14-6-2016:半熟手媽媽14m.牙牙學語(二)之光榮的1-10

嚴格嚟講用呢標題應該係13m時嘅事,不過拖到而家至抽到時間打blog,14m就14m啦,不過講真,都真係差不多到14m,曉嘅1-10先慢慢變得更好~話說公公送嘅一套八本0歲book,其中四本係日常生活常見嘅物品嘅大圖畫,俾bb學下各種熟口熟面嘅物品,而另外四本就分別係數字、顏色、形狀,同埋一本比較特別嘅黑白對比剪影圖畫~本來覺得學數字好似太早,但唔知幾時開始,曉曉自己拎嚟俾我講嘅書之中,呢本1-10嘅數字書變得有份量,成為佢嘅favourite,又唔知幾時開始,佢開始跟住我哋嚟讀﹗

螢幕快照 2016-06-14 下午10.53.08

最起初就講得好準嘅就係「8」,可能係學入聲字學到上癮吧?「襪襪」、「but but」等等⋯陸續,其他數字都開始講到出嚟﹗「7」同埋「10」都係比較早期發音得好少少嘅數字~

而最有趣嘅係「2」、「5」同埋「9」﹗講「2」時佢會震埋個唇,bu埋口水出嚟~「5」會拖到好長﹗而「9」就又長又高音,佢個頭仲會配合側側地仰一仰個頭嚟講個「9」,好搞笑~

令我困擾嘅係,佢開頭時點都唔肯講「1」,只係舉高一隻手指嚟代替~又唔肯講「3」,佢會拉一拉自己件衫嚟代替~唔肯講真係冇佢乎,定係佢真係未發到個音?

我比較肯定嘅係,佢真係未識發「6」嘅音,因為一直以來都未講過「L」起首嘅音,而幾時識講「6」?就係佢啱啱開始玩醫生玩具,佢又啱啱病咗,成日要食「藥藥」之後囉,而家個「6」同「藥」都有幾分相似,準確啲嚟講,曉暫時個「6」其實係「略」囉~

我諗只係經過兩三個星期,呢個1-10已經進步得好好了﹗爸爸有次錄咗段都幾完美嘅video呢,可以係41秒之內講完1-10﹗「1」已經講得好完美,「2」仲係有少少震唇,「3」同「4」開始比較分明,「5」冇之前長得咁交關,「6」仲係略,「7」同「8」就very good啦,「9」仲係有啲高音但冇咁長,「10」仲係實,但已經好叻叻了﹗

因為曉曉最近太喜歡數字,所以出街、等lift、睇報紙都變得非常有趣味,先施特價8折?「8﹗」一出屋企電梯大堂,「6﹗」跟住就笑笑了~因為曉曉係中國人?佢最愛嘅數字依然係「8﹗」

螢幕快照 2016-06-14 下午10.52.52

正因為識得講1-10,我哋就諗,既然識「2」又識得「媽」,咁應該可以講到「姨媽」啦,即然識「2」又識得「象」,咁應該可以講到「姨丈」啦,所以最近進行教導中﹗哈哈,總算俾我哋騙到講過一次「姨媽媽」㗎~不過後尾又唔肯講了,曉曉,加油呀,姨媽好期待㗎~

前往其他半熟手媽媽blog

Comments

comments

在《14-6-2016:半熟手媽媽14m.牙牙學語(二)之光榮的1-10》中有 4 則留言

  1. 周遭環境都是數字,BB學會基本的數字,她的世界就豐富得多了,連看報紙也有她看得懂的一丁點東西。真妙!

    • 相隔九個月,今日23m嘅曉曉開始有興趣學字母,最愛「C」,我懷疑因為我哋嗰套磁石字母個C係紫色囉~
      最近少睇數字,準繩度反而冇幾個月之前咁好呢~俾佢睇新嘅數字書書,寧願將注意力放係旁邊要數數嘅物品入面,仲要講到好detail,但對個數字又冇咁有興趣了~

發表迴響

你的電子郵件位址並不會被公開。 必要欄位標記為 *