1-9-2016:北海道三人行day 5(part 2).超人毅力有血有汗之富良野麓鄉麵包超人專門店

我估好多好多年之後,要講起呢個北海道trip,呢個行程恐怕會成為回味當年嘅數一數二,因為實在太crazy了﹗day 0嘅blog標題叫做我們不自駕遊,不自駕大概只會諗到盡用公共交通,大家講起日本一定諗JR,其實更大flexibility嘅係我哋嘅一對腳囉(點解用打blog冇得用emoji?好想插入笑中有淚嗰個emoji囉~)~陣間你睇落去就明﹗哈~

我哋由Flowerland出嚟,上富良野搭番火車去富良野之後,其實時間唔多就要趕巴士了﹗我哋下晝要去富良野麓鄉地區嘅麵包超人專門店,去麓鄉嘅巴士一日只有四班,真係好似金田一入面嗰啲深山村落咁,而我哋其實冇得揀,去程一定係搭一點幾呢班,食lunch嘅時間唔夠,富良野站嘅便利店同小食店嘅東西又引唔起食欲,我哋賭一鋪,去到麓鄉至食嘢吧~

螢幕快照 2016-10-31 下午12.17.15

千祈唔可以miss咗班巴士,寧願早少少坐係個站度等都唔好周圍走了~

螢幕快照 2016-10-31 下午12.18.31

所以我哋只能夠搭13:05去程,17:15回程,冇其他選擇啦~

collage522

其實我哋只知大約搭45分鐘,但沿路會經過咩地方實在唔太清楚,但我哋由總站上車,只有我哋三個同埋一個阿婆搭架巴士,一直都零個人上落,難怪架巴士咁疏啦,真係冇人搭~而景物亦由小鎮漸漸變成鄉郊,中間仲駛咗入山添,似乎我哋真係去咗好遠嘅地方,最後落車每人車費好似都要1000yen左右,梗係啦,搭咁遠又搭咁耐~路程時心裡唔太踏實,一邊要忙住娛樂曉曉,另一邊又心掛掛落車後嘅情況~

終於到咗麓鄉嘅大街總站了,好--荒--蕪--﹗好怕我哋會冇嘢食--

collage523

--所以當我哋見到麵店嘅招牌時真係超興奮,又覺得超幸運﹗後來食完至知,原來間麵店只經營午市咋,而做埋我哋單生意佢哋都收鋪添lu~lucky~day 4講到第一次試咗札幌拉麵,我話後來更好味嘅拉麵就係呢間了﹗湯底濃而不膩,而且啲麵卷卷的幾好味,食完好想飲埋啲湯添﹗麵店已經好犀利,有自己獨立洗手間,但唔能夠強求呢啲鄉村地方有育嬰室,好在我哋嘅座位有屏風略略隔住,同老闆講聲後我哋係度就地換埋片就出發長征之旅了﹗

長征?﹗冇錯,而家講番起都覺得有啲尷尬,我哋去嘅麵包超人店距離巴士總站大約3.4km,冇公共交通前往,我哋嘅策略係⋯行--路--去﹗點解咁辛苦都要去?睇人哋啲blog,啲小朋友真係勁鍾意嗰度,除咗有得賣麵包超人嘅嘢之外,最重要嘅係有室內同室外嘅遊樂場,又有個麵包超人gallery,我諗曉曉都一定會好鍾意﹗﹗加上旺季過後嘅富良野冇晒觀光巴士,即使要去其他景點交通都係好轉折,咁不如去一個自己真正想去嘅地方啦~嗰度仲有果醬工房,沿路又有電視劇拍攝景點㗎~

螢幕快照 2016-10-31 下午12.17.34

我哋開咗GPS搵好方向就邁步行了,去程時day揹住曉,我就拎背囊,爸爸辛苦了﹗行3.4km最好一邊做啲乜?

螢幕快照 2016-10-31 下午12.17.45

當然係孵蛋啦﹗Pokemon呀~哈哈~呢個係我諗到的﹗﹗yeah~

另一方面我哋又開住曉曉最愛嘅音樂,大家都要係遙遠嘅路上保持愉快心情~其實路一啲都唔複雜,就係一條大直路,不過有啲曬,而我哋嘅鞋都唔係最適合行遠路嘅鞋,我雖然係Birkenstock,但人字拖嘛,急步行得太遠都係麻麻地,未至於腳痛,但返香港之後嗰幾日有啲發plantar fasciitis(足底筋膜炎)嘅症狀,似乎都同個旅行有關,day就著Converse,又係薄底鞋~anyway,冇嘢可以阻到我哋嘅決心嘅﹗亦因為呢段路,我哋睇咗啲一般遊客冇睇到嘅嘢﹗有堆糞肥嘅地方啦,又有等待收割嘅超廣闊洋葱田,又有我哋討論咗好耐係小麥定粟米嘅田地~

collage524

遼闊嘅洋葱田

螢幕快照 2016-10-31 下午12.17.40

開頭有氣有力⋯

螢幕快照 2016-10-31 下午12.18.50

之後係咪變成咁?

螢幕快照 2016-10-31 下午12.18.55

有指示牌啦﹗不過⋯仲有2km囉~

行到差唔多到倒數階段時,人有三急﹗

螢幕快照 2016-10-31 下午12.17.51

好在遇到一間超靚嘅音樂盒工房,我去解決時,day同曉曉涼下冷氣休息下又睇下靚嘢,順便同鋪頭嘅人確認一下路程~奇怪喇,GPS應該指示差不多到,但條路睇落又冇乜動靜咁~我哋都來回多一次先決定靠右行去嗰條睇落人煙少啲嘅路,如果行咗咁耐,間麵包超人原來執咗笠的話我實會當場崩潰囉~

千呼萬喚,終於到了﹗﹗﹗好感動呀~~~但另一方面又有啲傷感,因為我哋又要就住時間離開,要趕五點幾出番到去麓鄉巴士總站搭巴士返富良野,所以可以停留嘅時間唔係真係太多~點算呀?點算呀?

