18-1-2016:曉出國之檳城假期&吉隆坡婚禮day 1(part 1).90分的第一次飛行旅程

終於到咗出發嘅日子lu﹗yeah yeah yeah~早上再執埋最後嘅行李就出發囉,既然而家同公公婆婆住埋同一個屋苑,當然一齊搭的士去機場啦,估唔到我哋四個大人一個B、三隻大行李一部BB車都可以一架的士載晒,good﹗去到我哋同姨媽姨丈會合,一齊係機場翠華食(第二轉)早餐先~

check in時都有啲唔順利,話說出發前一日家姐幫手上網check in,但發然成部飛機嘅兩個俾BB坐嘅搖籃位已經有人揀咗﹗得番單丁位﹗如果揀的話即是我同曉自己坐前面?冇得同爸爸一齊照顧,四個鐘頭嘅機程咪好辛苦?﹗人哋咁早揀得嗰個位,都未必肯同我哋換啦⋯我哋打咗電話去港龍嘅熱線問,佢話佢哋會盡量幫忙有BB同行嘅家庭,去到機場counter時會再同我哋處理,咁就好放心了~點知去到機場check in時,居然同我哋講冇得調,因為預先揀咗位嘅乘客張飛係高啲等級嘅經濟艙,係「上等人」,有優先揀位,而我哋嗰張係「下等人」飛,咁冇辦法啦~所以最後我哋6+1就2個2個2+1個咁坐,而我哋一家三口同公公婆婆就前後行,咁都好啦~當時係有啲生氣,因為人哋冇BB又坐搖籃位,我哋有BB又要坐普通位,咁唔合理嘅?﹗而熱線嘅職員同地勤職員講嘅嘢又唔一樣,哈,個地勤職員好落力叫我哋「反映意見」,似乎佢哋都好多無奈呢~

螢幕快照 2016-02-24 下午3.28.24

食完個早餐我哋就入閘過關了﹗話說曉張passport相係兩個幾月大時影,同而家個樣都好唔同了,大家成日都疑惑究竟曉會唔會過唔到關?﹗結果成功﹗俾多少少資料準備帶BB去旅行嘅爸爸媽媽,帶BB去旅行只需要特區護照同埋冇照片嘅兒童身份證就ok啦,回港證同出世紙都唔需要㗎~

雖然我哋自己有BB車,但過關後發現有機場嘅BB車﹗試坐試坐﹗自己架車就用嚟載貨先啦~曉唔太抗拒,應該都坐得算舒服啩?我嘅用家角度就覺得推得超順滑,可能因為大轆+地氈吧~

螢幕快照 2016-02-24 下午3.26.37

今次係近近地嘅520閘口上機,行過去就ok了,不過要再坐接駁巴士上飛機呢~香港人,梗係要係閘口前影張出發相啦﹗自拍難度太高,呢張冇咗爸爸添~

螢幕快照 2016-02-24 下午3.26.49

我哋一家三口再自拍一張啦﹗一、二、三,開心笑~

螢幕快照 2016-02-24 下午3.26.45

雖然曉好似興奮到唔駛食奶咁,唔好幾餐逼埋一齊,都係捉佢上飛機前食多一次奶奶先,人奶媽出門最方便嘅就係帶少好多嘢,一巾走天涯﹗yeah~

人哋話,BB起飛降落耳仔唔舒服,最好就係俾佢啜啜,但上機前就啜咗咁咪冇得再啜囉?好好彩,曉之後好快就瞓咗覺,居然到登機、搭接駁巴士、起飛都冇醒到,幫咗我哋一把呢﹗

螢幕快照 2016-02-24 下午3.28.37

因為有BB,我哋可以優先登機,我換咗薄布揹帶Babasling抱住呼呼大睡嘅曉,爸爸就要做咕哩啦,背囊、去到飛機門口寄倉嘅BB車、我哋放埋hip seat揹帶入去BB車個大袋入面,辛苦了﹗咦,係接駁巴士又見番公公婆婆喎~

