12-2-2016:半熟手媽媽10m.邱氏病菌

哇,原來上一篇媽媽blog已經係5m嘅時候,曉而家已經10m了,過去呢幾個月果然好忙﹗點解今日有時間坐定定打blog?因為不幸地我請咗病假,繼續放曉過去葉太度等我可以好好休息,反正要坐定定半個鐘泵奶,比起玩Candy Crush,打blog好似更productive喎~

螢幕快照 2016-02-12 上午10.44.20

果然書本上講嘅係冇錯嘅,bb大概九個月左右,由母體帶過嚟嘅抗體就會消失,而bb自己嘅免疫系統又未完全成熟,呢個時候bb就好易病啦,雖然話人奶b有「軟體更新功能」,但曉都難逃病病豬一劫~

去馬來西亞旅行(blog blog後補~我一定要打的,話晒係曉真正第一次出國旅行喎~)前發高燒39度幾,燒咗兩日半出疹,原來係幾乎個個bb都會經歷嘅玫瑰疹~嗰次係曉生第一次睇醫生,開頭持續高燒又冇乜明顯病徵,最驚係中耳炎同尿道炎,屋企又冇工具可以幫佢檢查,所以帶咗佢去睇源醫生~我自己之前有次公眾假期唔舒服都睇過一次源醫生,嗰陣佢仲未自立門戶,嗰次印象都覺得佢好細心,而家自己有診所啦,帶曉去睇我都有信心~出發去旅行前一日出疹,如果過關時俾人睇到啲疹會唔會唔俾上機㗎?雖然話燒就退晒啫~最好有張「fit for travel」嘅醫生信﹗﹗結果信都唔需要,出境又成功~好好彩曉嘅七日旅程都健康豬豬,一家人都玩得開心﹗

返到嚟香港至係噩夢嘅開始﹗﹗返嚟冇幾多日曉又唔妥啦,少少低燒,之後就咳咳流鼻水,婆婆都好怪我做媽媽嘅唔帶佢睇醫生俾佢食藥,咁事實上食藥唔會快啲好嘛,佢又精精神神係咁玩,而上次嘅經驗係,曉食藥好易嘔,我倆對於俾藥佢食都好有保留~不過後來越嚟越嚴重,咳到想嘔咁,又隱約呼吸有少少heehee聲,我都怕係呢個月數bb常見嘅小支氣管炎,結果又見源醫生啦~估唔到嘅係曉今次食藥好乖乖喎,而家唔單止唔嘔,仲會自己張大嘴湊過去針筒個口度~哈,叻到爆炸﹗

點解係噩夢?因為幾日後爸爸同我都相繼倒下了~爸爸仲發高燒請咗兩日病假添~我稱之為「邱氏病菌」,要唱下「我們既分享同一的菌菌,使我們在病裡合而為一~(原作係:我們既分享同一的聖體,使我們在祢內合而為一~)」,一家人嘅感覺更強烈了﹗爸爸病咗我要照顧兩個,最superwoman嘅係我要返工嗰日,一手自己執兩個書包,帶曉去葉太度我再返工再接曉返屋企再買外賣做晚餐,累死人~要知道,我都係病人丫﹗我雖然冇發高燒,但我都有頭痛流鼻水喉嚨痛同咳㗎~

一心以為大家都好轉嘅趨勢時,曉嘅流鼻水同咳都好得八八九九,點知大年初一曉又唔對路了,去太婆屋企拜年時個人冇精神又累又扭計,返屋企至發現又發燒了,到年初二傍晚又係冇明顯其他徵狀,一個月之內第四次拜訪源醫生啦~結果係中耳炎,要食抗生素﹗呢件事有段小插曲,我係母乳媽媽group度嘅post都贏到200幾個like,事關曉發高燒,源醫生特別提醒要多飲水,仲具體地提議可以飲啲果汁或者煲蕃茄薯仔湯,我都乖乖準備咗呢兩樣飲品俾曉,但佢都係唔太捧場,胃口唔開水唔係點飲,唯一肯密密啜媽媽奶,好在埋身奶奶長啜長有,好好度過咗高燒嘅時期~曉而家又好咗好多啦,差不過變番平時咁百厭搞搞震~媽媽都放心啲﹗

