由曉曉好鍾意唱「而妙肖」(世界真細小)開始，我已經好想同曉曉去一次迪士尼，本來姨媽姨丈係八月份時邀約一齊去玩，但嗰陣天氣實在太熱，而曉曉當時都仲成日要抱，諗起都覺得辛苦，所以就拒絕咗佢哋冇一齊去了～最近除咗繼續喜歡「而妙肖」，進化到自己識得唱晒成首之外，又愛上了睇表姐俾嘅迪士尼系列舊圖書，認識咗米奇老鼠同高飛等角色，我就更加想去啦～曾經諗過結婚周年去迪士尼酒店住一晚順便入去樂園玩，但見到價錢嚇怕怕，最後去咗澳門玩(未打blog添)～而家十一月天氣又唔太凍又唔太熱，呢個爸爸短週，我哋又冇乜其他特別事情嘅星期六，決定去吧﹗
今次真係零preparation，HA合作社其實有得買特價門票，但決定得倉卒，要專登去亞皆老街實在太大費周章，豪俾佢啦～
去到呢個星期尾睇天文台天氣預報，話星期六會落雨，我都好似小學生期待學校旅行嘅心情咁，又擔心又失望，結果到星期六早上真係落雨，而且仲大大地添，爸爸search下其他室內去玩嘅地方我都完全提唔起勁，決定⋯去就去啦，落雨就落雨啦，應該唔會落成日啩？我哋等曉曉開始眼瞓嘅時間就出門口，果然佢上140M小巴冇耐就瞓著了，到轉搭地鐵迪士尼線時佢都仲同周公約會緊呢，個廣播話「開始奇妙嘅旅程」之類，我就話「奇妙旅程由瞓覺開始」囉～
可能周遭環境太熱鬧，曉曉未瞓夠，但落咗地鐵之後好快就醒了，矇矇鬆鬆咁跟住我哋買飛入園﹗原來而家有迪士尼app，唔駛拎住一份份嘅樂園指南，望住個app就有地圖，仲知道開show時間同各個遊樂設施嘅等候時間呢，餐廳訂座嘅電話號碼都有﹗
本身有諗過要唔要帶bb車嚟，其實曉曉已經有幾個月冇坐過自己部坐駕，搬咗屋之後出入要搭巴士小巴，其實用得少咗好多，有見上次去北海道旭山動物園有得坐車我哋輕鬆好多(請參閱：2-9-2016：北海道三人行day 6(part 1)．旭山動物園(上)之「葉公好龍」)，本身都諗過帶，但姐夫話記得迪士尼有得借，我哋就決定唔帶了，哈，去到時完全忘記咗呢件事，好在結果曉曉自己都行好多路，我哋都冇話抱得好攰啫～
呆曉~
以前去迪士尼次次都有去食美國小鎮大街嘅Corner Cafe，印象中最深刻嘅係當年啱啱開幕時第一次去嗰陣食過，個忌廉磨菇湯真係好好味，之後每一次都會去食dinner～最近一次去迪士尼係2014年夏秋之間，我仲記得嗰次係曉曉係我肚入面大概10w左右，因為肚子開始脹，仲要專登早一日去買人生第一條孕婦褲，為咗去迪士尼行得舒服啲，嗰次我哋book唔到Corner Cafe就去食咗中菜～今次都想食番Corner Cafe，但我download咗個app時再打電話去dinner已經book到full咗啦，時間差唔多十二點，曉曉又處於「懞～」嘅狀態，我哋決定walk in去食咗lunch先﹗
曉曉食兒童餐﹗
