今日George Town裡面另一個must go嘅目的地就係睇壁畫，之前家姐睇啲資料話可以坐人力車去欣賞，既可以體驗old town風情，又可以省少少腳骨力～我哋由姓氏橋離開，向壁畫群嘅方向步行，發現冇耐又有一幅冇耐又有一幅，而且距離都唔係好遠，而且驟眼都未見到搭人力車嘅地方，於是繼續－－行﹗

行再遠啲嘅距離本來都唔係問題，我哋跟爹媽去旅行由細行到大，之不過天氣實在太太太太熱﹗太陽實在太太太太猛﹗你要知道，平時落雨都唔鍾意擔遮嘅day，為咗個女都要擔遮遮太陽～

你睇呢個小朋友就知道佢熱到有幾dur⋯今次我哋發現曉曉真係好怕熱，佢一出到戶外就變省電模式咁，冇晒心機又唔笑，但一入冷氣就即刻成個人醒晒，變番鮮蹦活跳，你話係咪港女丫？哈～到下次去台灣時，發現原來凍都有相同效果⋯^^”曉曉，要多啲帶你出嚟鍛練啦，我哋唔係弱女子嚟㗎～

見到有間餅店，入去望望⋯

啲甚麼甚麼酥好似幾有特色咁，而且仲有座位可以坐住食，我哋入去休息休息啦～我同day買咗兩款酥，一甜一鹹，印象中個鹹味嘅係雞肉，食落調味似叉燒酥，甜嘅好似係芒果菠蘿之類？(隔咗三個月忘記了⋯我又唔係史官家姐⋯)味道感覺似鳳梨酥，唔算特別出色～曉曉？當時九個幾月嘅佢，snacks暫時只能夠係星星餅啦～佢都食得開心嘅～大家最開心嘅都係有個涼快少少嘅地方休息下～

曉：星星餅都好過冇啦～

陸陸續續有唔同嘅壁畫出現了，因為唔知道邊度會有，所以好似尋寶咁呢～哇，呢度有﹗哇，嗰度有﹗

呢幅好似係餅店外面嘅？大概我哋係先俾壁畫吸引過嚟先發現間餅店的～有架單車㗎，我哋行裝太多，隨便靠著影就好了，媽咪就好勇猛又好活潑咁真係騎上單車度影﹗

sisters~

除咗壁畫，街頭上隨處都有各種藝術作品，點綴呢個小鎮，四處變得更有趣味～

貓貓好似都成日做主角呢，莫非馬來西亞人都對貓有情意結？令我諗起貓城古晉呢(請參閱：21-5-2014：古晉學習行day 2(part 3)．世界唯一的Cat Museum)～

時間晏晏地，我哋又expose係熱熱嘅戶外太耐，lunch嘅要求？乜都好啦，最緊要有冷氣﹗我哋見到附近有間酒店，酒店應該有冷氣嘅餐廳吧？未搵餐廳，一入lobby曉已經醒神晒了～餐廳外型睇落唔係好酒店咁，似啲好街坊嘅餐廳，本身都冇乜期待～

不過，第一樣令我驚喜嘅居然係－－

呢張藤製BB椅﹗﹗﹗本身都冇期待有BB椅之餘，仲要有咁乎合熱帶地區風格嘅BB椅，又靚又實用喎～因為係藤製吧，好似涼快啲呢～曉都坐得幾穩陣﹗對於馬來西亞是否baby friendly都冇乜期待，果然育嬰室只係機場同埋後來係吉隆坡嘅新商場見過，但BB椅就真係好常available，犀利到連大牌檔風格嘅點心檔都有﹗遲啲嘅blog就會出場了～

我哋食物未到，曉曉開餐先啦～

除咗唔食雞嘅媽咪之外，我哋其餘清一色－－海南雞飯﹗好味呀，除咗經典嘅雞同油飯之外， 仲有個清清地嘅青菜湯同埋燙芽菜，比起香港街上面賣嘅海南雞飯更營養均衡﹗因為忙住照顧曉，我其實影相比較少，好多都偷史官家姐嘅相嚟打blog，飲品佢就只影咗自己嗰份了，但隔咗咁多個月，我居然仲記得區區一餐我飲啲乜？我飲咗－－黑牛(可樂＋雪糕)﹗因為實在太太太太熱要消暑了～

我大想頭地期望酒店會有育嬰室可以好好同曉換片，結果都係冇，只能夠係lobby快手快腳換就算了～大概天氣熱流汗多吧，曉啲片片都冇平時濕得咁多，遲啲換都冇pat pat紅嘅～還算ok﹗

待續

前往其他馬來西亞旅遊blog

Comments

comments