螢幕快照 2016-02-24 下午3.28.42

上到飛機,空姐就先派咗曉嘅飛機餐俾我哋先~之前有教友帶差不多兩歲嘅小朋友搭飛機,飛機餐都係4 months嘅baby food,唔啱食所以俾咗我哋~今次都係4 months嘅baby food,一樽「主菜」,一樽「水果」做甜品,仲有一樽萍果汁做「飲品」,都好豐富呀~下次去台北時曉應該唔吼呢啲飛機餐了,睇怕又係拎番嚟送俾人啦~

曉好合作地呼呼大睡咗個幾鐘,我可以好輕鬆地睇下帶嚟旅行嘅東野圭吾小說,非常好~到我哋大人都上飛機餐時佢先醒,好啦,一齊開餐啦(雖然有啲狼狽⋯)﹗

螢幕快照 2016-02-24 下午3.29.22

其實帶住九個月大嘅BB坐已經有啲逼,雖然話到兩歲前都可以唔買機票,但好難想像如果差唔多兩歲要搭長途機,三個人逼埋兩個位真係唔係好搞得掂⋯因為曉好大件,又會搞搞震,所以我哋兩份大人飛機餐全部堆晒係day嘅摺枱上面,向上發展,我就專心餵曉~好在佢都乖乖食晒兩樽﹗果汁媽媽唔係唔俾你飲,但出發時曉仲未掌握用大人飲管飲得好呢,經過幾日旅程,佢後來用長飲管飲椰青都得了﹗其實我都餓㗎,好在有day間中塞一兩啖嘢食俾我頂住當先~

螢幕快照 2016-02-24 下午3.31.30

收晒啲碗碗盤盤,鬆動好多了﹗我哋開始「機上娛樂」--努力娛樂曉曉﹗務求keep住佢嘅開心狀態﹗

螢幕快照 2016-02-24 下午3.27.07

除咗我帶咗上機嘅幾件玩具之外,乜都係玩具啦﹗

螢幕快照 2016-02-24 下午3.27.39

睇書書都好好消磨時間﹗好在帶咗曉喜愛嘅大圖畫書嚟﹗係公公係台灣買俾曉嘅書書嚟㗎~

螢幕快照 2016-02-24 下午3.27.03

因為公公婆婆就坐係我哋前面,間中都可以過婆婆度玩一陣呢~

螢幕快照 2016-02-24 下午3.27.24

頭先冇講,其實個飛機餐套裝除咗baby food之外,仲有一條片片同兩張濕紙巾,正好係旅途之中換一次,究竟片片size係咪睇住買機票時填嘅資料配給,定係空姐目測個BB而揀嘅呢?點解咁fit係M碼? 平時飛機就成日搭,真係唔知原來廁所格入面有摺合式嘅換片枱,都幾方便呀﹗其實商場要育嬰設備都唔駛好多空間丫,有換片枱對於媽媽們嚟講已經方便咗好多了~

點解呢趟旅程係90分,嗰10分扣咗係邊?其實曉一直都算好乖,無奈差不多要降落嗰大半個鐘開始扭眼瞓,但困係座位又瞓唔到,咪煩躁啲囉~有得同人玩下又定一陣,話說坐我哋附近嘅好幾位乘客,一睇落就覺得係運動員團體,原來day認得都唔講我知,我自己唔點留意體育新聞咪唔識囉,原來正正坐我哋旁邊嘅係羽毛球黑妹葉姵延呀﹗曉同名人、名人嘅教練都有玩過呢~

曉都真係累啦,一落機我行咗幾步佢就瞓著覺了~

螢幕快照 2016-02-24 下午3.27.50

到咗檳城了﹗下一篇blog我哋就往酒店去啦~

待續

前往其他馬來西亞旅遊blog

Comments

comments

在《18-1-2016:曉出國之檳城假期&吉隆坡婚禮day 1(part 1).90分的第一次飛行旅程》中有 1 則留言

  1. 曉曉好乖,肯吃肯玩,坐飛機省了不少煩事,且增添旅途樂趣。

wuchihung 發表迴響 取消回覆

你的電子郵件位址並不會被公開。 必要欄位標記為 *