我幫佢揀咗佢喜愛嘅通粉做主菜～我同day就share咗一個Coca-Cola聖誕套餐，另外單點一個主菜～曉曉入到餐廳已經醒咗大半，佢份餐嚟到直情雙眼發光，而我一件份兒童餐，我就知道曉曉應該食得晒～一小堆通粉、佢喜歡嘅西瓜、佢喜歡嘅蛋糕、蔬菜仲要係好多菇菇﹗結果除咗佢請咗我食一條西蘭花之外，基本上只食剩咗少少紅蘿蔔同西蘭花，但要知道，佢除咗食自己份兒童餐之外，仲有食少少我哋嘅大人餐囉～至於我哋嘅食物都幾好味，套餐嘅沙律day覺得調味甜咗少少，但後來話佢知呢個係Coca-Cola套餐佢就明白+接受了，主菜嘅火雞同牛扒都好嫰，連曉曉都鐘意食，樹頭蛋糕濃郁嘅朱古力味配上酸酸甜甜嘅berries同澆汁好好味，最重要係甜品嘅擺盤非常fancy～另外散叫嘅肉丸長通粉味道唔係唔好，但我覺得膩咗少少，好在曉曉幫手食啲芝士～
食飽飽我哋影咗陣相，決定去排小熊維尼，30分鐘唔算等得耐，排隊時睇到啲Winnie the Pooh曉曉都好高興~
佢不嬲唔知佢係特別身份嘅小熊維尼，只係一隻幾可愛嘅bear bear，而係媽媽其中一件睡衣上面會見到佢而已，嚟到迪士尼先知道佢咁出名㗎﹗不過嘛，我哋覺得小熊維尼呢個ride好可愛，原來對曉曉嚟講都係好刺激，可能係第一次坐呢類遊樂設施吧，全程捉到我實一實，雖然冇喊過，但睇得出佢好緊張，眼定定咁望住入面見到嘅嘢，曉曉，一年後再嚟的話你應該會喜歡得不得了啦～
上晝瞓得唔夠，出嚟時曉又已經有啲眼瞓，本來想係轉轉茶杯出面嘅長椅同佢瞓，可能周邊太熱鬧吧，瞓唔著﹗咁唔瞓就不如去坐一次「而妙肖」啦~
小小世界嘅冷氣果然好舒服，第一次坐入去可能本身眼瞓，加上緊張，曉曉又係眼定定咁望住，pat pat黏到我哋實一實～離場嗰度有幾張長椅，仲有得涼冷氣，有其他大人抱住小朋友係度瞓覺，我哋決定係度瞓一覺啦～
果然瞓覺環境係好重要的，不過，邊一個人係更加重要，曉曉最後的確成功係度瞓到，不過第一個瞓著嘅係爸爸囉～後來曉瞓著我可以坐下篤篤手機、打下機，覺得，哎吔，每人五百幾蚊入嚟坐同埋篤手機真係好浪費丫﹗﹗到曉曉瞓得咁上下時間，醒咗都唔怕嘅程度之後，我哋決定出去行下﹗
呢個時間啱啱有Star Wars嘅新show，我哋就去湊下熱鬧啦，原來比起「演出」，更重要係「參與」，個show歡迎4-12歲嘅小朋友一齊train做戰士，仲有costume著添，好cute呀，好明顯有啲真係未夠4歲囉～一人一把發光劍，一齊練習揮舞，之後仲可以排隊打敵人添呀﹗好搞笑～覺得個show最好睇嘅一定係啲家長喇﹗呢個時候曉曉醒咗，比起個show，佢更加對第一次食嘅爆谷有興趣，食食食唔停﹗
為咗換片，我哋再次出番去美國小鎮大街嘅baby care room，以前嚟咁多次迪士尼，一次都未入過去，今日我哋光顧咗三次呢～位置就係Corner Cafe後面，入面好舒服，換片嗰隔有三個換片位，後面個小廚房有個小雪櫃可以存放bb食物，又有微波爐同電熱水壺可以借用，要餵細b食飯又有high chair可以借用，係呢度食飯bb會專心啲吧，仲有兩個獨立房可以餵奶泵奶添，真係幾好～不過樂園其他廁所好似冇換片枱吧？有需要唯有返過嚟呢度囉～
迪士尼既聖誕裝飾
可愛曉~
呢篇blog太長了，我哋下集再繼續去玩先﹗