終於嚟到最後一日行程了，我就玩多一兩個禮拜都仲有精力，但曉已經鳥倦知還、歸心似箭了，估唔到最思鄉嘅係一個16m嘅小朋友～
最後一晚住嘅Keio Plaza Hotel Sapporo唔包早餐，為咗節省時間，我哋決定一早check out，行李都唔寄存酒店了，寧願花多少少錢係札幌駅租兩個locker放行李，反正我哋玩完上晝嘅景點之後都要返嚟札幌駅搭JR出去新千歲機場～放低行李，一身輕鬆，當然係要去搵食先啦～
最快見到嘅係日本時時出現嘅Mister Donut，反正今個trip都未食過就食下啦～
本身諗住一人一件donut再配飲品應該就ok，但我哋坐低食時見到周圍嘅人都order得非常澎湃，三兩件donut係基本，有啲人仲會叫多啲其他嘢食，最驚嚇嘅係有個大大件嘅後生仔好似食咗七件donut？﹗我哋食完donut之後果然都未夠飽，想食啲熱嘢暖下個胃，我哋三個人再share多一碗湯麵，咁就夠晒飽喇～
因為家姐姐夫嘅推介，我哋決定今個北海道之旅嘅最後一個行程去白色戀人公園，原來除咗參觀餅乾嘅製作過程之外，仲有好多其他嘢睇，又有好多影相位，仲有美食﹗雖然白色戀人公園可以地鐵直接去到，但原來都要搭好多個站呢，落車嘅指示都好清晰～
即買即著﹗我哋今日著咗旭山動物園買嘅親子裝呀～cute嘛？
白色戀人公園位於宮之沢站，好遠丫，所以人煙稀少～右下個耳鼻喉科指示牌咁可愛嘅？感覺上要帶小朋友去睇醫生嘅話呢間會有多啲好感～
步行前往白色戀人公園時嘅曉眼泛淚光，因為有個小朋友係地下通道經過人哋餐廳時玩自動門，正正只係媽媽放嘢入去爸爸個背囊嘅幾十秒視線暫時離開，手仔就夾住咗了，即刻爆喊，嚇死媽媽啦，仲有嚇死餐廳嘅職員丫～好在去去白色戀人公園見到好多可愛嘅裝飾時就慢慢忘記啦～
一入去已經有影相位，係一堆迷你屋，曉入去住啱啱好呀﹗但佢要：「媽媽坐～」好辛苦丫﹗
好啦好啦，我哋先買飛入場參觀吧，之後再慢慢影相﹗哇，原來有得製作相片紀念白之戀人鐵盒，我哋都整一盒啦，做紀念品俾自己都好丫～
指定動作影相位～
入去都幾多嘢睇，有介紹朱古力嘅歷史、又有展示唔同年代同朱古力有關嘅器皿、又有介紹白之戀人朱古力餅嘅製作方法～
當然唔少得我最鍾意睇嘅生產線﹗
睇住啲一塊塊嘅餅乾進入唔同嘅機器，再一塊塊咁包裝，唔知點解會睇到唔捨得走，最犀利嘅係，有故障要停機時啲工人會摩打手執走啲餅，之後再開機時再係適當時候塞塞塞番入去，動作好利落，最咗要眼明手快之外，最重要係要保持冷靜～勁﹗
我睇到入迷，曉又想走時，不如食一塊入場時一人一塊嘅白之戀人啦～
好味～
原來大個啲嘅小朋友仲可以參加烹飪班㗎～
之後仲有唔關事嘅留聲機展覽同埋玩具展覽，一場嚟到都可以睇下嘅～
秒殺睇完嘅留聲機展覽～
玩具就有趣啲～曉曉認得Hello Kitty呀～
本來好想去cafe坐低食cake同埋啲好華麗嘅芭菲，但好多人排隊呀，我哋唔夠時間呢～
退而求其次，買咗杯靚靚雪糕嚟食，今個北海道trip真係食咗好多好多雪糕丫﹗
要把握時間影相丫，個花園好靚～
仲有盛開嘅花花～
仲有時間，曉又出返去迷你屋﹗
曉(設計對白)：隨便坐﹗我要瞓一陣先啦～
嘩，突然間，花園嗰度有個雕塑噴啲泡泡出嚟，抬頭一望，原來巨型機械音樂演出開始了﹗
呢邊嘅鐘樓打開門，有唔同嘅動物轉出來，望去建築物嘅另一邊，有人型公仔演奏樂器，另一邊又有其他公仔係度合唱，好夢幻，好豐富呀～個演出都幾長呢，抬頭睇抬到有啲攰丫～
我哋攰嘅時候，曉直情好眼瞓添，我哋睇完演出就夠鐘要走啦，走嘅時候佢已經係揹帶上呼呼大睡了～
影呢張花盆係，我哋好讚嘆北海道連路邊嘅花盆都裝飾得咁靚，仲要有薰衣草﹗
出番去札幌站，day抱住曉繼續瞓，我？哎吔吔，之前去Esta間Uniqlo旗艦店shopping嗰日冇諗清楚，買俾曉嘅衫全部都買咗80碼，冇錯，佢而家著80碼係啱啱好，但呢啲係冬天衫嘛，到冬天時應該漸漸90碼會比較fit，所以我就拎啲衫過去Uniqlo度換size，哎吔，當初排咗遊客隊直接免稅，而家要換size手續就繁複好多了，搞咗好耐丫，day一定咕嚕我做乜咁耐都未返來﹗好在我搞掂時曉先瞓醒啫～
我哋由locker拎行李時，另一件好重要嘅事就係要買車站便當，每次去日本都好想食火車車站便當，今個trip仲未食丫，我哋正經坐低食lunch嘅時間唔夠，不如就買咗去機場食啦～
係Uniqlo搞耐咗，我哋去機場時都好趕呀，趕住搭去機場嘅火車，落車後又趕住過去國際航班嘅terminal，急急腳急急腳一直都未停過，要暫時餵養肚餓嘅曉唯有俾住佢食小樽買嘅小蛋糕先～
好不容易去到登機閘口，我哋終於可以坐低品嚐個便當了，果然好精美丫，而餐單嘅設計係，即使凍晒放咗好耐都仲好好味～
不過嘛，對於三個肚餓嘅人嚟講(曉係好－－大－－食－－的﹗)，兩份車站便當嘅portion比較細，我再買咗炸雞同埋麵包嚟加碼，好在啫，係飛機上全靠有麵包俾曉食～
好啦好啦，仲有時間，跑多啲啦，上到飛機就要困住係同一個位置幾個鐘頭了～
要返香港lu～回程嘅五個鐘都唔容易，曉又攰又瞓唔到，喊得好勁，瞓著咗都摘醒幾次爆喊，我又要綁番揹帶企起身暗佢再瞓好幾次～果然帶bb去旅行最辛苦都係搭飛機同長途車～好在16m呢次應該都係最辛苦的了，21m時我哋再去新加坡，到時搭飛機就好好多啦～
白色戀人公園官方網站：
http://www.shiroikoibitopark.jp/taiwan/
北海道三人行blog完滿結束
前往其他日本旅遊blog