其實不嬲都鍾意行山，但自從大肚後，只係babymoon時係台北陽明山行過少少(13-12-2014：台北babymoon day 2(part 2)．漫步陽明山之七星山、冷水坑、牛奶湖、涓絲瀑布)，之後直到曉曉出世到識行，一直都未去過行山，直至今個重陽假期，18m嘅曉曉行路叻咗好多，最近行樓梯對佢嚟講簡直有一種魔力，一見到樓梯就難以自拔地不停行，我哋應該係時候可以重出江湖了，哈，其實帶得佢去都預咗由頭抱到落尾啦﹗

day揀路線時揀咗交通方便，路程比較短又輕鬆嘅城門水塘，以前我哋去行山通常都係target睇靚風景，又要有啲挑戰性，今次呢類1.5星、三小時嘅合家歡路程真係比較少會入圍，我哋又試下啦～

今次行嘅路線～

去城門水塘行山入口要係荃灣兆和街搭小巴，於是我同咗兩父女去我平時返工時最鍾意去嘅大家樂食早餐，吓？大家樂？heehee，唔知點解覺得千色店呢度間大家樂特別好食，服務特別好，我返親仁濟都會去食喎～食飽飽就諗住去搭小巴啦，哇﹗哇﹗哇﹗條隊嚇死人了～由小巴站牌一路到街尾好長龍不特止，原來仲有警察叔叔指揮大家隔開少少通道，後面空地位置仲有一個蛇餅﹗係上游位置有個阿叔話佢等咗半個鐘﹗吓，如果由隊尾排起真係一個鐘都唔出奇～最閉我哋排咁耐隊要娛樂阿曉，到上山之前我哋兩個已經冇晒力，當機立段，搭的士﹗車程$50唔算貴，不過差唔多到時因為車路旁有好多違例泊車，搞到原本足夠兩架車來回行車嘅車道就變得好窄，的士司機大佬都躁咗，塞到不得了，佢話每逢星期六日公眾假期都係咁喎，難怪咁躁啦～搭的士時喚起童年嘅記憶，以前爹媽仲係可風教書時，每逢有外地親友嚟香港就會帶佢哋去行城門水塘，咁又係嘅，easily accessible，都算係城市裡面嘅綠洲嘅～

一開始嘅樓梯曉曉已經急不及待，連爸爸要去個廁所先佢都唔想等，只想行樓梯行樓梯行樓梯﹗

樓梯我嚟啦～

上到涼亭小休一會～

可惜行到上樓梯嘅盡頭時佢唔係冇力嘅，但問題係已經十點半，佢嘅生理時鐘響起，周公呼喚佢啦，所以行咗冇耐就變成爸爸抱佢瞓覺了～

影下相～

有爸爸抱住曉曉，媽媽可以輕鬆少少～

所以初段路程係拍拖段，可以好好咁欣賞風景，又好好咁影下相﹗我又怕我哋行得太快到曉曉瞓醒時已經差唔多落山，我又怕我哋行得太慢會損耗太多體力喎～

醒咗～

明明有草地可以踩下，但曉曉呢個城市人唔係好敢踩草地，喊住咁又氹住佢先肯行過嚟，但一出番去石屎路即刻生龍活虎囉～

一路上人真係好多好多好多，多得嚟總算少過行商場嘅，而且沿路都有樹蔭，天氣又涼涼地，行得都舒服，可能太多年冇嚟，覺得風景都幾靚﹗其中有個位可以落去更靠近水塘，因為水塘底部嘅深淺不一吧，水嘅顏色好有層次，我話，如果係攝影高手，應該可以將城門水塘變成九寨溝呢﹗

到曉曉醒咗之後我哋就變成蟻行速度啦，因為佢有時想落地拖實(拖住行)、有時想跑步步(唔拖住行)、有時又想抱住，最弊係佢落地跑步步時好多時會行番轉頭⋯

⋯更會毫無預警地突然坐低休息﹗哈～我哋話佢行嘅distance唔少，但displacement就真係得啲啲囉～每逢有其他遊人經過我哋時見到呢個細細小朋友自己行都會大家讚賞，我諗佢都有少少沾沾吧？不過即使俾佢自己行都要揀下路，太急嘅上斜落斜都搞唔掂，有馬騮時又費事俾佢自己行，結果我哋都抱唔少～

山上遊人唔少，馬騮都唔少﹗

到行咗大半時我哋搵個冇馬騮嘅郊遊點坐低食咗三文治，恢復一下體力～之前我哋目擊咗有小女孩行住食百力滋，搞到俾馬騮追，真係睇見到心驚，我哋要食嘢都要小心啲，而經過佢哋時千祈唔好隨便做啲可疑嘅舉動丫﹗打開袋摷嘢呢啲動作真係可免則免啦～

結果三小時嘅路程，連埋食嘢、休息、影相，我哋用咗四個鐘頭嚟完成，都算好合理啦～揹住曉行咁多路居然腰冇痠，只係雙腳比較攰，比起上次去富良野時行去麵包超人店反而更輕鬆呢(打呢篇blog時北海道blog未完成)，可能今次心情輕鬆啲，行嘅路變化多啲，又有中途休息吧～

到達主壩﹗

開心～

坐低休息下先～

行完⋯獎勵大家食一支紅豆雪條﹗三個人share，幾時都唔怕肥啦～

曉：我去過城門郊野公園啦﹗

我哋落番去荃灣，去Pokka食個tea，今日嘅旅程就結束啦﹗

Comments

comments