27-8-2016:北海道三人行day 0.我們不自駕遊

曉曉出世之後,雖然去過幾時旅行,短嘅本地兩日一夜5m時已經去過,長嘅就分別9m同11m時去過馬來西亞同埋台灣,都各去咗一個星期,但兩次長旅行都係一行七人,同埋公公婆婆姨媽姨丈一齊去,照顧曉曉方面可以分擔下,而人多嘅時候,亦傾向包車或坐的士去玩,真正乘搭公共交通工具唔係真係太多,而且包車時又可以將部份行李放係車上,拎嘢都冇咁重~但今次先係真正嘅挑戰﹗我哋終於第一次三人出遊了﹗

packing

9m時俾爸爸放入行李箱影相,今次16m係自己走入去玩了﹗

目的地嘅選擇方面,始終同曉去唔想飛太遠,如果唔係搭飛機我哋兩個會辛苦死,所以都係亞洲之內啦,我學咗韓文兩年,想牛刀小試,但另一方面自從海嘯輻射之後,六年冇去過日本了,又好想去,我只不過係Facebook問一下大家意見,估唔到一面倒大家都覺得應該去日本,咁呀,好啦,日本先啦,反正我都覺得韓國嘅食物冇咁啱曉食,而我自己確實真係好渴好想去日本,溫泉旅館、美食⋯yum yum yum~日本之中,揀咗我咁大個女從未去過嘅北海道﹗

當我講俾人聽我八月最尾個星期出發時,大家嘅反應唔知點解又係好一致咁話:「吓?冇薰衣草lu bor?咁咪乜都冇囉?」哈,其實揀日子純粹係就我嘅sem break,我係勤力嘅學生,HKU SPACE嘅韓文班,嚟到九月份,進入我嘅第三年韓語學習了,八月初考完試,兩個星期出成績,我要報埋下學期上堂先出發嘛~日本點會乜都冇?﹗日本幾時都咁好玩㗎啦~後來我search過,薰衣草的確係過咗最靚嘅日子,但其他花花都仲好靚呀,不過嘛,過咗旺季的確去到富良野附近係有點搏手搏腳,之後會再詳細啲講~

search機票時發現香港航空好抵嘅機票,每人來回只係四千幾,我哋直接經航空公司網站買飛就最抵了,美中不足嘅係,嬰兒票唔可以經網站買,一定要再打電話去買~下次可能冇呢件事了,即使曉未夠兩歲,如果飛得遠都係買個座位俾佢輕鬆啲~

日日嘅生活都咁忙,我嘅preparation直至訂好酒店之後就暫停了,直至出發前嘅一星期先再啟動plan行程~其實我今個trip嘅must do item就只有住溫泉旅館,食好好味嘅套餐,浸溫泉啫,其他唔係唔重要,但覺得同住老公同阿女去邊都應該會好好玩,所以我係登別揀咗我好喜歡嘅溫泉酒店,跟住睇下available嘅日子,然後其他行程就係就住呢個嚟分配,決定好各個目的地,訂好房,我就收工了﹗出發前幾日先再詳細上網睇資料、睇旅遊書,我哋會睇嘅、玩嘅、食嘅先變得明朗化,但我老公一直都話,從來都冇擔心過你plan~人人聽到我哋去北海道都問係咪自駕遊,我哋兩公婆都唔識駕車,都還可以帶到bb去北海道嘅,我諗就有好有唔好啦,如果你睇緊我個blog,你又唔識駕車,又想帶bb去北海道,就追落去睇我哋點manage啦~

行李就更加係出發前一日先執,而家曉曉跟晒我哋食三餐,而日間又唔駛食奶,所以除咗片片、濕紙巾等日日都用緊嘅bb用品之外,其他要執嘅行李基本上同我哋大人分別唔大~今次令我苦惱嘅只有一項,就係曉曉「娛樂袋」,飛機每程要接近五個鐘,而途中都有長途火車,我已經諗定啲火車車程點樣分拆唔好咁長程,又可以安排食火車便當等消磨下,但搭飛機真係特別令人擔心﹗結果曉曉娛樂袋入面有書三本(大書「女孩尋寶圖」、近期最愛圖書館借嘅顏色書、all time favourite「好品格」)、玩具數件(鴨鴨、穿珠仔套裝、杯杯兩隻+匙羹、曉曉用嚟當做電話嘅計數機、顏色筆+紙)、零食(細盒裝麥精、提子乾、唧唧裝果蓉/乳酪),呢個娛樂袋係用另一個背囊去盛載,可以隨時係行李箱度成個拎出嚟,我覺得呢個安排都算唔錯~結果順唔順利?睇下之後嘅blog啦~

前往其他日本旅遊blog

Comments

comments

在《27-8-2016:北海道三人行day 0.我們不自駕遊》中有 2 則留言

    • 係呀,超級重要﹗
      成個旅程冇嘢驚,最驚曉曉搭飛機搭火車搭車唔耐煩扭計~

Rita 發表迴響 取消回覆

你的電子郵件位址並不會被公開。 必要欄位標記為 *