29-8-2016:北海道三人行day 2(part 4).慕名到訪政壽司、小樽運河夜景

既然搵唔到可以俾曉跑步步嘅地方,而間神社又唔係我哋預期咁樣,於是我哋決定早少少過去政壽司搵位了,唔知會唔會好多人嘛,可能要等一個鐘或以上呢﹗我哋由神社返出去熱鬧嘅街道時,經過咗住宅區,山坡上都有好多靚靚屋呢,係香港好難有得住house嘅我哋羨慕唔到啦~係小樽,政壽司有兩間分店,我哋日間經過運河附近嘅色內分店,同埋我哋今晚去食嘅壽司屋通總店~

去到登記時格局同食蟹宴差唔多,講低名之後同你講要等一個鐘,今次個等候室仲靚過上次食蟹嗰度好多,座位更多又舒服,仲有洗手間係旁邊添﹗我哋見曉曉行嚟行去又唔會悶或者唔耐煩,所以今次都冇同佢出去行街了,附近等位有一家三口日本人,個小男孩大個曉曉一歲左右吧,佢又想同曉曉玩又怕醜,我逗佢佢又咭咭笑,曉曉有個小哥哥係度又冇咁悶吧,後來日本家庭仲有其他客人入座了,得番我哋三個,後來又有韓國人大家庭,個唔知嫲嫲定婆婆見到曉曉問佢幾多歲,我膽粗粗用韓文答咗佢,但唔記得用敬語丫﹗好冇禮貌添~:p

collage241

等位時有咩好做?當然睇下餐牌之餘又陪下個女玩啦~

到我哋了到我哋了﹗我其實好想有得坐獨立房,大為冇咁擔心曉嘅儀態問題嘛,佢大聲講嘢或者食到一地都係都唔怕,但我哋被分配坐大房添~政壽司都算高級食肆嘛,曉咁大聲講嘢有時真係唔係幾好意思添~係等候房時睇餐牌都心大心細,好似一場嚟到應該食啲正啲嘅壽司,但又怕肉赤喎,所以叫咗一份貴少少一份普通少少,另外散叫少少,我哋再幫曉執兒童餐嘅手尾應該就夠了﹗

螢幕快照 2016-10-05 下午10.52.39

曉:我預備好啦﹗

今次嚟日本旅行已經一心諗住一定要食壽司,我個心已經盤算無限次要點啲咩俾曉曉食,總之要熟嘅啦,鰻魚?蛋?熟蝦?腐皮?點都點到啦~去到政壽司,原來唔係香港壽司店有嘅就一定有,諗諗下都係叫咗個兒童餐俾佢,但其實主要唔係食壽司囉~陣間再講﹗

collage242

壽司真係好好好好味~魚都係鮮味嘅,但最令人讚歎嘅唔係啲魚生,而係整個壽司嘅口感,放入口時好充實嘅感覺,美味填充整個口腔,可能因為啲飯捏得啱啱好吧,真係好似漫畫入面形容,醋飯係口中散開咁,又唔會太硬,壽司雖然大粒,但一口一個食就最適合﹗印象最深刻嘅係海膽壽司,真係好似「將太的壽司」入面咁係唔整成軍艦卷嘅無紫菜海膽壽司,果然味道最純粹,充份咁食到海膽嘅鮮味﹗另外我好期待嘅係Toro了,平時係香港唔捨得食,今次呢件Toro個樣都好靚,唔,味係好鮮好肥美,但食落去筋比較多,相對於海膽就失色了~

螢幕快照 2016-10-05 下午10.52.49

最鮮味嘅反而係我哋另外散叫嘅白肉魚,但唔記得咗叫咗種咩魚了~

螢幕快照 2016-10-05 下午10.52.45

曉嘅兒童餐都好正丫﹗雖然每樣菜色都得一件,但款式多,夾埋都好澎湃﹗炸蝦又大隻卜卜脆,炸雞我睇見到想食,有個哈哈笑薯餅夠可愛,又有日本小朋友最愛嘅厚煎蛋同埋魚板,仲有甜品cake同埋巨峰提子添,主食係三文魚子飯,我哋唔俾曉食三文魚子住,但有少少汁流咗落去嘅好味道飯都令佢比平時食多咗飯丫﹗既然叫做餐,當然有小朋友包括曉曉在內最喜歡嘅果汁啦~咁大份都預咗佢食唔晒,我哋執手尾有得試埋味仲好~

好開心呀,滿意又食到笑咪咪嘅一餐,果然名店即是名店﹗究竟「將太的壽司」嘅作者寺沢大介先生有幾多取材係嚟自呢度呢?

螢幕快照 2016-10-05 下午10.52.55

食飽飽影番張認證照先﹗

螢幕快照 2016-10-05 下午10.53.07

兩父女好可愛丫~

螢幕快照 2016-10-05 下午10.53.24

名店嘅門面果然有排場~

螢幕快照 2016-10-05 下午10.53.30

我哋都仲師傅合照先~

食飽飽我哋慢慢散步出番去運河,睇埋夜景﹗

collage243

曉,俾啲笑容好唔好?算啦算啦,影下我哋睇景啦,唔駛勉強你笑笑啦~

螢幕快照 2016-10-05 下午10.53.14

雖然遮晒啲景,但一家三口合照總要影下嘅~:D

螢幕快照 2016-10-05 下午10.53.19

都係唔影人時最靚~哈~

螢幕快照 2016-10-05 下午10.53.35

夜晚冇咁熱,散下步都幾舒服~

睇埋夜景之後我哋都要出番去札幌啦,回程時搭慢車,停好多站,好在夜晚嘅列車有啲應酬完飲咗兩杯嘅上班族,佢哋講嘢大大聲,曉曉嘅聲浪都冇咁大問題~

螢幕快照 2016-10-05 下午10.53.02

係火車上仲好活躍嘅小朋友,搶住飲凍嘢~

返到酒店我哋都筋疲力盡了~

政壽司網站:

http://www.masazushi.co.jp/

前往其他日本旅遊blog

Comments

comments

在《29-8-2016:北海道三人行day 2(part 4).慕名到訪政壽司、小樽運河夜景》中有 4 則留言

    • 政壽司好似東京都有分店,下次去開日本如果飛東京都可以去試下﹗

Rita 發表迴響 取消回覆

你的電子郵件位址並不會被公開。 必要欄位標記為 *