係買souvenir﹗其實只想買一樣俾曉曉、一樣俾逸逸啫~

曉曉好喜歡髮夾,我都買咗同系列嘅另一套髮夾俾逸逸,等逸bb大個啲、頭髮多啲長啲就carry到㗎啦,不過唔好要暐姨姨等得太耐喎~另外買咗㗎Elsa車仔俾曉曉,不過好似我鍾意架車仔多過佢囉~

米奇同米妮呀~

shopping結束我哋都走lu~

理論上應該係攰曉~

當我筋疲力盡嘅時候,估唔到⋯

曉曉去到車站等地鐵時佢話要:「落地行樓梯﹗」你日頭時一定冇盡力行路丫~

古惑曉~

下次幾時再去迪士尼呢?可能等埋逸bb大個啲我哋一齊去啦~

Comments

comments

在《19-11-2016:曉曉的第一次迪士尼(下).愛與怕的邊緣》中有 5 則留言

  1. 到今日為止,曉曉同逸逸已經一齊去過好多地方玩,一齊住過迪士尼酒店,連飛機都一齊搭埋,竟然都仲未一齊去過迪士尼樂園。

  2. 曉曉生性膽小,於此已初見端倪。小朋友膽小是好事,大人較放心。膽小者,顧慮後果,謹慎,步步為營。這種個性,日後可以鍛鍊,提升膽量。

wuchihung 發表迴響 取消回覆

你的電子郵件位址並不會被公開。 必要欄位標記為 *