休息完一晚，今日嘅行程應該更豐富了，因為經婚禮主人家夏叔叔嘅安排，我哋今日係檳城會包車一日，節省張羅交通嘅時間，可以去多啲唔同嘅地方，特別係交通唔方便嘅地方，大家又可以輕鬆少少～
第二日嘅早餐我哋又咁啱坐得番同一張大枱，曉曉又坐番同一個主席位，你係咪認得佢哋四個，已經成為好朋友啦？經fans婆婆介紹之後，你記唔記得邊個打邊個先？
今個trip對於行程安排contribution係零嘅我嚟講，當爹爹同家姐同導遊傾緊今日點樣行嘅時候，我哋？係lobby影下靚相最實際～:p望住呢張相嘅曉時，同打blog今日14m嘅曉相比，總覺得9m嘅曉表情特別純真，heehee，而家總會有一抹頑皮嘅神情咁～
呢架就係今日接載我哋嘅車啦，全靠佢，可以係超高溫嘅檳城之中成為我哋嘅綠洲，太熱？上車休息一陣啦，呵呵～
今日嘅第一站係水上清真寺﹗
去旅行時見過嘅清真寺都唔少，講到我印象最深刻嘅，肯定係西班牙Cordoba嘅清真寺(請參閱：5-11-2013：西班牙day 6(part 2)．Cordoba．並存的大教堂與清真寺)，但呢間都好特別﹗
因為係海上建成﹗
我哋全人類包括男女老幼都著晒短褲，所以都冇入去參觀了，外面影下相，又順便逛下呢度嘅海灘啦～
趁未俾太陽曬到溶之前影張一家三口先～
下一站係去Tropical Spice Garden，講起呢個景點時，我以為係好似之前去斯里蘭卡嘅Spice Garden咁(請參閱：10-12-2012：斯里蘭卡day 3(part 2)．Dambulla Caves．香草園)，少少嘢睇，有人帶啲簡單講解，最重要係最後買紀念品﹗
去到睇個觀光地圖，哇，咁大？﹗景點啲數目字簡真多到好似個主題公園咁，又有甚麼迷宮、大秋千，唔知會行幾耐？最犀利嘅係有語音導覽﹗買好飛準備入場時，職員幫我哋噴啲自家製蚊怕水，因為入場前曉曉已經瞓著咗，我哋講笑話，唔好到逛完都未醒，乜都冇睇過，淨係奉獻咗啲血俾蚊蚊就唔抵了～
荷花池－－可能季節唔啱？花唔算好多～
樹葉間透進太陽光，行咗冇兩步就好似入咗森林咁呢～講起「兩步」，雖然啱啱大讚呢度咁犀利有語音導覽，我哋一人拎住一部，但真係聽咗冇幾多段錄音就放棄了，因為實在太－－長－－氣－－﹗而且又要睇地圖，又唔係好知自己係幾多號number，放棄了～:p
對比地圖超級多景點，我哋都掌握得唔太好，不過走進大自然，睇下特別嘅植物，都總有趣嘅～
其實斜路都多，揹住曉行起嚟都有啲辛苦～
過呢啲「橋」要特別小心，叉錯腳要負起兩個人嘅責任﹗
有個自助涼茶站，對於陌生他鄉嘅涼茶，特別而家係餵緊奶嘅狀態，我就唔敢飲了，佢哋試過，仲暖暖地，應該都新鮮嘅，大家嘅comment都覺得其實味道好淡，有冇效就真係唔知了～
雖然行嘅係香草園，但路上見到出面街嘅電線桿有猴子家庭，好可愛呀﹗猴子bb攬實媽媽，又有隻大少少嘅跟住，我哋企定定望咗佢哋好耐呢～
太好了，曉終於係離開景點前瞓醒覺﹗heehee～天氣熱，飲啖水降降溫先～
呢個係咪嗰個涼茶站？我諗要史官家姐幫我核實下﹗今次曉醒咗，我哋可以影番張合照～
如果有大個啲嘅小朋友呢個就好玩了，係大型版嘅Snakes and Ladders棋盤，雖然平時玩棋大家都想要ladder唔想要snake，但呢個嘛，我諗我都想snake多啲，因為有得玩滑梯丫嘛～
熱到爆炸時，紀念品店－－呢個唯一有冷氣嘅地方，當然最得我歡心啦(可能更得曉歡心)～今次爸爸帶埋曉啲朋友仔嚟旅行，因為體型細嘅優勢，可以跟埋出嚟玩唔駛留係酒店嘅就係佢，青蛙王子﹗見唔到？仔細啲搵下啦～紀念品店冇乜大收穫，但我哋同家姐都買咗把扇，靚係其次，即買即用最緊要～
臨走影埋個招牌先啦～
待續
前往其他馬來西亞旅遊blog