31-8-2016:北海道三人行day 4(part 1).颱風的威力

原本day 4嘅早上我哋打算一早食完早餐就check out,然後由酒店專車載番我哋出去登別JR站,放好行李去車站locker我哋就去地獄谷玩,見天氣唔對路其實對呢個行程已經唔係好樂觀,始終大風大雨去行地獄谷都唔太方便,但估唔到後來影響咁嚴重呢~

螢幕快照 2016-10-28 下午11.58.52

瞓醒覺見到呢位小朋友,點解著住浴衣瞓,瞓醒會變咗裸睡嘅?﹗太驚嚇了~哈哈~

原來食早餐嘅地方同晚餐嘅唔一樣呢,早餐係自助餐,我未入座,見到自助餐吧枱嘅食物我已經興奮到心噗噗跳了,好犀利好犀利呀﹗

螢幕快照 2016-10-28 下午11.53.56

酒店細心地為小朋友預備咗可愛嘅兒童餐具﹗

collage411

我率先幫曉曉揀咗食物,安頓好佢開始食我先再精挑細選自己嘅食物(其實都唔駛點樣挑選,因為要試得幾多款得幾多款,只差唔好唔小心食咗好少種類就食飽咗咁)~早餐和式西式都有,和式為主,我當然集中火力食和式早餐啦,難得丫嘛﹗其實最令人震驚嘅係早餐居然有超新鮮刺身船任食,連日本人遊客都好驚訝同埋狂食(一家五口中嘅三兄弟年輕人),但更厲害嘅係即使啲刺身咁正咁好味,我依然覺得唔好淨係食刺身,必需要試其他食物,可想而知樣樣都幾有水準﹗任食刺身都係好吸引嘅,我第二round再拎嘅刺身,就只有葱粒吞拿魚腩碎,真係好感動嘅味道~平時係香港叫個甚麼明太子pasta,通常啲明太子都係好孤寒咁意思意思,呢個早餐都係任食﹗仲要有兩款添~我哋以為因為酒店房價貴,所以叫做包埋,後來我哋去逛本地超級市場至知,其實明太子係本地嚟講唔算真係太貴嘅嘢,間中買嚟送下飯都ok,只係大家要注意唔好成日食咁鹹嘅嘢影響健康啫,價錢就唔係問題~

螢幕快照 2016-10-28 下午11.54.02

曉:我啲餐具唔係用嚟裝飾㗎,我連筷子都識用(就奇)呀﹗

我哋正食到興高采烈嘅時候,忽然有兩個staff走埋嚟我哋度,用英文問我哋係咪打算今日搭JR走,當然啦,晴天霹靂地先知道,原來JR停駛呀﹗﹗﹗

螢幕快照 2016-10-28 下午11.54.08

佢哋嚟係專登講俾我哋聽呢個消息,同埋同我哋傾下alternatives~知道有後續嘅需要,換咗個講普通話嘅職員嚟幫我哋詳細傾~其實我哋唔係返札幌,而係經札幌去富良野,路途遙遠丫,之前訂嘅火車飛都經過深思熟慮,搭嘅時間要盡短,然後其中一程食車站便當,咁就可以消磨下時間啦,長途火車對曉嚟講都係大挑戰,而家一下子計劃要改變,真係有啲緊張~如果好似去台灣,或者幾年前去斯里蘭卡,我哋長途啲嘅交通都會包車,雖然日本出名貴,但而家我哋有三個人,會唔會都接受到呢?包車可以停下站間中落下地休息下,我開口一問,職員馬上O嘴,跟住打電話去問,搭咗我一個天價(不過而家唔記得咗幾多了),叠埋心水轉搭巴士﹗

collage412

我哋決定預午飯前去到札幌,然後晚飯前去到富良野,咁時間會好用啲~定好了,夠鐘酒店會車我哋出去長途巴士站,跟住就要靠自己啦﹗

早餐食飽飽,但lobby居然有水果食,我同職員傾緊啲詳情時,day同曉又jap jap jap過﹗尋晚同一個位置好似曾經有serve過啲小食,好似啲類似關東煮嘅東東咁,除咗24小時有飲品供應之外,唔同時段都有嘢食呢~

有一個幾鐘嘅時間,day鼓勵我去浸多次溫泉,好呀~不過真係要極速囉,之後仲要返房pack行李﹗原來到早上,男女湯會交換㗎,所以今日試埋另一邊,其實格局都好接近嘅~日頭嘅颱風冇夜晚嘅咁恐怖,我今日出去浸外湯浸得到耐少少,不過都係勁大風同埋海上勁大浪啦,其實水溫唔算好熱,究竟到冬天時浸會唔會覺得凍呢?

IMG_2198

我去浸溫泉時,兩父女自己玩﹗今日特登為咗溫泉主題,幫曉曉著咗菊姨婆之前送嘅浴衣,超可愛丫﹗

day好好,我浸完返房時佢已經執好大半嘅行李,我埋尾就ok了﹗

螢幕快照 2016-10-28 下午11.54.32

等酒店車時我哋出去外面影下相﹗

螢幕快照 2016-10-28 下午11.54.37

招牌﹗

螢幕快照 2016-10-28 下午11.54.27

天色暗暗的~

螢幕快照 2016-10-28 下午11.54.22

仲有佢呀,係酒店嘅愛犬,lobby都有佢嘅成長相簿呢,好似家人一樣嘅乖寶寶~題外話,可能因為酒店主人太愛狗狗,酒店其中有啲房間type係可以帶埋寵物入住嘅呢~

bye bye啦,好靚靚嘅心のリゾート 海の別邸﹗

螢幕快照 2016-10-28 下午11.54.14

出到巴士站時落緊雨,又凍凍地,等車時我同曉匿埋係售票處入面﹗可能火車停駛,都唔少人搭巴士呢~今次改咗搭巴士,後來先知有好處,火車可能行駛得太定,曉會好易唔耐煩,但巴士嘛,佢流住屯門人嘅血,上車做乜?

collage413

梗係極速入睡啦﹗呢程登別去札幌佢瞓足個幾鐘,之後去富良野就三個鐘瞓夠兩個鐘,兩父女都瞓晒覺,我可以好free咁煲劇咯﹗(因為太順利地可以煲劇,係Viu download定嘅三集存貨一下子清晒,我先知原來任睇任download係睇地區的,係日本有wifi都冇用都download唔到㗎~要返香港先有得繼續追了﹗)落車時先知道要交番巴士飛俾司機,哎吔,我哋如果claim保險咪冇咗物證囉?﹗雖然好醒目咁去番counter問佢擺receipt,但張receipt又冇起點目的地地點,又冇搭車日期同時間,只有金額,其實會唔會唔work㗎?唉,不過後來返到香港我哋都hea咗冇試到claim,我哋係呢啲方面都係唔夠精明㗎啦~曉曉去到札幌至醒,果然醒目,我哋lock好行李去食lunch就啱啱好啦~

心のリゾート 海の別邸官方網站:

http://www.kokorono-resort.com/

前往其他日本旅遊blog

Comments

comments

2 關於 “31-8-2016:北海道三人行day 4(part 1).颱風的威力” 的評論

發表迴響

你的電子郵件位址並不會被公開。 必要欄位標記為 *