day 6嘅行程比較輕鬆，只有一個目的地，就係去旭川嘅旭山動物園～大多數嘅人去旭山動物園都由札幌出發，可以搭好可愛嘅動物園號JR去到旭川，我哋就住富良野呢幾日之中揀一個full day由富良野出發，其實花嘅時間差唔多㗎咋，搭整條JR富良野線到旭川總站～

第二朝嘅Furano Natulux Hotel早餐我哋揀咗西式，賣相味道都好，無論和式定西式都必定配一樽富良野新鮮牛奶，正～不過嘛，一場去到日本，我都係鍾意和式早餐，所以Natulux嘅第三個早上我都係食番和式﹗嚟到旅程嘅第六日，曉曉對於街外嘅食物開始厭倦，食得比平時少，好啦，媽媽讓件蜜瓜俾你食啦～

去到火車站，我哋要搭嘅嗰班火車埋站，嘩，原來架火車載滿高中生，全部都係度落車返學去，呢火車班次咁疏，即是每日都全人類搭同一班車，搭唔到就肯定遲到了﹗見到富良野嘅高中生，感覺比起東京嘅學生樸素得多呢～

(暫時)得我哋嘅車廂好free，可以自由坐丫﹗

平時曉曉通常十點幾先瞓早上覺，但今日唔知點解出發時就瞓了，所以去程比較輕鬆，話晒都要一個鐘火車+45分鐘巴士先去到動物園呢﹗去到旭川火車站時有啲驚訝，對於我哋講，旭川＝好出名嘅動物園only，但原來旭川本身係一個比較繁榮嘅城市呢，火車站又新又大又靚，而一出去巴士站就見到大商場林立，同富良野真係兩個世界～去動物園嘅遊客好多，架巴士由總站出發時已經滿座了，好在我哋排得算前有位坐～

去到動物園，買飛入場咯﹗估唔到賣飛係全自助呢～

好好呀，有bb車免費借用，零手續，見到有就可以推了，平時咁少坐bb車，好在曉曉又肯坐喎～之後曉曉想落地跑步步時，架車用嚟放背囊都好好，不過缺點係啲車轆唔係360度旋轉，所以推起上嚟轉彎有啲難～

試坐﹗

天氣估唔到咁曬呢，想睇下紀念品店有冇太陽帽買俾曉，但只有大人size，唯有太曬時開遮啦～動物園入場嘅遊人，除咗一家大細之外，有好多學校都帶小朋友嚟參觀呢，小學生又有，幼稚園又有，佢哋都好乖呀，去廁所時都好守秩序，入去一個個館時就係佢哋增加氣氛，嗚～～～哇～～～呀～～～啲小朋友睇得好投入，好搞笑～

要廿幾個小朋友乖乖排好影張大合照真係一啲都唔易呢，讚呀～

我哋去睇企鵝館﹗本來冬季嘅旭山動物園呢，企鵝係佢哋嘅皇牌嚟㗎，因為有好出名嘅企鵝散步parade，而家天氣熱就冇散步了，我哋入去探佢哋啦～

講到呢度，點解今篇blog嘅title叫「葉公好龍」，我本身都唔識呢個成語故事，係婆婆形容曉曉用嘅詞語，葉公好鍾意龍，天上嘅龍知道之後就嚟搵佢，嚇到佢好驚，就好似曉曉咁，平時睇圖書睇動物睇得咁開心，(其實我都估到)佢去到動物園嘅反應係－－驚驚﹗﹗巨大嘅海豹驚驚，但細細嘅鴨仔都驚驚呀～好似好可惜咁，但呢個都係成長嘅階段吧﹗

我哋穿過透明通道，觀賞三種唔同種類嘅企鵝，不過我要專注安撫曉曉，自己都冇得好好慢慢睇企鵝呢～

唔好話真嘅企鵝，假嘅都要俾啲時間去鼓起勇氣﹗好在曉曉成功，摸摸(假)企鵝﹗

不過係企鵝館跑步步我係好喜歡的～

之後到媽媽好喜歡嘅海豹館﹗曉曉，有真嘅斑斑呀～

興奮嘅小朋友vs緊張嘅曉曉

雖然啲小朋友睇動物時係好興奮，但佢哋跟住老師時好乖乖㗎～

斑斑游水﹗

曉：影呢啲相我係好合作的﹗

哇，隻熊好近呀﹗點都要同佢合照下啦～

坐車車，曉曉合照都冇難度～

每隻動物都有名，動物園亦展示出佢哋嘅背景資料，我比較印象深刻嘅係，後來去睇其他動物時，有啲動物死咗佢哋都會寫埋係個牌度，可能因為啲遊客嚟好多次，會記掛住某隻自己好喜歡嘅動物，唔見咗會想搵佢哋吧～

有得落地就開心﹗﹗

曉曉冇咁驚驚嘅鹿～

有個北海道產動物舍，印象好深嘅係，入面好多唔同嘅貓頭鷹﹗﹗﹗難怪好多音樂盒呀、精品呀、紀念品呀都有貓頭鷹啦，原來佢哋真係北海道「特產」～

呢個都好誇張，睇啲爬蟲類我總會離啲展箱遠啲，但真係防不勝防，抬頭一望，哇～～～～有條好活潑嘅蛇丫﹗係下面行過都要行快啲～今次連我都驚驚﹗

經過垃圾分類箱，哇，我哋真係「冇常識嘅粗人」三個，香港係廢物回收方面真係好落後呢，好似話回收事業冇乜油水，所以都冇乜公司有興趣做，所以香港人真係唔係好識呢啲垃圾分類呀、回收呀呢啲嘢，之前同啲同事講起去旅行要唔要book airbnb，有啲國家對於垃圾分類做得好講究(根據平時睇韓劇，似乎韓國都係好講究的)，我哋去平住人哋啲屋企都會有壓力﹗

去到呢個位，我哋買啲嘢飲下，同埋曉曉要瞓一覺先，瞓著咗我哋繼續行，其中我哋留係大猩猩館嘅時間比較耐呢，因為⋯冷氣好舒服﹗﹗哈哈～

旭山動物園入面嘅大猩猩生活好忙碌㗎，要食(零食)都要付出努力﹗右上角嗰張相入面，大猩猩們要係箱子入面拎水果出嚟食，而下面張兩相入面，大猩猩要用樹枝撩啲蜜糖嚟食呢，見佢哋用餐具嘅技巧，比起曉曉更熟練丫﹗

曉曉醒咗我哋去食lunch先，順路不如去另一邊大門嘅餐廳啦，原來有好高嘅樓梯or斜路，我哋又b又車又背囊，之字形嘅路長啲都要行啦，好過托上樓梯嘛，加油﹗上到去就有得食了～

我哋叫咗兩個餐，湯同飲品任飲呀，正﹗雖然係快餐咁夾上嚟，但都好精緻又豐富呢，而且比起香港嘅主題樂園價錢都要平，今次冇叫兒童餐俾曉曉，因為內容⋯佢似乎唔會識欣賞﹗餐廳好baby friendly呢，好多bb椅就唔駛講，兒童餐具都係任用唔嬲﹗

食飽飽，我哋係度換埋片(有好方便嘅家庭廁所連換片枱)，行下紀念品店，又影下相先繼續睇動物～

前往其他日本旅遊blog

Comments

comments