情人節病到迷迷糊糊，只係隨隨便便係屋企食咗個極普通嘅飯，一丁點慶祝氣氛都冇，到2月15日，我哋真正嘅記念日，精神好好多，day又仲放緊假，全家出動吧﹗冇訂枱又冇規劃行程，day問我想食乜，我只記得之前係網上媒體報導見過尖沙咀有間親子餐廳，好多嘢俾小朋友玩，趁星期一中午應該唔太多人，search番Openrice，原來叫做Seas Ahoy，係尖東站P2出口旁邊，咁呀，即是搭西鐵出去啦～
曉係西鐵下半車程眠一眠，去到餐廳就醒了，小休過當然夠晒精神又心情靚靚啦～侍應安排我哋坐係遊戲platform邊嘅枱，即是我同曉pat pat嘅位置已經係遊戲platform嘅一部份啦～餐廳好貼心有兩款BB椅，曉坐嘅係大B嗰種，佢哋話可以換張細B椅俾我哋，但佢都坐得ok就冇換了～我同day一人揀咗一份set lunch，以尖沙咀嚟講都唔貴，兩個set lunch埋單都係$23x，已經有湯/沙律、主菜、餐飲、甜品，又睇得又食得～開餐前我哋影張全家福先～
雖然係餐廳入面嘅小朋友嚟講曉曉差唔多算係最細嘅幾個，但佢真係感受到呢個地方係for小朋友嘅呢，未玩已經一臉喜孜孜﹗
我哋仲食緊飯時曉嘅心已經飛咗去玩啦～
食物樣樣都夠水準，唔單止presentation靚靚，味道都好，不過份量偏細，食埋甜品都夠嘅，唔算好飽，男士或母乳媽媽如果大食少少可能就唔夠了～雖然有小朋友menu，不過冇BB menu，曉今次都係食私伙飯飯，下次再嚟可能可以自己order餐啦～
食飽就go go go，牆係大大塊磁石牆，有好多公仔可以貼上去，曉暫時只識搣出嚟未識貼上去呀～因為餐廳叫Seas Ahoy，玩具都同海洋有關，所以啲大個啲嘅小朋友有爭海盜船～聽到啲唔識嘅小朋友之間嘅interaction，真係覺得parenting係一門高深嘅學問，俾人搶玩具點樣教？小朋友唔同自己玩點樣教？擲玩具點樣教？又要斯文有禮，又要維護自己權益，點樣可以都掌握得到？好動嘅小朋友可以去玩玩具，好靜嘅小朋友好似都有免費填色冊、連線遊戲贈送，但曉太細個了，冇份～小朋友好多嘢玩丫﹗呢間餐廳其實唔係for小朋友囉，而係啲細路好忙嘅時候，媽媽們就可以盡情吱喳了～下次要約埋啲媽媽級朋友仔一齊再去﹗
食飽飽又玩到夠我哋走啦，係招牌前面影張留念先～
出嚟諗住去isquare行陣街睇下BB嘢，有啲微雨，我哋又冇帶遮，day提議鑽番入去地鐵站，行隧道過isquare咪唔駛淋雨囉，點知有驚喜﹗﹗
經過K11個藝術廊咁啱有展覽同小朋友有關，係K11、林東鵬同埋林氏邀請嘅藝術家合作嘅展覽，揉合藝術同玩具店嘅概念，打造俾公眾玩樂同放鬆嘅空間～免費入場，展覽開到三月頭呀，每個鐘頭有十分鐘清潔時間，入場時間就係每個鐘嘅整點喇～入場前大家用消毒泡泡清潔雙手先﹗
近入口區有比較多適合大小朋友嘅玩具，積木、火車路軌套裝、洋娃娃屋等等，曉曉就唔係好適合⋯
入面就啱晒我哋了﹗空間、空間和空間﹗好colourful，又有啲唔同形狀嘅cushion，曉係度爬爬企企就已經好開心了～
開心﹗﹗﹗
臨走同呢隻bear bear態？雪人？影張相先～
玩到累，行到isquare時曉曉又瞓著咗了，變成二人世界時間啦，不過我哋嘅主題仍然係佢～^^”去isquare就係一場「出城」，睇下BB嘢丫嘛，係Baby “R” Us逛逛，都有好收穫，今次行Mothercare就冇買嘢了～
因為今日我同曉share一件大褸(睇下我哋係餐廳門口影嗰張相就會明我咩意思)，所以我都揹咗佢好長時間，累啦，要坐坐飲下嘢～原來Baby Cafe冇咗，是但啦，去咗同層嘅越南餐廳，反正下午茶時間間間都唔多人，可以坐得輕鬆啲～
似乎可以黏住爸媽真係小朋友最大嘅幸福呢，今日曉成日都心情靚爆～開心曉自然係可愛曉啦～
為咗同曉曉share飲，我叫咗椰青，馬來西亞旅行返嚟之後第一次再飲椰青，再次見番曉曉幸福嘅表情呢～佢真係好鍾意飲椰青﹗﹗:D我舀起一羹椰青肉時，爸爸話要食，過曉口而不入，即喊﹗hee，曉，要學習分享㗎～
Seas Ahoy網站：
https://www.facebook.com/Seasahoy/
玩具亭網站：
http://www.k11.com/corp/zh-hant/event/%E7%8E%A9%E5%85%B7%E4%BA%AD/
做父母雖然唔簡單，知道難處就是智慧的起點，前人經驗、交流心得與書本知識皆有可取之處，管教的方法多得很，留心就會發現。最近看了一篇網上文章，講父母也有「有效期」，錯過了，就想教、想愛、想親近也難。
我覺得好重要嘅係要清楚自己嘅原則，同伴侶之間嘅共識，同埋大多數時候嚴謹地執行+人性嘅變通，而家覺得管教一啲需要改進嘅事好似冇咁難，要鼓勵去做一啲小朋友唔願/唔敢去做嘅事好似更難呢～
香港地要搵間餐廳，適合一家大細家庭樂，真係唔多容易。
多謝Rita既分享﹗
想要借分享係fb度添^__^
沒問題！多謝你賞面我個blog就真！