之前一直有睇開我嘅blog嘅讀者會唔會因為媽媽奶辛酸史一至五而覺得餵人奶好麻煩呢？其實作為過來人，如果唔駛返工的話，人奶一定方便過奶粉十萬倍，乜嘢都唔駛洗、唔駛消毒，出街去旅行唔駛帶大包小包，一揭起件衫就食得，bb肚餓喊到拆天都唔駛等，正～返工要泵奶嘅媽媽當然辛苦好多啦，行李又重又怕帶漏嘢，又怕返工忙得滯唔夠時間泵奶，又怕泵唔夠奶俾bb食，運送又怕啲冰種唔夠凍奶會變壞，又怕塞乳腺又怕乳腺炎，所以要向堅持嘅在職人奶媽媽致敬啊(請參閱：12-7-2015：半熟手媽媽3m．大包小包上班去)～好在我唔係日日返工，我都唔知我返全職的話有冇能耐堅持到咁耐～
係母乳媽媽group嚟講，我而家餵到13m算係中等經驗值啦，都未算係老資格，因為媽媽牌嘅推崇嘅係「自然離乳」，即是唔係由大人作主導幫bb戒奶，而係等bb自己夠成熟、夠獨立，而唔再依戀啜啜去獲得安全感，自己決定幾時唔再食奶～所以group入面啲媽媽嘅bb嘛，初生嘅又有，幾個月大嘅又有，一歲幾又有，兩歲幾又有，三歲幾或者再大個啲都有～我懷孕時只諗要餵人奶，實在冇諗到咁遠要餵幾耐，如果有人問起我打算餵到幾時，當時只係覺得，諗住餵到起碼一歲先算啦，到咗一歲，乜都食得，乜嘢營養都可以係各種食物之中吸收，奶就冇乜所謂啦～但自從我投入於媽媽group之後，亦自從我成為真正嘅全母乳媽媽之後，我深深認同母乳唔單單係食物，對於而家呢一刻嘅曉嚟講，「奶奶」之意不在奶，重點係「媽」同埋「啜」囉～
正因為一歲後任何營養都可以係食物之中吸收，奶粉/鮮奶/乜奶乜奶變成補品，媽媽奶變成超級補品，因為有埋附帶好處嘅「媽+啜」～健康院書仔都教媽媽們，一歲bb每日360ml至480ml嘅奶就ok，或者按bb需要餵哺母乳，所以母乳媽媽group通常都教大家一歲後早晚埋身就ok～
曉一歲後我同佢加埋固體下午茶，食下水果、乳酪、餅乾之類，嗰餐媽媽奶都cut埋了，所以返工都好free唔駛泵奶啦﹗慢慢曉而家都習慣只早上起身時奶奶，同埋沖完涼臨瞓奶奶，其他時間都唔會叫奶奶了，當然半夜醒咗喊嘅時候令佢快快從新入睡嘅係奶奶，咁我都會俾佢啜嘅～對我嚟講就輕鬆多了，返工唔駛帶又泵又樽又冰袋咁重，可以從新著one piece裙或者非哺乳衣嘅上身衫，所以我衣櫃入面整整兩年冇著過嘅衫可以重見天日了，而lunch time亦可以輕鬆同同事出街食飯，傾下計，之前因為要趕住泵奶，好多時都買外賣邊泵邊食，而家有番啲社交，非常好呢～
而家餵少咗，我亦更珍惜曉埋身奶奶嘅時光，真係唔會有人知佢會食到幾時，我知道佢暫時都仲好鍾意啜啜媽媽，我星期四晚上完韓文班，夜少少返嚟佢有時都會等我門，啜啜埋先瞓～最近沖涼好鍾意玩水，玩到唔肯上水，要放走個浴盆啲水先肯出嚟，如果佢嗰晚累啲想瞓覺，沖涼時問佢上唔上水奶奶，佢都會點頭叫奶奶，再伸出雙手等你抱抱佢出嚟，好sweet呢～
如果再問我餵到幾時，我打算餵到佢自然離乳囉，不過有時諗多咗嘅係，又怕佢太早離乳又遲佢太遲離乳，一直都啜啜的話想生個弟弟妹妹又如何？雖然有啲媽媽大住肚都餵到生，但我自己信心不大，如果離乳後再preg就最理想～萬一兩歲三歲都未離乳？我唔想做高齡產婦喎～而家都未諗得掂﹗有啲bb 14個月16個月就離乳？我又唔想喎～day話，其實最大問題都係你唔捨得啫，佢真係最最最最最了解我～anyway，呢個都唔到我話事，暫時見步行步吧﹗我好高興我嘅好朋友們都係母乳媽媽，有大家一齊同行真好，大家加油﹗
前往其他半熟手媽媽blog