不過我覺得最特別嘅唔係上次三人一齊上呼吸道感染,最搞鬼嘅係我同曉真係分享同一的病菌之餘,仲要分享同一的病徵,亦證明源醫生嘅診斷非常準確~今日我點解要休病假,因為尋日開始少少低燒,右耳痛、聽覺朦朦地,我自己做醫生都知道係中耳炎啦~原來中耳炎真係好辛苦㗎,食兩粒Panadol都止唔到痛,我知道我肯定痛到瞓唔著,捱唔到第二朝,所以去咗屯門買少見少嘅24小時診所睇醫生~哇,真係估唔到人多得咁交關,我登記時姑娘話前面有80人,起碼要等一兩個鐘﹗唔等都冇辦法,街上又冇藥賣了,結果我等咗三----個----鐘----﹗醫生知道我餵母乳,除咗口服抗生素同耳仔藥水之外,只肯開Panadol俾我止痛﹗﹗﹗﹗﹗我要噴火了~我咪講咗食兩粒都完全止唔到囉,我提過NSAID應該食得佢都唔肯~明明我開完刀生曉,醫生已經開Voltaren俾我止痛,而曉病病都有得食Brufen,我點會唔食得丫?﹗診金+特效藥費仲要$710﹗﹗今朝同老公講起,我哋兩個應該quit咗份工,兩公婆開夜診9-6,我睇症老公負責診所運作,我哋仲一齊諗起:「唔知嗰陣華都空置咗好耐個鋪位租得出未呢?」哈哈~唉,算啦,都係得個講字,我邊會肯日日開夜丫~因為太痛,我出此下策----食曉啲藥﹗yeah~反正早幾次都有呢支Protofen+Periacin,都冇次次俾佢食,肯定夠藥啦~我開始明白平時啲patient點解平時成日要醫生開定啲藥「看門口」,同埋醫生唔想開俾佢嘅藥都要苦苦哀求,我今次都係個「唔乖」嘅病人啦,又食人哋啲藥,第二朝仲去藥房買醫生唔肯開俾我嘅藥~:p經此一疫,我相信自己又會做一個更好嘅醫生,對於中耳炎嘅病人會有更多empathy,原來真係好辛苦㗎,另外,我亦「支持母乳醫生」嘅見解有更深層次嘅認知,我哋嘅病人係個媽媽丫,雖然bb嘅安全係重要,但另外好重要嘅係要真正幫到個病人,媽媽嘅身體係好重要㗎,我尋晚根本痛到冇晒心機,照顧唔到曉,好在爸爸仲放緊假~今日點解冇咁痛?睇怕唔係食咗一次嘅抗生素咁快有效,尋晚入睡後一直覺得右邊耳仔有嘢流出嚟,耳仔藥水滴咗六滴入去咋喎,邊有咁多?連髮腳都濕埋,我都ok sure耳膜已經穿咗了,所以先冇咁痛~哎吔,今次都係手尾長了~

奶已泵完,blog又打好,我要再去眠一眠再叉叉電了﹗

前往其他半熟手媽媽blog

Comments

comments

在《12-2-2016:半熟手媽媽10m.邱氏病菌》中有 5 則留言

    • 真的好辛苦啊~
      希望炎症消退會自己生番埋啦~生唔埋要考慮要不要手術修補lor~不過很多人穿了耳膜都可以正常過日子⋯

  1. 原來你地馬拉松式咁病
    初一爸爸傷風,初二愷揚都流鼻水
    初五終於到我傷風
    體驗到病裡合而為一…XD
    不過我們是小病啦,你地要多休息,快啲好
    好想見你地丫~

    • 最誇張是loop兩圈,最搞笑是我完全跟著曉的步伐,還要跟她患「bb病」,要知道中耳炎在大人真的沒有那麼常見lor~
      我都好好多了,耳仔現在不痛,流水止住了,只是還是聽不清楚,希望耳膜ok啦~

  2. 哀傷與痛楚,未自己經歷過的人,很難說感到身受。所以,醫生也經歷一下病苦,老師也經歷一下考試挫敗,這些經歷對日後工作都很重要。

Catherine 發表迴響 取消回覆

你的電子郵件位址並不會被公開。 必要欄位標記為 *