自曉曉差唔多五個月大加固以來，我一直都遵從傳統教導，由米糊蔬果蓉，以至後來煲粥仔加點魚肉瓜菜碎，到近來將食物切粒加入爛飯之中，一直運作良好～大家見曉食嘢個個都讚佢叻，食得多食得快又唔揀擇﹗但唔知點解到十一個月大左右時餵飯變得極其艱難，第一啖未到口就已經喊住推開，媽媽餵可能好啲啲，但去婆婆屋企時、去葉太屋企時真係唔肯食飯飯﹗好叫人頭痛～
媽媽作出好多唔同嘅假設，問題係乜呢？質感要實在啲？味道太淡？食咗咁多個月食到厭咗？唔要冰粒餸要新鮮餸？我觀察之下，發現自己握係手食嘅麵包同埋水果就食到依然點點頭，但餵到口嘅飯飯就唔願食，莫非我哋曉曉大個女要自己食乎？
於是試下每餐預備少量俾佢放係自己碗仔度自己食，佢又真係會執啲米粒入口仔裡面喎，自己專心進食時對於大人再餵佢又冇咁抗拒了～於是我再嘗試將食物預備成finger food咁嘅size俾佢，自己食得津津有味呢﹗
真係唔好睇小BB嘅能力，俾隻匙羹佢，又真係會試下舀來食，雖然未可以順利地完成整個過程，但都可以將少量食物transfer入去口裡面﹗現時佢仲係成日掉咗隻匙羹落地呢，有時係唔小心，但又時真係故意，我可能會幫佢執一次半次啦，反正佢主要都係用手﹗
呢個係早期試俾佢自己食嘅狀態，意圖整盤食物俾佢自己食，但發現好危險嘅係可能會成盤跌晒化為烏有，而對於曉曉嚟講，自己控制均衡進食亦有難度，加上要同VTO姨姨講句對唔住，VTO姨姨送個餐盤俾佢，用咗冇幾次就俾佢掃落地跌爛咗～
而家最update嘅係，又過多兩個星期(開始呢篇blog係9/3，完成日子係21/3)，仲有三日我哋就出發去台灣，反正決定今次去旅行唔再帶baby food俾佢(食得醃悶又唔夠飽)，曉到時會跟我哋食，所以提早預習，而家佢已經完全跟我哋食大人飯餸了，每次放少量餸係佢碗仔，佢自己進食，用手又好用羹又好由得佢，白飯的話我就用筷子餵佢(比起匙羹，佢而家對匙羹冇咁抗拒呢)，蒸魚等比較濕碎嘅食物都係我餵佢，而蔬菜就多數都係佢自己食﹗尋晚屋企嘅餐單係芒果焗雞柳、炒雜菜(絲瓜、洋葱、草菇、甘筍、蕃茄)，切成可以手握嘅大細嚟煮佢就食得ok，大成功﹗而家一家人食飯輕鬆好多呢，之前要成餐都餵佢自己食時食物都凍晒，而家真係可以一齊食呀﹗今朝食麥皮做早餐，曉又試試自己用匙羹舀～希望匙羹慢慢用得好連飯飯都可以自己食﹗
我諗我哋而家採取嘅狀態，介乎傳統糊粥飯同BLW(baby led weaning)中間吧，媽媽又會餵少少，BB自己又會食少少，暫時都work﹗
p.s.曉真係個小Rita呢，又鍾意食菇，又鍾意飲湯﹗:D
前往其他半熟手媽媽blog