話說尋晚曉曉沖涼、食奶奶之後唔瞓覺，我陪佢係張床度碌下玩下，忽然間曉曉大叫：「爸爸、爸爸、爸爸﹗」，叫咗爸爸入嚟，有咩大件事？﹗曉曉指住自己隻腳，話：「襪襪﹗」哦，原來係呢咁～後尾爸爸出番去之後又再repeat多一次，知道啦知道啦，爸爸知道你識講襪襪啦～襪襪係佢呢排嘅favourite，由朝到晚都襪襪、襪襪咁講，啱啱一歲就識講第一個入聲字，媽媽都覺得好自豪呢～有呢件趣事，我決定要開始「牙牙學語」系列，由曉曉學識嘅第一批單詞開始先～

「爸爸、媽媽、pu pu」－暫時曉曉識叫嘅人應該只有呢三個了，永遠都正確嘅爸爸同媽媽，仲有間中會叫嘅「pu pu」(婆婆)，通常大家會問，咁叫爸爸先定媽媽先？佢肯定係發出「ba」音先，但賦予「爸」嘅意義係邊一刻呢？同「媽」比較呢，真係唔太sure了﹗「pu pu」嘅第一次我就好肯定，嗰次媽咪係聖堂送聖體當值，曉曉見到祭台上嘅婆婆就獻出咗第一次﹗

「奶奶」－由始至終用嘅frequency最高嘅詞語一定係奶奶，有時溫柔、有時堅定、有時發難，都係想搵媽媽嘅奶奶，通常會指住我個胸嚟叫奶奶，而我哋提起奶奶時佢又會心思思，所以而家我哋大人溝通嘅暗號係「NN」，或者「N字頭嗰樣嘢」，大家記住小心唔好隨便係佢面前講關鍵字了，我哋啱啱減奶，轉早晚埋身幾日，唔好令佢心思思～

「mum mum」－同奶奶相關嘅應該係mum mum了，有時曉曉食完左左同右右都仲不定叫奶奶，係時候問佢係咪其實想要mum mum了，而家大個女，只食奶奶唔夠飽啦，肚餓就要食飯食菜食肉食魚食包食麵啦～

「BB、波波、bear bear、杯杯」－B字頭系列都係比較早期學識嘅詞語，不過波波同bear bear發音會比較準確，BB同bear bear係有少少近似，只有微妙嘅差異，杯杯就少咗「i」嘅尾音，曉曉其實都係靠日常生活見到嘅實物，同埋睇佢套「0歲Book」圖書學各種東西，我估唔到有好多多次重覆嘅東西已經好清晰變成佢內在嘅知識了，我同曉可以玩Pictionary啦，我用我差劣嘅畫功，係畫板上面畫bear bear同波波，佢都即刻講到出嚟，叻叻(我哋both)～

「街街」－對每個BB嚟講呢個都好重要吧？點樣會出現曉曉講街街？scenario 1：我將hip seat掛係腰上面﹗scenario 2：我哋行出電梯大堂～不過間中會將街街講成dai dai，我重覆再重覆教佢之下，最近好以少咗dai dai了～

「冇」－呢個係婆婆主力教嘅早期單字，教佢有同冇嘅概念，冇係攤開兩隻手板，我哋會講埋「冇」(註：係高音嘅冇，即是「毛1」)，佢學下學下又會講了～

「燈燈」－因為婆婆成日帶佢睇光光燈，所以九個幾十個月時曉曉就講到好準確嘅燈了，但最近唔知係咪學其他嘢學得太多，個燈又變得冇咁準了，變成「de de」⋯

「啄啄、轉轉」－動詞系列，其實主要係教佢雞仔時就有啄啄，教佢風扇時就有轉轉，佢未識個noun但就學咗個verb～

「襪襪、腳腳、褲褲」－次次同曉著襪襪時都做running commentary(醫學生、醫生們考試好多時都要邊檢查病人邊做旁述講自己做緊乜同埋有咩findings)，久而久之就識講襪襪了，但我哋發覺佢對襪、鞋同腳有混淆，總之全部都講襪，全部都指住隻腳啦，而家更正佢之後都會講番冇襪嘅腳做「腳腳」，但「鞋」佢就未發到個音住～褲？其實係「fuu fuu」多啲，係呼一陣風出嚟、bu啲口水之類，不過佢真係識褲嘅meaning㗎～

surprise新詞「豬、鴨、兔」－其實只係睇書時有講，今日無啦啦第一次指住圖畫講準確嘅豬，雖然偶爾會認錯啲卡通豬做bear bear，而沖涼時就指住玩具鴨講「aar」，correlate到物品，不過個尾嘅p音就冇咗，兔都唔太準，係「te te」多啲～

呢啲係暫時自己識講嘅詞，識理解嘅就更多了﹗健康院一歲評估時姑娘話佢呢方面都比較同齡突出，要keep住俾stimulation佢，唔好變成平凡呀，莫非曉曉都同媽媽一樣有多少少嘅語言天份？第時你學唔學韓文同西班牙文？

前往其他半熟手媽媽blog

Comments

comments