我哋返到酒店放低啲嘢、稍稍休息一下，就重新出發去食晚飯啦，路過超級市場，入去行下先，順便都要買番啲水～

平時坐開Taste嘅車車，今次又坐下北海道嘅超級市場車車先～

今次行嘅係街坊嘅超級市場，但都乾、濕貨齊備，最令人印象深刻嘅係啲北海道產嘅新鮮食物真－－係－－好－－平－－﹗無論係菜、魚、肉、蛋、牛奶等，樣樣都仲要平過平時去開嘅百佳或者Aeon超市，而且仲要又平又靚﹗

平嘅嘢真係多不勝數，雞蛋我真係忍唔住影低咗﹗仲平過香港買啲泰國蛋同埋大陸蛋﹗﹗

水果就貴啲，我哋都想買啲水果嚟食下，我本身只target只洗乾淨就食得嘅水果，點知俾我哋發現咗「平民蜜瓜」﹗﹗

平時見啲「遊客蜜瓜」講緊每個要3000-6000yen不等，完全係我唔考慮嘅範圍，食飯時跟餐間中都有出現一小舊蜜瓜，但其實我都唔sure嗰啲係咩價位，但今次係超級市場俾我哋見到呢個648yen嘅北海道產蜜瓜，真係好好奇，難道會比起5000yen嗰啲難食好多？點解價錢可以相差接近10倍？咁岡本惠子咪好慘？佢都好用心種個蜜瓜出嚟喎～但一大個蜜瓜點食？day好進取咁提議買埋刀喎，哈，咁都得？刀仔鋸蜜瓜都ok？anyway，鋸唔開睇下再問酒店借啦～結果除咗蜜瓜，我哋仲買咗少少包裝食物做手信，全部都係北海道產㗎～

行超級市場除咗我好開心之外，曉曉都好開心，我就笑咪咪shopping，曉曉就可以暴走﹗有爸爸睇住佢我就放心shopping啦～

原來有得咁樣賣水喎～唔同用途可以揀唔同種類嘅水呢～乜屋企啲水喉水真係咁不濟乎？

之後去搵嘢食，我哋揀咗去食燒肉﹗

我哋入去時成間鋪頭冇其他客人添，無論坐枱定係坐蓆都冇bb椅，我哋決定坐坐蓆了，我攬住曉曉食吧﹗我哋揀咗一份海鮮、一份牛肉、一份蔬菜，另外再叫個冷麵、白飯同湯，份量應該差不多了吧？

點知食物都未嚟，個爐一嚟我哋就眼都大埋了，原來係好大個炭爐，熱力超強，見到紅紅烈火﹗唔該要放遠啲丫～好好個老闆娘加多一張小摺枱俾我哋，個爐就放係day嗰邊嘅角落，食物就放係摺枱上面，咁都冇咁驚驚～我諗去呢個旅行之中，食咗咁多餐，呢一餐應該係食得最攰嘅一餐﹗因為要由頭到尾攬住曉嚟食，仲要make sure佢手仔離開個炭爐有咁遠得咁遠﹗

爸爸就更忙了，要密密燒俾我哋食，火力咁勁，食材種類又多，樣樣火候都唔一樣，又想快快燒好晒叫老闆娘拎走個「威脅」，我睇見佢都忙～忙得滯，開始食之後完全影唔到相，我記得樣樣都幾好食嘅，不過蔬菜要烤的話好似好難掌握，容易燶入面都唔係好熟，可能就咁落鑊炒熟晒仲好(冇情趣﹗>v<)～曉曉就食海鮮+白飯為主啦，肉佢不嬲都唔係好好(準確啲嚟講應該係要好好味嘅肉，即是好腍+煮得好食嘅佢先會食好多)，個冷麵辣到連我都唔係好食到，又再辛苦爸爸了～好不容易食完個飯，拎走個爐即刻鬆晒～

我哋幫襯嘅本町亭炭火燒～

今日嘅體力已經榨乾榨淨，我哋決定今晚要試下Furano Natulux Hotel嘅大浴池，爸爸話等我好好休息，佢帶曉曉去浸男湯喎～好啦，曉曉gogogo，可能係人生第一+最後一次浸男湯㗎啦～Natulux Hotel個大浴池其實都幾細，沖涼位只有三個，而浸浴嘅浴池恐怕只有3至4個屋企浴缸嘅size咋，而且我覺得啲水溫熱咗少少，又有其他陌生人唔想咁逼咁浸，我都浸咗一陣就走了，都夠放鬆咗啲疲累嘅肌肉啦～至於day嗰邊，佢形容比起女湯大好多喎，可能多男人鍾意去大浴場？至於曉曉，day話佢好驚驚，最主要係有個好高大又充滿鬍鬚嘅鬼佬係佢哋隔離﹗後來係外面碰到嗰個住客，我都即刻明白點解曉曉會緊張囉～

沖完涼好開心係張床度彈嚟彈去嘅小朋友

曉曉嘅行程到呢度就結束，沖完涼我就同佢奶奶瞓覺～但我哋要試下嗰個平民蜜瓜呀﹗

開始前先同蜜瓜合照﹗張貼紙上面有出品人岡本惠子個大名㗎～

同個蜜瓜差唔多價錢嘅刀﹗

酒店房細間就預咗啦，今次Furano Natulux Hotel個洗手盤係係浴室外面的，就係門口嘅走廊旁邊，呢個設計對於要切蜜瓜嚟講又幾好喎，我哋執走晒啲杯呀、毛巾呀嗰啲，洗手盤側邊即刻空咗個位，我哋一鋪曉曉張食飯墊就可以做埋砧板，good﹗

好嘢，我哋超級市場買嘅刀仔真係鋸得開個大蜜瓜呀，而且day切起嚟都唔太困難呢，我哋今晚點都要食半個了﹗唔，好味，即使只係648yen，都係又甜又多汁，我哋一邊食，一邊覺得農夫岡本惠子好似好慘咁，佢都好用心種咗個好味嘅蜜瓜丫，點解人哋可以賣5000yen，但佢只賣到648yen呢？後來我哋理性分析，覺得其實岡本惠子個蜜瓜係比較似我哋平時係香港食嗰啲新疆哈蜜瓜，只有最內1/3層係似蜜瓜咁又軟又腍又香，而外面嘅2/3層就爽爽地而且冇咁甜，可能價錢嘅分別就係度了﹗648yen，好似真係平好多咁，其實我平時係香港買開$20-30嘅哈蜜瓜嚟食，呢個為起上嚟有$50已經算好闊綽了～哈～anyway，叫做平價食咗北海道哈蜜瓜，咁都幾好丫～淨低嗰一半，我哋第二日要同曉曉一齊分享丫﹗

前往其他日本旅遊blog

Comments

comments