我以為繼講到早晚埋身之後，之後就會到最後一篇媽媽奶辛酸史，應該就到講曉曉嘅自然離乳故事，估唔到買新bra一事令我改變咗計劃﹗
記得由懷孕早段我就記錄過買bra嘅事(請參閱：20-9-2014：懷孕扎記9w0d．大出血之「wonder」bra)，當時覺得自己好醒咁買咗可以哺乳嘅款式，其實到咗懷孕後期，個cup繼續升，到生咗之後開始餵奶，嗰幾個bra根本容納唔到個胸﹗始料不及嘅係，當時覺得有少少俾人氹到買嘅睡眠bra，反而陪伴我更長嘅時光﹗
唔記得之前嘅blog我有冇激讚過呢啲睡眠餵奶bra呢？啱啱睇番曉曉出世頭幾篇blog好似又冇講過？﹗當時出院返屋企乳頭已經損損地嘛，隔咗一年之後印象依然清晰，乳頭接觸件衫都痛，返到屋企戴咗呢個柔軟嘅睡眠bra居然超級舒服，好有保護嘅作用呢～同呢個同款唔同色嘅總共有三個，為咗足夠替換，係Aeon BB部又另外買咗一個餵奶bra，係後扣中間前方重叠可以拉開布幅露出乳房餵奶嗰種，之後又係台灣網店Mandy Shop買多一個類似嘅～去馬來西亞旅行時買咗兩個超平嘅餵奶bra，有T扣可以打開餵奶，幾方便但因為冇厚墊，出街唔方便所以比較少用～就係咁樣，呢七個餵奶bra陪伴咗我一年幾嘅時光～
隨住時間過去，曉食固越嚟越多，食奶越嚟越少，我開始降cup啦，呢啲餵奶bra對我嚟講已經冇乜承托力了，一方面想著衫好睇啲，另一方面去到此時此刻唔會點脹奶，即使戴有wire嘅bra都唔怕塞奶，係時候可以買新bra了﹗
去到內衣店，雖然戴bra年資已深，但我真係唔了解呢一刻嘅自己係咩size，個店員同我度一度，我都有少少驚訝呢，原來降咗咁多cup仲有呢個size喎(開心ing，不過唔係個咁公開嘅地方講自己嘅秘密了，hee)～入試身室，好開心，好耐冇戴過靚靚bra了，邊有餵奶bra有lace款㗎～而家著住新bra，感覺自己有女人味好多，自信心都大好多呀﹗可能將兩邊啲肉肉托一托，好似苗條咗添呢～:D
新bra相片？唔post了～:p
前往其他半熟手媽媽blog