當決定一家人一齊出席夏叔叔女兒幼馨嘅婚禮時，因為吉隆坡之前都去過，而且都玩得幾深入(雖然已經係十年前，可以參閱2006年嘅馬來西亞旅遊blog)，所以大家商量，揀多一個地方去～我之前見過人哋啲相，去檳城都好似好正咁就作出呢個提議，爹媽當年嘅honeymoon目的地就係去檳城了，相隔36年半，佢哋都想重溫呢個舊地吧？講咁多background做咩？因為去檳城，當然諗到海邊同埋住resort啦，因為我好期待好期待同曉曉游第一次水丫﹗曉曉四月出世，佢嘅第一個夏天年紀太細了，我哋冇帶佢去過泳池，去海灘都只係坐下冇落過水，今次係第一次著泳衣，第一次游水呀～其實Hard Rock Hotel都係我揀的，plan之前嘅trip時檳城曾經係候選佳麗，而上網睇時見過Hard Rock Hotel嗰啲可以直接跳落游泳池嗰啲酒店房已經好想住，今次雖然book唔到嗰啲房，但嗰個好大嘅泳池都好令人期待呢～

一plan呢個trip我就決定要買泳衣俾曉曉，款式？當然係最show身材嘅bikini啦～我不嬲都係Next嘅fans，奶奶俾嘅Next衫衫就不在話下，我自己又會上網買Next，又抵著、款式又好、品質又好、又唔會係香港同人撞衫(雖然我唔sure曉曉其實有幾介意⋯)～我揀咗呢件白底碎花ruffle邊2 piece俾佢，靚靚～

其實同bb去游水，片片都好講究，唔著片片的話，連我自己都唔想同佢身處同一個游泳池，尿都由自可，屎嘛⋯唔好講到咁detail了～普通片片落水又會馬上發脹，所以嘛，有呢啲偉大嘅發明－－游水尿片﹗雖然都幾貴，係普通片片嘅5-6倍價錢，但都必須㗎，因為可以吸尿尿，又唔會吸泳池水，可以保持泳衣嘅貼身款式～曉曉著嘅都係Little Swimmers，不過香港包裝好似有少少唔同～

我哋落到去時，家姐同恒仔已經到咗啦，揀咗個靚位，坐咗係沙灘椅上面～佢哋個view可以望番酒店～

呢度都有pool bar，其實我都好想試下咁樣飲杯cocktail，又要餵奶又要湊b，都係第時先啦～

曉曉&姨丈～姨丈，我哋唔係得馬騮乾合照㗎，仲有呢張靚靚合照﹗呢個肉肉曉芝蓮泳衣look唔會再有機會出現啦，而家長高咗拉長咗，雖然仲有肉地，但已經唔會咁圓碌碌lu～

我哋試玩啲溫和啲嘅先～

合照﹗

牛刀小試，曉曉開頭有少少緊張，但都ok喎，未至於嚇到喊～

仲越玩越開心添～

其實對於同佢游水我都有啲擔心㗎，曉曉細個時勁驚沖涼，頭三個月都係喊住沖，又唔係我手勢問題丫，陪月姨姨沖都一樣喊，係爆喊到當年鄰居都關心係咪出咗咩事嘅程度，後來就越嚟越好，到後來一歲後就直情鍾意沖添，有時賴死唔上水，要放走啲沖涼水先肯出嚟～

呢個咁刺激你哋o唔ok呀？爸爸抱住曉－－衝呀～

好開心丫﹗

我哋都正式落下水游啦～

開心夏日～

enjoy～曉話，我又鍾意浸水，又鍾意飲游泳池啲水～:p

呢個池底鋪咗沙，曉嘛，水就ok，沙就no no了，放佢踩下池底，即刻爬番上我大脾～打blog呢個時候已經五月了，嚟緊嘅夏天你仲怕唔怕沙？媽媽好想帶你去沙灘玩呀﹗

上水冇耐曉就眼瞓，居然婆婆抱住就咁係泳池邊瞓著咗，有婆婆睇住，媽媽放心同爸爸二人世界一陣去游下水、浮下水，好難得嘅機會呢～個泳池好大，人又唔多，可以游得好盡興，其實有滑水梯，不過以我嘅年紀嚟講，好似略嫌大咗少少了，等曉大個啲，我就可以「陪佢玩」，yeah～

時間咁上下，我哋返房沖個涼換件衫就出發去食晚飯了﹗

待續

前往其他馬來西亞旅遊blog

Comments

comments