我估好多好多年之後，要講起呢個北海道trip，呢個行程恐怕會成為回味當年嘅數一數二，因為實在太crazy了﹗day 0嘅blog標題叫做我們不自駕遊，不自駕大概只會諗到盡用公共交通，大家講起日本一定諗JR，其實更大flexibility嘅係我哋嘅一對腳囉(點解用打blog冇得用emoji？好想插入笑中有淚嗰個emoji囉～)～陣間你睇落去就明﹗哈～

我哋由Flowerland出嚟，上富良野搭番火車去富良野之後，其實時間唔多就要趕巴士了﹗我哋下晝要去富良野麓鄉地區嘅麵包超人專門店，去麓鄉嘅巴士一日只有四班，真係好似金田一入面嗰啲深山村落咁，而我哋其實冇得揀，去程一定係搭一點幾呢班，食lunch嘅時間唔夠，富良野站嘅便利店同小食店嘅東西又引唔起食欲，我哋賭一鋪，去到麓鄉至食嘢吧～

千祈唔可以miss咗班巴士，寧願早少少坐係個站度等都唔好周圍走了～

所以我哋只能夠搭13:05去程，17:15回程，冇其他選擇啦～

其實我哋只知大約搭45分鐘，但沿路會經過咩地方實在唔太清楚，但我哋由總站上車，只有我哋三個同埋一個阿婆搭架巴士，一直都零個人上落，難怪架巴士咁疏啦，真係冇人搭～而景物亦由小鎮漸漸變成鄉郊，中間仲駛咗入山添，似乎我哋真係去咗好遠嘅地方，最後落車每人車費好似都要1000yen左右，梗係啦，搭咁遠又搭咁耐～路程時心裡唔太踏實，一邊要忙住娛樂曉曉，另一邊又心掛掛落車後嘅情況～

終於到咗麓鄉嘅大街總站了，好－－荒－－蕪－－﹗好怕我哋會冇嘢食－－

－－所以當我哋見到麵店嘅招牌時真係超興奮，又覺得超幸運﹗後來食完至知，原來間麵店只經營午市咋，而做埋我哋單生意佢哋都收鋪添lu～lucky～day 4講到第一次試咗札幌拉麵，我話後來更好味嘅拉麵就係呢間了﹗湯底濃而不膩，而且啲麵卷卷的幾好味，食完好想飲埋啲湯添﹗麵店已經好犀利，有自己獨立洗手間，但唔能夠強求呢啲鄉村地方有育嬰室，好在我哋嘅座位有屏風略略隔住，同老闆講聲後我哋係度就地換埋片就出發長征之旅了﹗

長征？﹗冇錯，而家講番起都覺得有啲尷尬，我哋去嘅麵包超人店距離巴士總站大約3.4km，冇公共交通前往，我哋嘅策略係⋯行－－路－－去﹗點解咁辛苦都要去？睇人哋啲blog，啲小朋友真係勁鍾意嗰度，除咗有得賣麵包超人嘅嘢之外，最重要嘅係有室內同室外嘅遊樂場，又有個麵包超人gallery，我諗曉曉都一定會好鍾意﹗﹗加上旺季過後嘅富良野冇晒觀光巴士，即使要去其他景點交通都係好轉折，咁不如去一個自己真正想去嘅地方啦～嗰度仲有果醬工房，沿路又有電視劇拍攝景點㗎～

我哋開咗GPS搵好方向就邁步行了，去程時day揹住曉，我就拎背囊，爸爸辛苦了﹗行3.4km最好一邊做啲乜？

當然係孵蛋啦﹗Pokemon呀～哈哈～呢個係我諗到的﹗﹗yeah～

另一方面我哋又開住曉曉最愛嘅音樂，大家都要係遙遠嘅路上保持愉快心情～其實路一啲都唔複雜，就係一條大直路，不過有啲曬，而我哋嘅鞋都唔係最適合行遠路嘅鞋，我雖然係Birkenstock，但人字拖嘛，急步行得太遠都係麻麻地，未至於腳痛，但返香港之後嗰幾日有啲發plantar fasciitis(足底筋膜炎)嘅症狀，似乎都同個旅行有關，day就著Converse，又係薄底鞋～anyway，冇嘢可以阻到我哋嘅決心嘅﹗亦因為呢段路，我哋睇咗啲一般遊客冇睇到嘅嘢﹗有堆糞肥嘅地方啦，又有等待收割嘅超廣闊洋葱田，又有我哋討論咗好耐係小麥定粟米嘅田地～

