雖然先一晚曉發燒又扭計，瞓一覺之後似乎有好轉，成晚都冇再發燒，徵狀就只有綠鼻涕同埋唔好老脾，既然如此，一場嚟到又買好晒飛，我哋決定照出發去美瑛嘅day tour～
之前都有提過，今次我哋個北海道之旅係旺季過後去嘅，好處係冇咁多人，又唔似peak season咁貴，當然花花就冇旺季時咁靚啦，呢個都係其次，原來對於唔自駕嘅自由行嚟講，要周圍遊覽係真係有啲困難㗎﹗如果你search去美瑛的話，如果唔自駕，絕大多數嘅人都係踩單車遊覽，但我哋帶住個未夠兩歲嘅小朋友，踩單車真係無能為力，即使有得租，美瑛大量又上又落嘅山坡路，家庭車都好難控制～結論都係要參加tour﹗旺季期間，tour日日出發，但而家到咗尾聲，就只有weekend有，好在我哋book三晚富良野酒店時，臨尾仲挨住一個星期六，所以行程有變，原本有考慮離開富良野嗰日帶晒行李去旭川站鎖好再去旭山動物園，咁就可以直接唔浪費時間咁經旭川返札幌啦，但而家唯有早一日day trip咁去旭川，留番個星期六俾美瑛，咁先參加到weekend限定day tour﹗
我哋參加嘅係JR自己嘅Twinkle Bus Tour，一場去到美瑛，我哋決定上晝一個bus tour「展望之路」，下晝一個tour「拼布之路」，再之後搭埋Norokko慢車號由美瑛返富良野添，即使唔係好全面嘅美瑛遊，總算重點項目都cover到～
係酒店食完早餐行出嚟，離火車開車仲有啲時間，我哋係酒店周邊影下相先，嚟咗幾日都未影過～
啊，對面嘅空地有節目喎，我哋下晝返到嚟睇下仲有冇機會參與下先～
曉車長，帶我哋去美瑛吧﹗
由富良野去美瑛，火車會經過一啲山路，有啲部份得一條火車軌㗎咋～
所以會見到火車軌加闊幾條線又收窄得番一條線嘅路軌～
去到美瑛，啱啱有架Norroko慢車號停咗係度準備開車呀，好colourful好靚呀，我哋下晝就會搭啦﹗
出站時已經聽到關於Twinkle Bus Tour嘅廣播，提醒大家要趕緊時間上車，可能來自唔同國家嘅遊客眾多，以幾種語言輪流廣播，唔知係咪因為聽完中文同英文嘅廣播，所以我覺得韓文嘅廣播我都聽得好明呢？哈～
因為bus tour嘅名額有限，我哋day 2係札幌時都有少少緊張要盡早book，點知原來都唔少人嚟到先即場報名呢，團友之中似乎香港中都佔唔少～雖然如此，沿途導遊都淨係用日文講解，而每一站嘅上車時間就大大隻字咁係落車前舉牌俾大家見到，所以唔識聽都好安心～令我諗起當年係韓國搭長途巴士由釜山去麗水(請參閱：25-5-2013：釜山麗水day 1(part 1)．往麗水去也)，因為唔識聽，係休息站時去個廁所都戰戰兢兢，驚巴士唔等我哋呢～
我哋搭嘅「美瑛號」～
美瑛號乘客x3
開車之後離開車站一陣，好快就變咗郊外嘅感覺，美瑛俾我嘅印象就係好多山丘，上上落落咁，而且啲農田都好整齊咁趴係啲山丘上面～
其實個導遊已經開始介紹「景點」了，因為有部份bus tour嘅景點係車上欣賞㗎，因為做功課做唔夠，我都唔知睇咗咩「景點」，refer番bus tour嘅資料單張，導遊介紹嘅應該係「三愛之丘」～
第一個落車嘅目的地係「拓真館」～
原來拓真館係一個照片展示廳，入去參觀要除鞋，好呀，順便可以放鬆放鬆～裡面展示咗美瑛春、夏、秋、冬嘅照片，真係靚得好－－交－－關－－﹗雖然大自然係真係好靚，但問題係，如果有高超嘅攝影技術，有時啲相真係分分鐘靚過實景囉～拓真館裡面唔可以影相，所以只可以影係記憶入面啦～
拓真館附近環景都好優美～
係呢度有個小插曲，話說嗰日我著嗰件tee係前年去台灣時，欣賞「勇氣即興主舞台」時買嘅紀念品，同團有香港遊客見到我件衫寫住「台北」，就大大聲用廣東話講都有台灣人嚟喎之類嘅嘢，又對曉評頭品足(咁當然係positive嘅評價嘅)，我哋其實都係香港人嚟㗎～我唔想篤爆你令你難堪，搞到我哋要講嘢都要細聲啲～
咦，下一個落車嘅地方會停30分鐘咁耐㗎？即係勁嘢喎～我哋只見有成排成排嘅旅遊巴停係度，一入去個大門就明白啦，原來呢個「四季彩之丘」係上午「展望之路」嘅重點所在﹗﹗
入面係－－大大片花田呀﹗﹗
一比起上嚟，富良野嘅Flowerland實在太小規模了，即使去Flowerland時我哋已經好興奮～不過今次可惜嘅係，曉曉勁眼瞓，好快倒下，冇得同花花影靚靚合照呢～
好靚呀～邊個話九月去北海道「乜嘢都冇」？﹗其實咁講嘅人係覺得春天要賞櫻、夏天要睇薰衣草、秋天要睇紅葉、冬天要睇雪，九月薰衣草又冇喇，紅葉又未到，稱之為「乜嘢都冇」，其實我自己深信，去日本係一年365日都會咁好玩～
曉？瞓著咗，唔好理佢啦重難月日我哋兩個自己影靚靚自拍～
觀光農田都要好好維護㗎，花開始唔靚就要剷起連根拔，拿拿聲再種其他啱季節嘅花～
唔⋯我覺得⋯呢度⋯好適合練玉女心經﹗^^”(odd咗)
雖然地方好大，原來30分鐘都好夠周圍影相了，大滿足～
上車之後，其實仲有一個車上遊覽嘅「新榮之丘」景點，但對於矇查查嘅我哋嚟講，上晝嘅行程已經結束啦～
返回美瑛站，唔夠一個鐘之後，我哋又要參加下晝嘅「拼布之路」bus tour，所以午餐要快丫，隨便係附近嘅食堂拿拿聲解決就好了～
兩個簡單定食快快share～
曉今個trip都幾思鄉，我哋頭尾八日行程，到第五、六日左右已經有提起想返屋企，胃口亦比較差，可能日本嘅食物種類、味道嘅變化較少吧﹗明明我嘅廚藝好一般，但次次去完旅行返到屋企佢都會特別捧場，食好多住家飯，原來小朋友都會鳥倦知還呢～
我哋食午飯嘅食堂～
餐廳外面有個小鐘樓幾靚呢～
好啦好啦，我哋又要去準備上車參加下午嘅行程lu～
JR北海道觀光產品網站(內容隨季節變更)：
http://www2.jrhokkaido.co.jp/global/chinese/travel/index.html
前往其他日本旅遊blog