過咗關，順利拎咗行李，我哋就要搵機場嘅JR站了，JR站比較靠近內陸機機場嗰邊，所以由國際線機場行過去都有少少遠，好在有手推車載住啲行李，我顧住曉就ok了～雖然話大直路一條，但因為途中太多嘢睇，條路好似行極都未行完呢～

首先有叮噹迎接我哋﹗

沿路有唔同嘅展覽，如果唔係怕時間太晏+肚餓+曉眼瞓，真係好想慢慢睇呀，呢啲毛公仔模型好cute呢～

坐飛機坐到呆呆嘅曉曉見到平時最愛嘅bear bear都唔夠興奮了～

仲有呢啲超大動物毛公仔﹗

大直路嘅盡頭開始有商店，嚴格嚟講應該算係一個商場，不過我哋只入咗去去Pokemon Shop度逛咋，始終拎住好多行李，而且都好想快啲番酒店休息一下～今期流行嘅Pokemon﹗﹗有新千歲機場限定嘅機師空姐造型，好可愛呀，如果唔係day 1我可能會衝動咁買咗番去﹗哈哈～唔買都好嘅，唔好增加行李嘅負擔，影張相都夠好了～結果後來都有再遇上Pokemon Shop，day都買咗少少精品送俾人～

上車紀念照﹗

開始眼瞓嘅曉到搭JR出札幌時已經有啲唔耐煩，明明係火車上有位坐我都被逼要企起身唱歌，好在佢都係到達札幌之前順利入睡，我都可以坐番低一陣休息一下～

落車有幾個任務，要睇睇地圖搵下酒店點行，雖然一早print screen定地圖係手機，但嚟到時又唔係好orientate到自己了～另外基本上我哋冇食lunch，食過兩次早餐到而家下晝，實在太肚餓了，要搵嘢食下﹗

book住宿時著力搵距離札幌站近嘅酒店，今次揀嘅Mitsui Garden Hotel Sapporo睇落都唔錯，可能我哋搭完飛機已經冇晒電，又拎住重嘅行李，行過去覺得唔算太近，哈，後來出入多幾次之後就覺得其實幾方便丫﹗

我去櫃枱安排check in時，曉終於有機會落地「跑步步」了，佢困住咗好多個鐘啦～

日本嘅酒店房間一般都係比較細，我都唔會有咩特別期望，新淨啲乾乾淨淨就好﹗今次札幌住嘅三井花園酒店已經充份滿足到我嘅要求﹗麻雀雖小，五臟俱全～係呢個浴室沖涼其實好滿意，熱水嘅溫度容易調較得嚟又穩定，水壓夠，令我最驚喜嘅係沖完涼出嚟時塊鏡係洗手盆對上嘅一個方形冇俾水氣整到濛咗呀，應該係清潔時事先抹咗啲咩上去吧？日本仔果然係對客人最細心～雖然個浴室好好，但我第二晚都係心思思去咗試個大浴場呢～

肚仔餓，係時候享用車站買番嚟嘅黑豆大福﹗

yummy～side track講一句，呢晚返到嚟超谷奶，唔知係因為食咗黑豆丫，因為用糯米做嘅大福丫，因為放假去旅行心情輕鬆丫，因為食好嘢食得多定點，曉曉有福了～

我哋係房間休息一陣，食下嘢，之後就出動去行街食晚飯啦～

前往其他日本旅遊blog

Comments

comments