遼闊嘅洋葱田

開頭有氣有力⋯

之後係咪變成咁？

有指示牌啦﹗不過⋯仲有2km囉～

行到差唔多到倒數階段時，人有三急﹗

好在遇到一間超靚嘅音樂盒工房，我去解決時，day同曉曉涼下冷氣休息下又睇下靚嘢，順便同鋪頭嘅人確認一下路程～奇怪喇，GPS應該指示差不多到，但條路睇落又冇乜動靜咁～我哋都來回多一次先決定靠右行去嗰條睇落人煙少啲嘅路，如果行咗咁耐，間麵包超人原來執咗笠的話我實會當場崩潰囉～

千呼萬喚，終於到了﹗﹗﹗好感動呀～～～但另一方面又有啲傷感，因為我哋又要就住時間離開，要趕五點幾出番到去麓鄉巴士總站搭巴士返富良野，所以可以停留嘅時間唔係真係太多～點算呀？點算呀？

我哋行到腳仔軟時，曉曉坐hip seat拋下拋下、又被太陽曬咗咁耐已經呆呆地，但一見到門口嘅麵包超人就即刻醒神晒﹗﹗

我以前都唔明點解咁多人鍾意麵包超人，特別係唔係太多人有睇過佢嘅卡通片，曉曉更加咁耐以嚟都冇乜點接觸過麵包超人，但我估麵包超人都真係有種親和力、同埋對小朋友嘅魅力，曉曉不嬲好怕啲雕像(不得不提馬六甲嘅鄭和事件)，但對麵包超人竟然一見如故，更加主動攬攬佢，好神奇呢～

又想埋去又緊張呢～好多玩水玩具呀﹗﹗

原本想先搵咗小朋友玩樂嘅地方先，但唔識睇日文唔知係邊一層，我哋上咗二樓，誤打誤撞先參觀咗gallery～

圖畫全部都色彩繽紛又歡樂﹗gallery本身又闊落，曉曉開心得不得了，不停跑步步同笑～

又同麵包超人攬頭攬頸﹗

我又影﹗

靚～

開心﹗

時間有限，我哋要落去地下嗰層繼續了，冇辦法要分頭行事，爸爸同曉曉去兒童遊戲室，媽媽去血拼一番～

聽番爸爸講，曉曉嚟到咁遠嘅遊戲室，居然首先玩嘅係屋企都有嘅煮飯仔同波波，要鼓勵佢先肯坐下啲車仔呢～不過睇番啲相，佢應該都玩得好開心丫﹗

至於我呢邊就真係眼花繚亂了，實在太多太多商品，又想買嘢俾曉曉，而兩個表姐穎妍穎彤都好喜歡麵包超人當然要預佢哋啦，未出世嘅逸逸又冇理由唔預下佢～結果曉曉收穫最豐富，有一條裙仔、一件雨褸、一個手袋仔，而三個表姐妹就每人有一件玩具，逸逸有多一件衫仔添﹗如果唔係要拎住行番45分鐘，真係想買多啲～呀，提醒大家一句，呢度雖然超多嘢賣，但只收現金㗎，大家記得帶多啲cash嚟掃貨呀～

我再拿拿聲衝埋過去隔離嘅果醬工房，買埋手製果醬做手信，總算勉強完成～

臨走再去戶外遊樂場同大招牌影下相，我哋又急急腳要走了﹗嚟得咁辛苦又咁頻撲真係好可惜呢～如果識揸車就好了﹗不過講話學車講咗咁多年我哋兩個都係冇郁，最大原因都係香港交通太方便了，唔揸車都冇問題，如果為咗去旅行學車，平時唔揸去旅行又唔夠膽揸，但又冇乜理由為咗去旅行有得揸而平時養部車嘛～

我哋又鼓氣勇氣踏上回程嘅路，今次由我揹住曉曉吧﹗努力呀～要keep進度，因為我哋又要趕巴士啦～不過今次只係行咗大半路程就忽然有個轉捩點出現，路上居然有架車停低，打開門，邀請我哋上車呀﹗﹗哇，係香港人﹗我哋話我哋就快到(巴士站)，但原來呢對香港情侶/夫妻直程出去富良野，仲要準備入住我哋嗰間酒店喎，太nice了，載到我哋去到目的地～day後來話，原來係麵包超人店時已經見到佢哋，可能佢哋聽到我哋講廣東話，又見到我哋奇奇怪怪咁行路吧？佢哋半年前冬天嗰陣嚟過北海道，當時唔係自駕遊，要去麵包超人店真係行路又冇可能、踩單車又冇可能呢，今次有揸車就輕鬆得多啦～(呀，我唔記得講，其實由麓鄉巴士站係可以係附近商店租單車的﹗)大家傾下計咁，好快就返到富良野Natulux Hotel了，多謝你哋呀～

終於返到了，yeah～

曉曉好喜歡佢嘅新手袋呢～

富良野果醬園&麵包超人店官方網站：

http://www.furanojam.com/

前往其他日本旅遊blog

Comments

comments