游完水大家各自返房沖完涼之後，集合出去食晚飯，今晚決定去酒店附近搵食﹗知道酒店步行距離有一艘船餐廳The Ship，我哋散步過去睇下啱唔啱食～The Ship係食扒嗰啲西餐的，過程唔係好記得，但我哋最後揀咗附近嘅海鮮餐廳，價錢又ok又即管試下呢度嘅海鮮啦～
Golden Thai嘅門口夠氣派～
比較起香港嘅海鮮酒家，呢度嘅魚缸又大又多，雖然用嘅重量單位唔同，但粗略計下呢啲真正海鮮價嘅海鮮價錢，都幾貴喎，我哋都係叫番出面餐牌中固定價錢嗰啲好了～
我哋嚟到嘅時間算早，餐廳好多吉位，我哋可以坐到超正嘅第一排臨海座位，雖然侍應覺得我哋6大1B坐六人枱好逼，建議我哋坐大枱，但咁正嘅景觀好難得，係放埋啲餸就逼少少，但都唔緊要啦～曉曉？坐主席位囉，佢又唔駛夾餸～:p
面對住一望無際嘅海，心情都靚晒～入夜又吹住海風，一啲都唔熱丫～
我哋睇下有啲咩？家姐話我個表情over咗少少喎～
好靚日落嘅橙黃色，趁托住海灘，陶醉了～
講到最靚景嘅餐廳，我總會記起好朋友珊珊係美國婚禮擺酒嘅酒家(請參閱：27-7-2014：加州婚禮+夏威夷day 2(part 3)．珊珊big day之Bay Area臨海晚宴)～
隨住時間過去，天色一直變化呢～
坐咗個咁靚嘅位，我哋一路order時侍應好似有啲奇怪(或者唔滿意咁)，點解你哋咁多個人嚟食海鮮，叫咁多碟蔬菜嘅？仲要唔出去揀海鮮，邊度算食海鮮呀？umum⋯其實我哋都冇話一心嚟食海鮮嘅～
食物嚟到樣樣都幾好味丫～食物有分大中細size，根據侍應建議，我哋叫咗中size，最震憾係碟前菜嚟到，點解碟椒鹽香酥菇可以大到成個面盤咁？﹗中size係咁，大size咪好得人驚？﹗餐牌入面嘅「海鮮」不外乎蝦、魷魚、蜆呢啲平民材料，我吔盡量揀唔同嘅口味嚟試下～游水海鮮一方面我哋唔係專登嚟食唔駛咁豪華，另一方面家姐啱啱係要戒口嘅狀況，我哋jap jap jap佢有得睇冇得食大家都唔盡興吧～咁樣好送飯嘅餸更適合我哋﹗
曉曉？雖然佢正餐都係食樽裝baby food，但今晚第一次俾佢試飲人生第一啖椰青水，佢嘅表情係叫人一生難忘嘅幸福，超好味呀﹗
日落後又係另一番景緻～
我哋食飽飽離開餐廳時啱啱有跳舞演出，不過餐廳都係唔多人食嘢，有少少冷清咁，我哋停低睇一陣，完咗一段拍拍手鼓勵表演者先走啦～
沿路行番酒店，夜市嘅檔口已經開門，對於個夜市有少少失望呢，以前去過馬來西亞嘅夜市，印象中係好熱鬧同埋好多特色小食，呢度兩旁攤檔數目都多，但都係賣啲冇乜吸引力嘅東西，品質不佳嘅衫褲鞋襪，一眼就睇得出嘅A貨，連有代表性少少嘅紀念品都欠奉～所以都冇乜收穫～
慢慢散步番去，曉話，都係瞓覺最實際﹗因為嗰張超軟凹入去嘅網床，之後曉曉晚晚都同我哋瞓啦，好在，酒店張床夠大張﹗
待續
前往其他馬來西亞旅遊blog