第一日嘅行程主要只係搭飛機搭車、唯一行程只係食咗個靚飯，瞓咗一晚到day 2，我哋正式出去玩lu～首先梗係食個靚早餐先啦﹗我哋去Hard Rock酒店嘅Starz Diner食自助早餐，搵個位坐低先～
我哋一行六大一B，如果係坐長枱，我哋嘅主席通常都係曉，方便左右護法(爸&媽)傍住佢嘛～Hard Rock酒店係音樂、Beattles做主題，周圍都係佢哋嘅公仔、相片～
曉曉去呢趟旅行時仲係得九個幾月，仲未正式加早餐俾佢食，所以佢係食咗奶奶出嚟，我都盡量睇下有冇啱佢食嘅嘢俾少少佢參與，曉有食白粥啦、烚蛋啦、水果啦咁，都幾豐富㗎～
大合照，yeah～
我哋day 3包咗一日車去玩，day 2我哋就決定自己搭車出George Town逛景點，下晝返嚟酒店玩下水咁～尋晚食完dinner出咗路口睇過個巴士站，似乎啲巴士班次真係好疏，為咗節省時間，我哋決定搭的士～好在酒店門口已經停咗好多的士等客，最好嘅係乜？就係原來檳城有大的士可以載晒我哋七個人丫﹗不過嘛，坐過第一次就成日都心掛掛，之後遇唔到大的士要分開兩架時總有啲遺憾～
今次個trip真係完全靠家姐prep，我完全零睇過旅遊資料，所以都唔知有咩地方去，決定做一隻徹徹底底嘅羊咩咩～要適合作為步行半日遊嘅起點，又要清楚俾的士司機知道位置，我哋決定第一站去位於George Town海邊嘅姓氏橋～一落車嘅感覺係⋯真係好熱﹗熱得好緊要﹗即刻拎遮、帽出嚟﹗而且即刻想飲凍嘢～^^”
姓氏橋係最早期檳城華人聚居嘅地方，呢啲水上木屋區延伸出去海，UTravel個網頁話而家只剩低六條，全部都係以唔同姓氏命名㗎～當中對遊客嚟講最出名嘅就係姓周橋～
牆上有可愛嘅壁畫呢～曉你望去邊？望鏡頭丫﹗
架係水上面嘅木橋，兩旁就係一間間木屋，其實而家大多已經變成serve遊客嘅需要，cafe、商店等等～好有大澳feel呢～
當然都仲有人真係係度生活啦，靜靜雞影⋯靜靜雞影⋯呢款衫架design超讚﹗撐起咗條牛仔褲，立體咁掛起嚟晾就快乾好多啦～btw，檳城天氣咁熱，我估用普通衫架都應該超快乾⋯但我又諗，要收納起啲衫架時會唔會好bulky？不過人哋又唔係香港，有的是空間﹗
行入去就有好多以遊客為target嘅商店了～
賣下紀念品、小玩意，價錢都唔貴～
居然曉咁快就有收獲﹗我見啲裙仔幾靚就揀咗條俾佢，但個葫蘆係佢自己揀㗎囉～一拎上手就愛不釋手，俾第二個佢都唔肯放低，好啦，買俾你行住玩啦～
仲有好多靚靚cafe，不過我哋去時時間尚早，好多餐廳都未開門～
坐係度飲果汁會唔會特別高興？講開有咩食，day同人講親去馬來西亞，大家都會叫佢記得食榴槤，我哋一行七人其實只有佢會食，大家途中都不停鼓勵佢食，姓氏橋呢度都好多榴槤product，好似榴槤雪條、榴槤雪糕等等，結果day一款都冇試過添～等曉曉大個啲兩父女一齊去食食食啦﹗
曉曉喜愛嘅轉轉轉風車，就係呢個trip佢覺識轉轉轉，佢見到會轉嘅嘢，風扇、風車、抽氣扇、分體式冷氣，都會舉高手指頭轉俾你睇呢，而家有埋配聲添lu「轉轉轉」～
每條姓氏橋嘅盡頭就係海啦，雖然天色都唔錯，但檳城個海俾我嘅感覺冇話得別靚，大概因為唔算太藍吧～
特色水上木屋～
我哋係呢道橋最出靠海邊嘅位置，好似一間廟嘅前面嘅長椅上休息休息，曉曉亦係度享用佢嘅refreshment－－奶奶﹗因為天氣太熱，用巾餵其實佢都幾熱呢，好在佢呢段時期啜得好快，幾分鐘食完都ok，而且曉著得清涼嘛～
經過一間鋪頭賣禮品包，似乎馬來西亞嘅送禮文化都幾普遍呢，而且要包裝到大大份咁，後來我哋去到吉隆坡行嘅supermarket見到嘅仲誇張地大，入面好多內容，但價錢又真係豐儉由人，即使成座塔咁都唔一定好貴，入面有啲係餅乾呀甚麼咁，大大份送禮時夠得禮，但對方拆開時都明白啦其實～:p
離開姓氏橋我哋就繼續逛George Town嘅各個景點了～
待續
前往其他馬來西亞旅遊blog