我哋八日行程嘅頭兩晚都住係札幌，今日day 2就係小樽嘅day trip，札幌搭JR去小樽的話，快車只係半個鐘左右，而且班次都好密，好方便呀﹗不過出發之前我哋有非常重要嘅時要做，我哋要買好晒之後咁多日旅程嘅火車飛呀﹗以我哋不自駕遊嚟講，JR可以算係命脈～anyway，食飽飽先講﹗
三井花園酒店嘅早餐都好正呀，自助早餐嚟講選擇非常多，和式西式都有之餘，餸菜種類又多又好味～果汁好幾款、麵包好幾款呢啲唔算奇，連和式早餐配飯食嘅醃菜同熱葷都好多種，去到日本旅行，我通常都傾向食和式早餐，少有機會食丫嘛～
曉：粟米湯好味﹗
day 1嘅blog講到，我係香港用電腦編好晒行程，揀好晒火車班次，但最老土嘅居然出發前唔記得print我嘔心瀝血嘅作品出嚟，唯有第一晚曉瞓咗之後我再好努力咁搵番啲火車班次出嚟，等可以去買火車飛啦～
我哋行番出去札幌站，搵到專門招待外國人嘅售票中心，服務真係好貼心呢，我show俾職員睇我哋嘅行程，問佢買JR pass抵啲定係散買抵啲，佢即刻幫我計，結果係唔需要全北海道嘅JR pass，而當中去富良野美瑛旭川嘅行程就可以買一個區域性嘅pass，有佢幫忙又唔駛浪費金錢又可以簡單啲﹗時間雖然花長啲，但一次過買好晒咁多日嘅火車飛，有啲長途啲嘅車預約埋指定席，咁就放心晒啦﹗另外去美瑛我哋要join JR嘅bus tour，職員就指示我哋去同係札幌站嘅Twinkle Plaza旅行中心買埋飛，太好了～
媽媽好用心+好肉緊咁預備緊呢啲東東時，爸爸就同曉曉去四圍跑步步同影下相了，曉曉放晒啲電未？
你哋兩個趁我忙緊時都玩轉咗個札幌站喎～
上咗去小樽嘅火車途中，曉曉果然瞓著啦～火車一路行嘅時候，慢慢靠近海邊，個海出現了﹗﹗
好藍好靚呀～～因為天氣好吧﹗
我哋抵達小樽啦﹗
第一晚嚟到札幌時出乎意料之外嘅涼快，今日特別幫曉著咗長袖衫褲，點知⋯今日熱到爆炸﹗但佢未瞓醒又冇理由專登整醒佢換衫嘛，慘慘曉～
小樽gogogo﹗
對於好多遊客嚟講，小樽運河可能係浪漫地標，必去景點，另外小樽又有好多精緻工藝品等等⋯對我嚟講，小樽最重要係「將太的壽司」漫畫入面主角將太嘅家鄉﹗search小樽要去嘅景點時，知道原來小樽壽司店「政壽司」係當時作者取材嘅地方，我就決定一定要去了，睇下搵唔搵到鳳壽司(將太做學徒嘅地方)或者巴壽司(將太爸爸嘅壽司店)嘅影子﹗
前往其他日本旅遊blog