我哋行到腳仔軟時,曉曉坐hip seat拋下拋下、又被太陽曬咗咁耐已經呆呆地,但一見到門口嘅麵包超人就即刻醒神晒﹗﹗

螢幕快照 2016-10-31 下午12.18.13

我以前都唔明點解咁多人鍾意麵包超人,特別係唔係太多人有睇過佢嘅卡通片,曉曉更加咁耐以嚟都冇乜點接觸過麵包超人,但我估麵包超人都真係有種親和力、同埋對小朋友嘅魅力,曉曉不嬲好怕啲雕像(不得不提馬六甲嘅鄭和事件),但對麵包超人竟然一見如故,更加主動攬攬佢,好神奇呢~

collage525

又想埋去又緊張呢~好多玩水玩具呀﹗﹗

原本想先搵咗小朋友玩樂嘅地方先,但唔識睇日文唔知係邊一層,我哋上咗二樓,誤打誤撞先參觀咗gallery~

螢幕快照 2016-10-31 下午12.19.04

圖畫全部都色彩繽紛又歡樂﹗gallery本身又闊落,曉曉開心得不得了,不停跑步步同笑~

collage521

又同麵包超人攬頭攬頸﹗

螢幕快照 2016-10-31 下午12.18.03

我又影﹗

螢幕快照 2016-10-31 下午12.18.07

靚~

螢幕快照 2016-10-31 下午12.19.10

開心﹗

時間有限,我哋要落去地下嗰層繼續了,冇辦法要分頭行事,爸爸同曉曉去兒童遊戲室,媽媽去血拼一番~

collage527

聽番爸爸講,曉曉嚟到咁遠嘅遊戲室,居然首先玩嘅係屋企都有嘅煮飯仔同波波,要鼓勵佢先肯坐下啲車仔呢~不過睇番啲相,佢應該都玩得好開心丫﹗

至於我呢邊就真係眼花繚亂了,實在太多太多商品,又想買嘢俾曉曉,而兩個表姐穎妍穎彤都好喜歡麵包超人當然要預佢哋啦,未出世嘅逸逸又冇理由唔預下佢~結果曉曉收穫最豐富,有一條裙仔、一件雨褸、一個手袋仔,而三個表姐妹就每人有一件玩具,逸逸有多一件衫仔添﹗如果唔係要拎住行番45分鐘,真係想買多啲~呀,提醒大家一句,呢度雖然超多嘢賣,但只收現金㗎,大家記得帶多啲cash嚟掃貨呀~

螢幕快照 2016-10-31 下午12.18.19

我再拿拿聲衝埋過去隔離嘅果醬工房,買埋手製果醬做手信,總算勉強完成~

螢幕快照 2016-10-31 下午12.19.17

螢幕快照 2016-10-31 下午12.18.41

臨走再去戶外遊樂場同大招牌影下相,我哋又急急腳要走了﹗嚟得咁辛苦又咁頻撲真係好可惜呢~如果識揸車就好了﹗不過講話學車講咗咁多年我哋兩個都係冇郁,最大原因都係香港交通太方便了,唔揸車都冇問題,如果為咗去旅行學車,平時唔揸去旅行又唔夠膽揸,但又冇乜理由為咗去旅行有得揸而平時養部車嘛~

collage526

我哋又鼓氣勇氣踏上回程嘅路,今次由我揹住曉曉吧﹗努力呀~要keep進度,因為我哋又要趕巴士啦~不過今次只係行咗大半路程就忽然有個轉捩點出現,路上居然有架車停低,打開門,邀請我哋上車呀﹗﹗哇,係香港人﹗我哋話我哋就快到(巴士站),但原來呢對香港情侶/夫妻直程出去富良野,仲要準備入住我哋嗰間酒店喎,太nice了,載到我哋去到目的地~day後來話,原來係麵包超人店時已經見到佢哋,可能佢哋聽到我哋講廣東話,又見到我哋奇奇怪怪咁行路吧?佢哋半年前冬天嗰陣嚟過北海道,當時唔係自駕遊,要去麵包超人店真係行路又冇可能、踩單車又冇可能呢,今次有揸車就輕鬆得多啦~(呀,我唔記得講,其實由麓鄉巴士站係可以係附近商店租單車的﹗)大家傾下計咁,好快就返到富良野Natulux Hotel了,多謝你哋呀~

螢幕快照 2016-10-31 下午12.19.23

終於返到了,yeah~

螢幕快照 2016-10-31 下午12.18.24

曉曉好喜歡佢嘅新手袋呢~

富良野果醬園&麵包超人店官方網站:

http://www.furanojam.com/

前往其他日本旅遊blog

Comments

comments

在《1-9-2016:北海道三人行day 5(part 2).超人毅力有血有汗之富良野麓鄉麵包超人專門店》中有 2 則留言

  1. 這種經歷,當時非常痛苦,但過後卻歷久常新,經常津津樂道,看見你這篇BLOG,不禁又想起當年在芝加哥每天都要走路45分鐘才去到火車站的日子…
    麵包超人很奇妙,對小朋友有一種難以理解的親和力~

Rita 發表迴響 取消回覆

你的電子郵件位址並不會被公開。 必要欄位標記為 *